តើហេតុអ្វីបានជាវិបត្តិនុយក្លេអ៊ែរនៅហ៊្វូគូស្ហ៊ីម៉ាផ្ទុះឡើងវិញនៅពេលនេះ?
ចុះផ្សាយនៅថ្ងៃ៖
ស្តាប់ - ០៤:១២
២ឆ្នាំកន្លះ ក្រោយរលកយក្សស៊ូណាមី វិបត្តិនុយក្លេអ៊ែរនៅហ៊្វូគូស្ហ៊ីម៉ានៅតែចោទជាបញ្ហា។ កាលពីខែមុន អាជ្ញាធរទទួលបន្ទុកសុវត្ថិភាពនុយក្លេអ៊ែរនៅជប៉ុន បានសម្រេចដំឡើងចំណាត់ថ្នាក់នៃវិបត្តិនុយក្លេអ៊ែរហ៊្វូគូស្ហ៊ីម៉ា ពីកម្រិតធ្ងន់ធ្ងរទី១ ទៅទី៣ ដែលមានន័យថា វិបត្តិនុយក្លេអ៊ែរនៅហ៊្វូគូស្ហ៊ីម៉ា នៅពេលនេះ កំពុងស្ថិតសភាពធ្ងន់ធ្ងរបំផុត ចាប់តាំងពីខែមីនា ឆ្នាំ២០១១មក។ តើហេតុអ្វីបានជាជាង២ឆ្នាំក្រោយរលកយក្សស៊ូណាមី វិបត្តិនៅហ៊្វូគូស្ហ៊ីម៉ាមិនធូរស្រាលតែបែរជាធ្លាក់ចុះកាន់តែធ្ងន់ធ្ងរទៅវិញ? តើអ្វីទៅដែលបង្កវិបត្តិនៅហ៊្វូគូស្ហ៊ីម៉ានៅពេលនេះ?
បញ្ហាដែលជប៉ុនកំពុងប្រឈមមុខនៅហ៊្វូគូស្ហ៊ីម៉ា នៅក្នុងពេលបច្ចុប្បន្ននេះ គឺការលេចធ្លាយទឹក ដែលមានធាតុវិទ្យុសកម្ម ចេញពីមជ្ឈមណ្ឌលនុយក្លេអ៊ែរ ហើយហូរចូលទៅក្នុងសមុទ្រ។
ដូចជាយើងដឹងស្រាប់ហើយថា វិបត្តិនុយក្លេអ៊ែរហ៊្វូគូស្ហ៊ីម៉ា បានផ្ទុះឡើងជាដំបូង កាលពីថ្ងៃទី១១ មីនា ២០១១ ដោយសារតែមានការរញ្ជួយដី និងរលកយក្សស៊ូណាមី។ គ្រោះធម្មជាតិនេះបានបង្កការខូចខាតដល់ប្រព័ន្ធបូមទឹកត្រជាក់នៅក្នុងមជ្ឈមមណ្ឌលនុយក្លេអ៊ែរ ជាហេតុធ្វើរ៉េអាក់ទ័រនុយក្លេអ៊ែរ ដែលត្រូវការទឹកត្រជាក់ជាប្រចាំ មានសីតុណ្ហភាពកើនឡើងខ្ពស់ រហូតធ្វើឲ្យរលាយស្នូល ដែលផ្ទុកសារធាតុនុយក្លេអ៊ែរ ហើយធ្វើឲ្យធាតុវិទ្យុសកម្មត្រូវលេចធ្លាយមកខាងក្រៅ។
ចាប់ពីពេលនោះមក ក្រុមហ៊ុន Tepco (Tokyo Electric Power Company) ដែលជាម្ចាស់មជ្ឈមណ្ឌលនុយក្លេអ៊ែរហ៊្វូគូស្ហ៊ីម៉ា បានប្រើបរិមាណទឹកត្រជាក់ប្រមាណជា ៤០០តោនក្នុងមួយថ្ងៃៗ ដើម្បីបញ្ចុះសីតុណ្ហភាពស្នូលរ៉េអាក់ទ័រ ហើយទឹកត្រជាក់ទាំងនេះត្រូវលាយឡំនឹងធាតុវិទ្យុសកម្ម ដែលលេចធ្លាយចេញពីស្នូលរ៉េអាក់ទ័រ។ នេះមានន័យថា នៅក្នុងមជ្ឈមណ្ឌលនុយក្លេអ៊ែរហ៊្វូគូស្ហ៊ីម៉ា ទឹកដែលមានធាតុវិទ្យុសកម្ម មានបរិមាណកើនឡើងជារៀងរាល់ថ្ងៃ ដោយក្នុងមួយថ្ងៃៗកើនឡើងប្រមាណជា ៤០០តោន ហើយទឹកដែលមានធាតុវិទ្យុសកម្មនេះ ត្រូវបានគេយកទៅស្តុកទុក ក្នុងធុងទឹកធំៗ រាប់ពាន់ធុង នៅក្នុងបរិវេណមជ្ឈមណ្ឌលនុយក្លេអ៊ែរ។
ក៏ប៉ុន្តែ បញ្ហាដែលចោទឡើង គឺនៅត្រង់ថា ធុងទឹកទាំងនេះមានគុណភាពមិនល្អ ជាហេតុធ្វើឲ្យទឹកដែលមានធាតុវិទ្យុសកម្មត្រូវលេចធ្លាយចេញពីធុង ជ្រាបចូលទៅដល់ប្រព័ន្ធទឹកក្រោមដី រួចហើយហូរចូលទៅក្នុងសមុទ្រ។ កាលពីខែមុន ក្រុមហ៊ុន Tepco បានឲ្យដឹងថា ទឹកដែលមានធាតុវិទ្យុសកម្មកម្រិតខ្ពស់ប្រមាណជា ៣០០តោន បានលេចធ្លាយចេញពីធុងស្តុកទឹក ហើយជ្រាបចូលទៅក្នុងប្រព័ន្ធទឹកក្រោមដី។
ថ្មីៗនេះទៀត គេមានការសង្ស័យថា ការលេចធ្លាយធាតុវិទ្យុសកម្មនេះ ប្រហែលជាមិនមែនកើតមានចេញពីធុងស្តុកទឹកនេះទេ ក៏ប៉ុន្តែ អាចលេចធ្លាយចេញពីបំពង់បង្ហូរទឹក ក្នុងអគាររ៉េអាក់ទ័រនុយក្លេអ៊ែរផងដែរ។
ការលេចធ្លាយធាតុវិទ្យុសកម្មក្នុងកម្រិតខ្ពស់បែបនេះ បានធ្វើឲ្យអាជ្ញាធរទទួលបន្ទុកផ្នែកសុវត្ថិភាពនុយក្លេអ៊ែរនៅជប៉ុន បានសម្រេចកាលពីខែមុន ដំឡើងចំណាត់ថ្នាក់វិបត្តិនុយក្លេអ៊ែរ ពីកម្រិតទី១ ឡើងទៅដល់កម្រិតទី៣។ ចំណាត់ថ្នាក់វិបត្តិនុយក្លេអ៊ែរទៅតាមបទដ្ឋានអន្តរជាតិ ដែលមានពីកម្រិតទី១ ទៅដល់ទី៧ (កម្រិតធ្ងន់ធ្ងរបំផុត)។
អ្វីដែលធ្វើឲ្យគេកាន់តែបារម្ភទៅទៀតនោះ គឺនៅត្រង់ថា តំបន់ហ៊្វូគូស្ហ៊ីម៉ាតែងតែមានការរញ្ជួយដីជារឿយៗ។ ដូច្នេះ កម្លាំងរញ្ជួយអាចនឹងធ្វើឲ្យធុងស្តុកទឹកមានធាតុវិទ្យុសកម្ម ដែលមិនសូវមានគុណភាពស្រាប់ អាចនឹងងាយខូចខាត បណ្តាលឲ្យលេចធ្លាយធាតុវិទ្យុសកម្មក្នុងទ្រង់ទ្រាយធំ។ ការរញ្ជួយដី កាលពីថ្ងៃពុធ បើទោះបីជាមិនបណ្តាលឲ្យមានការខូចខាតធ្ងន់ធ្ងរ វាគឺជាការដាស់អារម្មណ៍អាជ្ញាធរជប៉ុនឲ្យយកចិត្តទុកដាក់លើបញ្ហានេះ។
បញ្ហា ដែលជប៉ុនកំពុងប្រឈមមុខ នៅហ៊្វូគូស្ហ៊ីម៉ា នៅពេលនេះ គឺទីមួយ ស្វះស្វែងរកដំណោះស្រាយ ធ្វើយ៉ាងណាកុំឲ្យធាតុវិទ្យុសកម្ម ដែលលេចធ្លាយចេញពីមជ្ឈមណ្ឌលនុយក្លេអ៊ែរ ជ្រាបចូលទៅដល់ប្រព័ន្ធទឹកក្រោមដី។ ទីពីរ រំដោះទឹកដែលមានធាតុវិទ្យុសកម្ម ចេញពីមជ្ឈមណ្ឌលនុយក្លេអ៊ែរ ពីព្រោះថា រហូតមកទល់នឹងពេលនេះ សមត្ថភាពស្តុកទឹក នៅហ៊្វូគូស្ហ៊ីម៉ាត្រូវបានគេប្រើអស់ប្រមាណជា ៨៥%ហើយ។ រីឯបរិមាណទឹកមានធាតុវិទ្យុសកម្ម ចេះតែបន្តកើនឡើងរាប់រយតោន ក្នុងមួយថ្ងៃៗ។
ក្រុមហ៊ុន Tepco ដែលជាអ្នកធ្វើអាជីវកម្មមជ្ឈមណ្ឌលនុយក្លេអ៊ែរហ៊្វូគូស្ហ៊ីម៉ា ត្រូវទទួលរងនូវការរិះគន់ថា មានការធ្វេសប្រហែស ឬអសមត្ថភាព ក្នុងការដោះស្រាយវិបត្តិនុយក្លេអ៊ែរនេះ។ ហេតុដូច្នេះហើយបានជា រដ្ឋាភិបាលជប៉ុនបានប្រកាស កាលពីថ្ងៃអង្គារ ថារដ្ឋាភិបាលនឹងចេញមុខដោះស្រាយបញ្ហានេះដោយខ្លួនឯង ដោយគ្រោងចំណាយលុយប្រមាណជា ៤៧០លានដុល្លារ ដើម្បីសង់របាំងទប់កុំឲ្យធាតុវិទ្យុសកម្មលេចធ្លាយចូលទៅដល់ប្រព័ន្ធទឹកក្រោមដី។
ក៏ប៉ុន្តែ អ្នកជំនាញខាងនុយក្លេអ៊ែរជាច្រើនយល់ថា វិបត្តិនៅហ៊្វូគូស្ហ៊ីម៉ាពេលនេះ មានសភាពធ្ងន់ធ្ងរ ដែលរដ្ឋាភិបាលជប៉ុនគួរតែបង្កើតជាក្រុមការងារអន្តរជាតិ ដើម្បីជួយដោះស្រាយវិបត្តិនេះ។ គេក៏បានរិះគន់ផងដែរថា ជប៉ុនគួរតែបង្កើតក្រុមការងារអន្តរជាតិនេះជាយូរមកហើយ ក៏ប៉ុន្តែ រដ្ឋាភិបាលជប៉ុនមិនចង់ស្វះស្វែងរកជំនួយពីបរទេស ដោយសារតែខ្លាចបាក់មុខមាត់។ កន្លងមក គេឃើញថា ទាំងក្រុមហ៊ុន Tepco ទាំងអាជ្ញាធរជប៉ុន បានព្យាយាមធ្វើមិនដឹងមិនឮ និងមិនទទួលស្គាល់ អំពីភាពធ្ងន់ធ្ងរនៃវិបត្តិនុយក្លេអ៊ែរ ដែលគេត្រូវប្រឈមមុខ នៅហ៊្វូគូស្ហ៊ីម៉ានេះទេ។
ការសម្រេចរបស់អាជ្ញាធរទទួលបន្ទុកសុវត្ថិភាពនុយក្លេអ៊ែរ ក្នុងការដំឡើងកម្រិតធ្ងន់ធ្ងរនៃវិបត្តិនៅហ៊្វូគូស្ហ៊ីម៉ា ពីទី១ ទៅទី៣ និងការប្រកាសរបស់រដ្ឋាភិបាលជប៉ុន កាលពីថ្ងៃអង្គារ ដែលទទួលស្គាល់នូវសភាពធ្ងន់ធ្ងរនៃវិបត្តិនុយក្លេអ៊ែរនេះ គឺជាការវិវឌ្ឍមួយ ក្នុងទិសដៅវិជ្ជមាន នៃឥរិយាបថរបស់អាជ្ញាធរជប៉ុន ចំពោះវិបត្តិនៅហ៊្វូគូស្ហ៊ីម៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ