ប្រធានសមាគមរោងចក្រ៖ ប្រាក់ឈ្នួលរបស់កម្មករកាត់ដេរនៅកម្ពុជាកើនឡើងលឿនពេក
ប្រធានសមាគមរោងចក្រកាត់ដេរនៅកម្ពុជា នៅថ្ងៃទី២៩ ខែមីនានេះ ក្នុងវេទិការាជរដ្ឋាភិបាល-ផ្នែកឯកជនលើកទី១៨ បានស្នើនៅចំពោះមុខលោកនាយករដ្ឋមន្ត្រី ហ៊ុន សែន ឲ្យមានការពិនិត្យលើការដំឡើងប្រាក់ឈ្នួលឲ្យកម្មកររោងចក្រកាត់ដេរ ដោយសារការដំឡើងប្រាក់ឈ្នួលអប្បបរមាមានការកើនឡើងលឿនពេកប្រៀបធៀបនឹងប្រទេសជិតខាង។ លោកនាយករដ្ឋមន្ត្រី ក៏បានឆ្លើយតបភ្លាមៗចំពោះសំណើរបស់សមាគមរោងចក្រកាត់ដេរនៅកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៧
លោក វ៉ាន់ ស៊ូអៀង ប្រធានសមាគមរោងចក្រកាត់ដេរនៅកម្ពុជា ហៅកាត់ថា GMAC នៅថ្ងៃទី២៩ ខែមីនានេះ បានស្នើឲ្យលោកនាយករដ្ឋមន្ត្រីហ៊ុន សែន ពិនិត្យលើការដំឡើងប្រាក់ឈ្នួលសម្រាប់កម្មករកាត់ដេរ ដោយសារក្នុងរយៈពេល៥ឆ្នាំចុងក្រោយ ប្រាក់ឈ្នួលអប្បបរមារបស់កម្ពុជាមានការកើនឡើងលឿនពេក។ ប្រាក់ឈ្នួលអប្បបរមារបស់កម្ពុជាខ្ពស់ជាងប្រទេសប្រកួតប្រជែង ដូចជាប្រទេសវៀតណាម ភូមា និងបង់ក្លាដេសជាដើម។
នៅក្នុងវេទិការាជរដ្ឋាភិបាល-ផ្នែកឯកជនលើកទី១៨នេះ លោក វ៉ាន់ ស៊ូអៀង ចង់ឲ្យរដ្ឋាភិបាលកម្ពុជាពិនិត្យលទ្ធភាពនៃការកំណត់ប្រាក់ឈ្នួលអប្បបរមាផ្សេងៗគ្នា សម្រាប់ខេត្ត និងតំបន់ផ្សេងគ្នានៅក្នុងប្រទេសកម្ពុជា។ លោកបន្តថាការកំណត់បែបនេះ នឹងជួយជំរុញការអភិវឌ្ឍន៍កាន់តែលឿននៅតាមតំបន់ជនបទនៅក្នុងប្រទេសកម្ពុជា។
ជាការឆ្លើយតប, លោកនាយករដ្ឋមន្ត្រីហ៊ុន សែន ស្នើឲ្យក្រសួងការងារគិតគូរពីវិធីសាស្ត្រក្នុងការគណនាប្រាក់ឈ្នួលអប្បបរមា និងប្រាក់ឈ្នួលអប្បបរមាតាមតំបន់ ហើយលោកនាយករដ្ឋមន្ត្រី ចង់ឲ្យមានការពិនិត្យពីការកំណត់ប្រាក់ឈ្នួលនៅតាមតំបន់ ដែលមិនទាន់មានរោងចក្រ ព្រោះបើពិនិត្យក្នុងតំបន់ដែលមានរោងចក្រស្រាប់នោះអាចនឹងមានផលប៉ះពាល់។
លោក អាត ធន់ ប្រធានសហភាពការងារកម្ពុជា បញ្ជាក់ថា ប្រធានសមាគមរោងចក្រកាត់ដេរនៅកម្ពុជាតែងតែមិនចង់ឲ្យមានការដំឡើងប្រាក់ឈ្នួលដល់កម្មករកាត់ដេរ ទោះបីជាគ្មានការគំរាមពីការដកហូតប្រព័ន្ធអនុគ្រោះពន្ធEBAក៏ដោយ។ លោកបន្ថែមថាការដំឡើងប្រាក់ឈ្នួលកន្លងមក គឺដោយសារតែការខិតខំតវ៉ារបស់កម្មករ និងសហជីព។
លោក អាត ធន់ ក៏បានបញ្ជាក់ដែរថាស្ថានភាពផ្ទៃដីប្រទេសកម្ពុជាខុសពីប្រទេសផ្សេងទៀតដូចជាវៀតណាមជាដើម ហើយស្ថានភាពចំណាយក៏មិនសូវខុសគ្នាពីតំបន់មួយទៅតំបន់មួយក្នុងប្រទេសកម្ពុជា ដូច្នេះការកំណត់ប្រាក់ឈ្នួលតាមតំបន់អាចនឹងមានបញ្ហាប៉ះពាល់ដល់កម្មករ។
សូមជម្រាបជូនថា ប្រាក់ឈ្នួលរបស់កម្មករកាត់ដេរកម្ពុជា ត្រូវបានដំឡើងពី១៧០ដុល្លារនៅឆ្នាំ២០១៨ ដល់១៨២ដុល្លារនៅឆ្នាំ២០១៩នេះ សម្រាប់កម្មករពេញសិទ្ធិ និង១៧៧ដុល្លារ សម្រាប់កម្មករនិយោជិតសាកល្បង។ ប្រាក់ឈ្នួលឆ្នាំ២០១៩នេះ មិនរាប់បញ្ចូលនូវប្រាក់អត្ថប្រយោជន៍ផ្សេងៗ ដែលកម្មករនិយោជិតធ្លាប់ទទួលបាននោះទេ។
លោក វ៉ាន់ ស៊ូអៀង ប្រធានសមាគមរោងចក្រកាត់ដេរនៅកម្ពុជា បញ្ជាក់ថាវិស័យកាត់ដេរ និងផលិតស្បែកជើងបានផ្តល់ការងារផ្ទាល់ដល់កម្មករប្រមាណ៧៥ម៉ឺននាក់ និងការនាំចេញក្នុងទំហំទឹកប្រាក់ប្រមាណ៩ពាន់លានដុល្លារនៅក្នុងឆ្នាំ២០១៨ ហើយក្នុងមួយឆ្នាំៗប្រាក់ឈ្នួលប្រមាណ២ពាន់លានដុល្លារត្រូវបានបើកទៅកម្មករក្នុងវិស័យនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ