ប្រធាន Wikileaks ដែលគេតាមប្រមាញ់ កំពុងស្ថិតនៅប្រទេសអង់គ្លេស
ប៉ូលិសអន្តរជាតិ (Interpol) បានចេញនិវេតក្រហម (Red Notice) តាមស្វែងរកលោកជូលៀន អាសាញ់ជ៍ (Julian Assange) ទៅតាមការស្នើសុំរបស់អាជ្ញាធរស៊ុយអែដ។ នៅថ្ងៃព្រហស្បតិ៍នេះ ប្រភពពីប៉ូលិសអង់គ្លេសឲ្យដឹងថា លោកអាសាញ់ជ៍ កំពុងស្ថិតក្នុងប្រទេសអង់គ្លេស។
ចុះផ្សាយនៅថ្ងៃ៖
បទវិភាគរបស់ សេង ឌីណា
លោកជូលៀន អាសាញ់ជ៍ (Julian Assange) ប្រធាន Wikileaks ដែលជាអ្នកទទួលខុសត្រូវក្នុងលេចធ្លាយឯកសារសម្ងាត់អាមេរិក កំពុងស្ថិតនៅប៉ែកខាងត្បូងប្រទេសអង់គ្លេស។ នេះបើយោងតាមកាសែតថៃមស៍ (Times) ដែលដកស្រង់សម្តីមន្រ្តីប៉ូលិសអង់គ្លេស។ ក៏ប៉ុន្តែ បើទោះជាដឹងទីកន្លែងលាក់ខ្លួនរបស់លោកអាសាញ់ជ៍ក៏ដោយ ក៏ប៉ូលិសអង់គ្លេសមិនបានចាប់ខ្លួន តាមការស្នើសុំរបស់អាជ្ញាធរស៊ុយអែដនោះដែរ។ ប៉ូលិសអង់គ្លេសបានលើកហេតុផលថា ដីការបស់ស៊ុយអែដមានចំណុចខុសឆ្គង។ នៅពេលនេះ ប៉ូលិសស៊ុយអែដបានប្រកាសថានឹងចេញដីកាថ្មីមួយទៀត បញ្ជូនឲ្យទៅប៉ូលិសអង់គ្លេស ដើម្បីចាប់ខ្លួនលោកអាសាញ់ជ៍។
គួរបញ្ជាក់ថា តុលាការស៊ុយអែដតាមចាប់ខ្លួនលោកអាសាញ់ជ៍ ដោយសង្ស័យពីបទល្មើសផ្លូវភេទ ពោលគឺ មិនជាប់ពាក់ព័ន្ធនឹងការចុះផ្សាយឯកសារសម្ងាត់របស់អាមេរិកនោះទេ។ មេធាវីរបស់លោកអាសាញ់ជ៍បានប្តឹងទៅតុលាការកំពូលស៊ុយអែដ ដើម្បីលុបដីកានេះចោលវិញ ក៏ប៉ុន្តែ បណ្តឹងនេះត្រូវបានតុលាការកំពូលបដិសេធចោល នៅថ្ងៃព្រហស្បតិ៍នេះ។
នៅអាមេរិកឯណោះវិញ អាជ្ញាធរអាមេរិកបានប្រកាសឲ្យដឹងថា គេកំពុងតែធ្វើការស៊ើបអង្កេត ទៅលើការលេចធ្លាយឯកសារសម្ងាត់ ដោយវែបសៃត៍ Wikileaks ។ អ្នកជំនាញផ្នែកច្បាប់ខ្លះយល់ថា អាមេរិកប្រហែលជាបានចេញដីកាតាមចាប់ខ្លួនលោកអាសាញ់ជ៍រួចទៅហើយ ក៏ប៉ុន្តែ មិនប្រកាសជាសាធារណៈ។
ការព្យាយាមចោទប្រកាន់ Wikileaks អំពីការចុះផ្សាយឯកសារសម្ងាត់ កំពុងតែជួបប្រទះនឹងបញ្ហាចម្រូងចម្រាស់ផ្លូវច្បាប់ នៅអាមេរិក។ អំពើរបស់ Wikileaks ស្ថិតនៅព្រំដែនរវាងការរំលោភច្បាប់ប្រឆាំងចារកិច្ច និងសិទ្ធិសេរីភាពក្នុងការបញ្ចេញមតិ ដែលធានាដោយរដ្ឋធម្មនុញ្ញអាមេរិក។ ប្រសិនបើចង់ធ្វើការចោទប្រកាន់លោកអាសាញ់ជ៍ពីបទចារកិច្ច អាមេរិកត្រូវរកភស្តុតាងបញ្ជាក់ឲ្យបានច្បាស់ថា គាត់គឺជាអ្នកលួចឯកសារសម្ងាត់យកមកចុះផ្សាយលើវែបសៃត៍ Wikileaks ពោលគឺ មិនមែនគ្រាន់តែទទួលឯកសារពីគេយកមកចុះផ្សាយនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ