ហេតុអ្វីបានជាទស្សនកិច្ចរបស់ប្រធានាធិបតីប៉ាគីស្ថាន នៅឥណ្ឌាសំខាន់?
ចុះផ្សាយនៅថ្ងៃ៖
ស្តាប់ - ០៧:៣៤
ប្រធានាធិបតីប៉ាគីស្ថានលោក Asif Ali Zardari បានធ្វើដំណើរទៅដល់ទីក្រុងញូវដេលី នៅថ្ងៃអាទិត្យទី៨ មេសា ២០១២។ តាមកម្មវិធី លោកនឹងទទួលទានអាហារថ្ងៃត្រង់ជាមួយនាយករដ្ឋមន្រ្តីឥណ្ឌា លោកManmohan Singh មុនធ្វើដំណើរទៅវិហារសាសនាអ៊ីស្លាម ដ៏ល្បីឈ្មោះ ដែលស្ថិតនៅមិនឆ្ងាយប៉ុន្មានពីរដ្ឋធានីឥណ្ឌា។ ទស្សនកិច្ចបានបង្ហាញពីការងាកចូលជិតគ្នាវិញរវាងប្រទេសគូសត្រូវជាប្រវត្តិសាស្រ្តទាំងពីរ។
ក្នុងរយៈពេល ៧ឆ្នាំចុងក្រោយនេះ លោក Asif Ali Zardariជាប្រមុខរដ្ឋប៉ាគីស្ថានទីមួយដែលបានធ្វើដំណើរទៅប្រទេស ឥណ្ឌា។ ដំណើរទស្សនកិច្ចចុងក្រោយរបស់ប្រមុខរដ្ឋប៉ាគីស្ថាន នៅឥណ្ឌា ធ្វើឡើង នៅឆ្នាំ ២០០៥ ដែលពេលនោះ នាយករដ្ឋមន្រ្តីឥណ្ឌាបានអញ្ជើញលោកPervez Musharraf ជាប្រធានាធិបតីប៉ាគីស្ថាន ឲ្យទៅទស្សនាការប្រកួតកីឡា Cricket រវាងប្រទេសទាំងពីរក្នុងទីក្រុងញូវដេលី។
ទាំងភាគីឥណ្ឌា និងប៉ាគីស្ថានបាននិយាយថា ទស្សនកិច្ចរបស់ប្រធានាធិបតីប៉ាគីស្ថាន Asif Ali Zardariនៅប្រទេសឥណ្ឌា ធ្វើឡើងក្នុងលក្ខណៈឯកជន។ ជំនួបក្នុងរយៈពេលមួយថ្ងៃ គេមិនរំពឹងទេ ថា ថ្នាក់ដឹកនាំប៉ាគីស្ថាន និងឥណ្ឌា នឹង លើកយកជម្លោះព្រំដែនដ៏រសើបនៅCachemire មកនិយាយ ព្រោះថា រឿងទាំងអស់នេះអាចបំពុលបរិយាកាស បំពុលការខិតខំប្រឹងប្រែងរកសន្តិភាពដែលប៉ាគីស្ថាន និងឥណ្ឌាបានរួមគ្នាធ្វើរហូតមក។
គួរដឹងថា ជម្លោះព្រំដែននៅCachemire បានធ្វើឲ្យប្រទេសទាំងពីរដែលមានអាវុធនុយក្លេអ៊ែររៀងខ្លួន ប្រយុទ្ធគ្នាដណ្តើមគ្នាគ្រប់គ្រងអស់ ជាង ៦០ឆ្នាំមកហើយនោះ។
ចំណុចមួយដែលធ្វើឲ្យប្រមុខដឹកនាំរដ្ឋទាំងពីរងាយនិយាយឲ្យ ត្រូវគ្នា គឺបញ្ហាសេដ្ឋកិច្ច។ បើទោះជាប្រទេសទាំងពីរនៅងាយផ្ទុះសង្រ្គាមដាក់គ្នា គឺភ្នែកទល់ភ្នែក ធ្មេញទល់ធ្មេញខាងផ្នែកនយោបាយការពារទឹកដី ប៉ុន្តែ ប្រទេសទាំងពីរនៅតែបន្តទំនាក់ទំនងសេដ្ឋកិច្ចជាមួយគ្នា។ ត្រូវដឹងថា ចាប់តាំងពីឆ្នាំ ១៩៩៦ ឥណ្ឌាបានចាត់ទុកប៉ាគីស្ថានជាប្រទេសដៃគូសេដ្ឋកិច្ចសំខាន់មួយក្នុង តំបន់។ ប៉ាគីស្ថានវិញទើបកំណត់ កាលពីឆ្នាំ មុន ថា ឥណ្ឌាជាដៃគូសេដ្ឋកិច្ចសំខាន់ដែរ ហើយ ប៉ាគីស្ថានបានសម្រេចកាត់បន្ថយមុខទំនិញដែលខ្លួនធ្លាប់ហាមមិនឲ្យ នាំចូលពីឥណ្ឌា កាលពីមុនមក។ មើលទៅ ប្រទេសទាំងពីរចង់ជំរុញការដោះដូរពាណិជ្ជកម្មនៅតាមតំបន់ជាប់ព្រំដែន ដែលឥណ្ឌា និងប៉ាគីស្ថានមានជាមួយគ្នា ជាង៣០០០គីឡូម៉ែត្រ។
វត្តមានរបស់ប្រធានាធិបតីប៉ាគីស្ថាននៅឥណ្ឌា គឺជាព្រឹត្តិការណ៍មួយសំខាន់ ព្រោះវាធ្វើឡើង ក្នុងកាលៈទេសៈ ដែលប៉ុន្មានថ្ងៃនេះ ឥណ្ឌា និងអាមេរិកបានទាមទារឲ្យគេចាប់ Mohammad Saeed មេដឹកនាំសាសនាអ៊ីស្លាម ដ៏មានប្រជាប្រិយភាពម្នាក់ ក្នុងប្រទេសប៉ាគីស្ថាន។ អាមេរិក និងឥណ្ឌាចោទ Mohammad Saeed ថា ជាមេគំនិតរៀបចំអំពើភេរវកម្ម នៅទីក្រុងប៊ុមបៃ ដែលបានសម្លាប់មនុស្ស ១៦៦នាក់ កាលពីឆ្នាំ ២០០៨។ ឥណ្ឌាចោទក្រុមភេរវជនមកពីប៉ាគីស្ថានថា ជាអ្នកបង្កឡើង ហើយថា ក្រុមនេះ បានទទួលជំនួយគាំទ្រពីក្រសួងស៊ើបការណ៍សម្ងាត់ប៉ាគីស្ថាន។ អាមេរិកវិញដែលមានប្រជាជនរបស់ខ្លួន ៦នាក់ស្លាប់ នៅក្នុងអំពើភេរវកម្មក៏ទើបបានប្រកាសឲ្យថ្លៃក្បាល Mohammad Saeed ១០ម៉ឺន។
ការប្រកាសរបស់ក្រសួងយុត្តិធម៌អាមេរិកកំណត់ថ្លៃមេភេរវជន Mohammad Saeedបានធ្វើឲ្យប្រជាជនប៉ាគីស្ថានផ្ទុះកំហឹង និងដុតទង់ជាតិអាមេរិក នៅក្នុងទីក្រុង និងខេត្តប៉ាគីស្ថាន កាលពីថ្ងៃសុក្រ។ អាជ្ញាធរប៉ាគីស្ថានវិញបានទាមទារឲ្យឥណ្ឌាបង្ហាញភស្តុតាងដែលបង្ហាញ ថា Mohammad Saeed ជាមេចលនាអ៊ីស្លាមជ្រុលនិយមlashka e tayba ដែលបានរៀបចំផែនការបង្កអំពើភេរវកម្ម នៅទីក្រុងប៊ុមបៃ។
គ្មានការសហការពីអាជ្ញាធរប៉ាគីស្ថាន គេមិនដឹងថា តើអាមេរិក និងឥណ្ឌាអាចនឹងចាប់ខ្លួន Mohammad Saeedបានដោយវិធីណាទេ។ ក្នុងប្រទេសប៉ាគីស្ថាន មេដឹកនាំសាសនាអ៊ីស្លាមជាតិអេហ្ស៊ីបរូបនេះល្បីឈ្មោះ។ គាត់បានទទួលការគាំទ្រពីប្រជាជន និងពីរដ្ឋាភិបាលប៉ាគីស្ថាន ដោយមកពីគាត់បានបង្កើតមជ្ឈមណ្ឌលសប្បុរសមួយជួយយុវជនប៉ាគីស្ថានឲ្យ រួចផុតពីគ្រោះអត់ការងារធ្វើ។ ក្នុងប្រទេសប៉ាគីស្ថាន Mohammad Saeedធ្វើដំណើរដោយមានសេរីភាព ដោយចូលរួមក្នុងកិច្ចប្រជុំជាមួយទាហានប៉ាគីស្ថាន ដោយសារគាត់មានឋានៈជាសមាជិកមួយដែររបស់ក្រុមប្រឹក្សាយោធាប៉ាគីស្ថាន។
ច្បាប់អន្តរជាតិមិនបានហាម មិនឲ្យអាមេរិកកំណត់ថ្លៃក្បាលភេរវជនដែលខ្លួនចង់ចាប់នោះទេ ប៉ុន្តែ ច្បាប់អន្តរជាតិមិនអនុញ្ញាតឲ្យអាមេរិកមានសិទ្ធិស្របច្បាប់ដើម្បី ចាប់ជនសង្ស័យណានៅលើទឹកដីប្រទេសដទៃដែរ។ ប៉ុន្តែបើអាមេរិកចង់ចាប់ហើយ គឺគ្មានអ្វីដែលថា មិនអាចធ្វើទៅបាននោះទេ។ ដូចក្នុងករណីអូសាមា បិនឡាដិន អាមេរិកបានប្រើកងកុម៉្មង់ដូរពិសេសចូលទៅចាប់មេបណ្តាញភេរវជនអាល់កៃដា រូបនេះ ដល់ផ្ទះដែលស្ថិត ក្បែររដ្ឋធានី អ៊ីស្លាម៉ាបាត ទាំងមិនឲ្យអាជ្ញាធរប៉ាគីស្ថានបានដឹងផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ