លោកហូឡង់ទៅអាហ្វ្រិកខាងលិច ក្នុងទិសដៅសេដ្ឋកិច្ចនិងសន្តិសុខ តែឈឺក្បាលនឹងបញ្ហាសិទ្ធិមនុស្ស
ចុះផ្សាយនៅថ្ងៃ៖
ស្តាប់ - ០៦:២៧
នៅថ្ងៃព្រហស្បតិ៍នេះ ប្រធានាធិបតីបារាំង ហ្វ្រង់ស៊័រ ហូឡង់បានចាប់ផ្តើមបំពេញទស្សនកិច្ចរយៈពេល៣ថ្ងៃ នៅប្រទេសអាហ្វ្រិកខាងលិចចំនួន៣ គឺកូតឌីវ័រ នីហ្សេ និងឆាដ។ ទស្សនកិច្ចរបស់ប្រធានាធិបតីបារាំង ផ្តោតលើទំនាក់ទំនងសេដ្ឋកិច្ចពាណិជ្ជកម្ម ពិសេសលើប្រតិបត្តិការប្រឆាំងភេរវកម្ម នៅតំបន់សាហែល ដែលបារាំងកំពុងត្រៀមដំណើរការ ក្រោយពេលយោធាបារាំងបិទបញ្ចប់ប្រតិបត្តិការកំចាត់ក្រុមភេរវជននៅម៉ាលី ក្នុងខែកក្កដានេះ។ នៅក្រុងអាប៊ីតចង់ ថ្ងៃព្រហស្បតិ៍នេះ ប្រធានាធិបតីកូតឌីវ័រ អាឡាសាន់ វ៉ាត់តារ៉ា បានទៅទទួលលោកហូឡង់ នៅអាកាសយានដ្ឋានដោយផ្ទាល់។
បារាំងត្រៀមដំណើរការប្រតិបត្តិការប្រឆាំងភេរវកម្ម Barkhane នៅតំបន់សាហែល ក្នុងពេលឆាប់ៗ
តំបន់សាហែល ស្ថិតនៅភាគខាងត្បូងតំបន់សាហារ៉ា។ ប្រតិបត្តិការប្រឆាំងភេរវកម្ម នៅតំបន់សាហែល នៅអាហ្វ្រិកនេះ មានឈ្មោះថា Barkhane។ ប្រតិបត្តិការនេះបង្កើតឡើងដើម្បីជំនួសប្រតិបត្តិការ Serval របស់បារាំងដែលទើបបិទបញ្ចប់នៅម៉ាលី នៅខែកក្កដានេះ។ បារាំងប្រាប់ថា បានកំចាត់ក្រុមភេរវជនចេញអស់ពីម៉ាលីហើយ។ ប៉ុន្តែ ដើម្បីធានានិងពង្រឹងសន្តិសុខអោយបានទូលំទូលាយនៅអាហ្វ្រិក បារាំងសម្រេចចេញប្រតិបត្តិការបាខាន នៅតំបន់សាហែលនេះឡើង។ ប្រតិបត្តិការនេះ មានការសហប្រតិបត្តិការពីប្រទេសអាហ្វ្រិកចំនួន៥ គឺម៉ូរីតានី ម៉ាលីដដែល បួគីណាហ្វាសូ នីហ្សេ និងឆាត។
នីហ្សេនិងឆាតស្ថិតក្នុងដំណើរទស្សនកិច្ចរបស់លោកហូឡង់។ នៅនីហ្សេមានទីតាំងទ័ពអាកាសបារាំង។ បារាំងចង់ប្រើទីតាំងនេះ សម្រាប់ការងារចារកិច្ច។ នៅឆាតវិញ បារាំងក៏មានទីតាំងយោធាសំខាន់ដែរ។ បារាំងចង់បោះទីតាំងបញ្ជាការប្រតិបត្តិការប្រឆាំងភេរវកម្មឈ្មោះបាខា នៅក្រុងចាមេណី ប្រទេសឆាត។ ពេលលោកហូឡង់ទៅនីហ្សេ និងទៅឆាត ថ្ងៃសុក្រនិងថ្ងៃសៅរ៍នេះ លោកហូឡង់ចង់មើលថា តើប្រតិបត្តិការបាខាននេះ នឹងត្រូវដាក់ដំណើរការបានដូចម្តេចដែរ។ ជាការកត់សម្គាល់ប្រតិបត្តិការបាខានមានទាហាន៣០០នាក់ ឧទ្ធម្ភាគចក្រ២០គ្រឿង រថពាសដែក២០០ យន្តហោះយុទ្ធសាស្ត្រ១០គ្រឿង យន្តហោះប្រដេញ៦គ្រឿង និងយន្តហោះដ្រូន៣គ្រឿង។
ពេលបារាំងសម្លឹងប្រយោជន៍ទីផ្សារសេដ្ឋកិច្ចនៅអាហ្វ្រិកខាងលិច លោកហូឡង់អាចឈឺក្បាលនឹងបញ្ហាសិទ្ធិមនុស្សនៅកូតឌីវ័រ និងឆាត
អង្គការសង្គមស៊ីវិលបារម្ភថា ប្រធានាធិបតីបារាំងជជែកតិចតួចពីរឿងសិទ្ធិមនុស្ស នៅអាហ្វ្រិកខាងលិច ដោយសារតែលោកហូឡង់ ផ្តោតលើតែទំនាក់ទំនងសេដ្ឋកិច្ចពាណិជ្ជកម្មជាមួយកូតឌីវ័រ និងនីហ្សេ។ គួររំលឹកថា បារាំងជាដៃគូពាណិជ្ជកម្មទី១របស់កូតឌីវ័រ។ កូតឌីវ័រធ្លាប់ជាប្រទេសមានសេដ្ឋកិច្ចខ្ពស់នៅអាហ្វ្រិកខាងលិច។ ពេលនេះ កូតឌីវ័រជួបកំណើនខ្ពស់គួរកត់សំគាល់ គឺមាន៩,៨ភាគរយ ក្នុងឆ្នាំ២០១២ និង៨,៧ ក្នុងឆ្នាំ២០១៣។ គេរំពឹងថា កូតឌីវ័រអាចជួបកំណើនពី៨ទៅ១០ភាគរយ សម្រាប់ឆ្នាំ២០១៤នេះ។ ពេលនេះបារាំងឆ្លៀតចង់ក្តោបក្តាប់ទីផ្សារកូតឌីវ័រដែលកំពុងស្ទុះឡើងនេះ។
សម្រាប់នយោបាយក្នុងស្រុកវិញ អង្គការសង្គមស៊ីវិលចង់អោយលោកហូឡង់ជំរុញអាជ្ញាធរកូតឌីវ័របច្ចុប្បន្ន អោយសម្រេចអោយបានការផ្សះផ្សារជាតិ។ គឺការផ្សះផ្សារជាតិ រវាងសកម្មជនអតីតប្រធានាធិបតីឡូរ៉ង់បាក់បូ ជាមួយសកម្មជនបក្សកាន់អំណាចរបស់ប្រធានាធិបតីវ៉ាត់តារ៉ា។ ការផ្សះផ្សានេះ នៅមានបញ្ហាដោយសារភាគីនិមួយៗ ចោទគ្នាទៅវិញទៅមក ថាជាអ្នកបង្កហិង្សាប្រដាប់អាវុធ កាលពីឆ្នាំ២០១០នោះ។ សូមរម្លឹកថា កាលពីឆ្នាំ២០១០ អតីតប្រធានាធិបតីបាក់បូ ដែលត្រូវផុតអាណត្តិ បានទាត់ចោលលទ្ធផលការបោះឆ្នោតដែលផ្តល់ជោគជ័យអោយលោកវ៉ាត់តារ៉ា ជាប្រធានាធិបតីបច្ចុប្បន្ន។ ជម្លោះប្រដាប់អាវុធក៏ផ្ទុះឡើង សម្លាប់មនុស្ស៣ពាន់នាក់។ អតីតប្រធានាធិបតីបាក់បូ កំពុងជាប់ឃុំឃាំងនៅតុលាការអន្តរជាតិក្រុងឡាអេ ជាប់ចោទពីបទឧក្រិដ្ឋកម្មមនុស្សជាតិ។
ដោយឡែក រដ្ឋអំណាចគ្រប់គ្រងរបស់ប្រធានាធិបតីវ៉ាត់តាវ៉ា បច្ចុប្បន្ន មានសមាសភាពសមាជិកជាអតីតមេសង្គ្រាមផងដែរ។ អតីតមេសង្គ្រាមទាំងនេះកំពុងកាន់កាប់កងកម្លាំងការពារកូតឌីវ័រ។ គេតែងសង្ស័យថា ពួកអតីតមេសង្គ្រាមទាំងអស់នេះ បានសម្លាប់មនុស្សដែលកំពុងជាប់គុកទៀតផង។ ដើម្បីឆ្លើយតបការទាមទាររបស់សង្គមស៊ីវិលក្នុងទស្សនកិច្ចនេះ លោកហូឡង់ ត្រូវធ្វើយ៉ាងណាជំរុញអោយកូតឌីវ័រធ្វើកំណែទម្រង់ច្បាប់ព្រហ្មទណ្ឌអោយបានឆាប់រហ័ស។
លោកហូឡង់ប្រហែលពិបាកបញ្ចុះបញ្ចូល វ៉ាត់តារ៉ា ព្រោះថា លោកហូឡង់ត្រូវប្រឈមនឹងបញ្ហាមួយទៀតដែរ ក្នុងភាពជាដៃគូពាណិជ្ជកម្មជាមួយកូតឌីវ័រ។ ច្រើនខែមកនេះ ប្រធានាធិបតីកូតឌីវ័រ បានសុំអោយបារាំងលុបចោលបំណុលដែលកូតឌីវ័រជំពាក់បារាំង។ កន្លងមក បារាំងធ្លាប់ជួយលុបចោលបំណុលជិត១ពាន់លានអឺរ៉ូរួចហើយ។ សួរថា តើលោកហូឡង់អាចលុបបំណុលកូតឌីវ័របន្ថែមទៀតរឺទេ ព្រោះថា ក្នុងស្រុកបារាំងឯណោះវិញ រដ្ឋាភិបាលបារាំងក៏កំពុងជួបបញ្ហាចាយវាយថវិកាដែរ។
ប្រធានាធិបតីហូឡង់នឹងទៅនីហ្សេថ្ងៃសុក្រស្អែក ហើយបិទបញ្ចប់ទស្សនកិច្ចនៅឆាតថ្ងៃសៅរ៍។ បារាំងក៏កំពុងសម្លឹងប្រយោជន៍នៅនីហ្សេដូចគ្នាដែរ ព្រោះនីហ្សេសំបូរធនធានធម្មជាតិ។ នៅនីហ្សេ ក្រុមហ៊ុនបារាំងដូចជាក្រុមហ៊ុននុយក្លេអ៊ែរអារេវ៉ា កំពុងរកស៊ីផ្នែកមាស និងរ៉ែ។ ពេលនេះ បារាំងកំពុងសម្លឹងឃើញធនធានអ៊ុយរ៉ានីញ៉ូមក្រោមដីនៅនីហ្សេ។ ដូច្នេះ ទស្សនកិច្ចលោកហូឡង់មានសារៈសំខាន់ណាស់ សម្រាប់សេដ្ឋកិច្ចបារាំង។ ទស្សនកិច្ចនៅនីហ្សេ អាចរលូនជាងនៅកូតឌីវ័រ ឬក៏ឆាត ព្រោះថាលោកហូឡង់ និងប្រធានាធិបតីនីហ្សេ លោកម៉ាហាម៉ាឌូ អ៊ីស៊ូហ្វ៊ូ ជាមិត្តភក្តិ ស្និទ្ធស្នាលគ្នា។ មេដឹកនាំទាំង២នេះ ជាអ្នកនយោបាយសង្គមនិយមដូចគ្នាទៀតផង។
នៅប្រទេសឆាដ ថ្ងៃសៅរ៍ចុងសប្តាហ៍នេះវិញ លោកហូឡង់អាចឈឺក្បាលដោយសារបញ្ហាសិទ្ធិមនុស្សដែរ។ ទាហានឆាដធ្លាប់ចូលរួមបេសកកម្មការពារសន្តិសុខជាមួយកងកម្លាំងអាហ្វ្រិកចម្រុះមីស្កា នៅអាហ្វ្រិកកណ្តាល។ តែទាហានឆាដធ្លាប់រងការចោទប្រកាន់ពីគណៈកម្មការសិទ្ធិមនុស្សអង្គការសហប្រជាជាតិថា ថាបាញ់លើហ្វូងមនុស្សមិនរើសមុខ នៅក្រុងបង់ហ្គី អាហ្វ្រិកកណ្តាល កាលពីខែមិនា។ ដូច្នេះ ក្រុមប្រឆាំងឆាដជំទាស់ដាច់ខាតនឹងអន្តរាគមន៍យោធាឆាដនៅក្រៅប្រទេស។
ក្រុមប្រឆាំងនៅឆាដលើកឡើងទៀតថា ឆាដគ្មានប្រជាធិបតេយ្យ គ្មាននីតិរដ្ឋ។ ទន្ទឹមនេះដែរ ក្រុមប្រឆាំងឆាដ បរិហាររដ្ឋអំណាចរបស់ប្រធានាធិបតីដេប៊ី អ៊ីតណូ ផងដែរ ថារុញអោយប្រជាជនធ្លាក់ក្នុងភាពក្រីក្រ ងើបមិនរួច និងបានទុកអោយជនមួយចំនួនទាញយកផលចំណេញពីជាតិ ដាក់ហោប៉ៅផ្ទាល់ខ្លួន។ ក្រុមប្រឆាំងនៅឆាត ចង់អោយរដ្ឋាភិបាលបារាំងរបស់លោកហូឡង់ ដាក់សម្ពាធធ្ងន់លើប្រធានាធិបតីដេប៊ី អ៊ីតណូ ទាក់ទងការគ្រប់គ្រងសេដ្ឋកិច្ច និងការគោរពសិទ្ធិមនុស្សក្នុងស្រុក។
ពេលនេះ បារាំងកំពុងគិតគូរពីដំណើរការប្រតិបត្តិការប្រឆាំងភេរវកម្មនៅតំបន់សាហែល បារាំងត្រូវការប្រទេសនីហ្សេ និងឆាត ជាចាំបាច់ សម្រាប់ជាទីតាំងក្នុងយុទ្ធនាការនៅតំបន់សាហែល។ ដូច្នេះ បើទោះជាលោកហូឡង់លើកបញ្ហាសិទ្ធិមនុស្សមកនិយាយ ក៏ពិបាកនឹងនិយាយអោយបានអស់ពីមាត់ពីកដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ