ការសម្លាប់រង្គាលនៅស៊ីរី៖ សហគមន៍អន្តរជាតិបានត្រឹមថ្កោលទោស តែគ្មានដំណោះស្រាយ
របាយការណ៍អំពីការសម្លាប់រង្គាល នៅក្នុងភូមិ Treimsa ប្រទេសស៊ីរី កំពុងតែធ្វើឲ្យសហគមន៍អន្តរជាតិផ្ទុះកំហឹង។ ក៏ប៉ុន្តែ គេហាក់ដូចជាមិនឃើញមានសញ្ញានៃដំណោះស្រាយណាមួយ ដើម្បីបញ្ចប់វិបត្តិ ១៦ខែនេះនៅឡើយទេ។ រុស្ស៊ីនៅតែបន្តជំទាស់នឹងសេចក្តីព្រាងសេចក្តីសម្រេចរបស់ក្រុមប្រឹក្សាសន្តិសុខ ដែលគំរាមដាក់ទណ្ឌកម្មលើស៊ីរី បើសិនជាមិនដកគ្រឿងសព្វាវុធធុនធ្ងន់ចេញពីទីក្រុង និងទីប្រជុំជនរបស់ក្រុមប្រឆាំង។
ចុះផ្សាយនៅថ្ងៃ៖
ស្តាប់ - ០៥:១២
ព័ត៌មានអំពីហេតុការណ៍ នៅ Treimsa ត្រូវបានរាយការណ៍ខុសៗគ្នា ទាំងមូលហេតុ និងចំនួនអ្នកស្លាប់។ យោងតាមក្រុមប្រឆាំង ចំនួនអ្នកស្លាប់ នៅ Treimsa មានចំនួនពី ១០០ ទៅ ២០០នាក់ ហើយថាភាគច្រើនជាជនស៊ីវិល។ ចំណែករដ្ឋាភិបាលរបស់លោកអាសាដវិញ បានផ្តល់តួលេខអ្នកស្លាប់តិចជាងនេះ ហើយអះអាងថា ប្រតិបត្តិការយោធានៅ Treimsa គឺជាប្រតិបត្តិការបោសសម្អាត “ក្រុមភេរវជន”។
ក៏ប៉ុន្តែ ក្រុមអ្នកសង្កេតការណ៍របស់អ.ស.ប. ដែលកំពុងឈរជើង នៅក្នុងប្រទេសស៊ីរី បានរាយការណ៍ថា ទាហានរដ្ឋាភិបាលបានបាញ់ផ្លោងចូលទៅលើភូមិ Treimsa ដោយប្រើអាវុធធុនធ្ងន់ រួមមាន រថក្រោះ កាំភ្លើងធំ និងឧទ្ធម្ភាចក្រចម្បាំង (ធុន Mi-24 ផលិតនៅរុស្ស៊ី)។ នៅក្នុងលិខិតផ្ញើទៅក្រុមប្រឹក្សាសន្តិសុខ លោកកូហ្វ៊ី អាណាន់ ប្រេសិតពិសេសរបស់អ.ស.ប.-សម្ព័ន្ធអារ៉ាប់ បានចាត់ទុកការប្រើអាវុធធុនធ្ងន់បាញ់ផ្លោងទៅលើទីប្រជុំជននេះថាជាការរំលោភទៅលើសេចក្តីសម្រេចរបស់ក្រុមប្រឹក្សាសន្តិសុខ និងការសន្យារបស់រដ្ឋាភិបាលស៊ីរីខ្លួនឯង។
មេដឹកនាំប្រទេសធំៗជាច្រើនបាននាំគ្នាថ្កោលទោសការសម្លាប់រង្គាល នៅ Treimsa នេះ។ លោកបាន គីមូន អគ្គលេខាធិការអ.ស.ប. បានជំរុញឲ្យក្រុមប្រឹក្សាសន្តិសុខចាត់វិធានការជាបន្ទាន់ ដើម្បីបញ្ចប់អំពើហិង្សានៅស៊ីរី ដោយបានសង្កត់ធ្ងន់ថា ប្រសិនបើក្រុមប្រឹក្សាសន្តិសុខមិនធ្វើអ្វីសោះទេនោះ គឺប្រៀបដូចជាបើកដៃឲ្យមានការសម្លាប់រង្គាលជនស៊ីវិលតាមអំពើចិត្ត។
ក៏ប៉ុន្តែ រហូតមកទល់ពេលនេះ ការចរចានៅក្រុមប្រឹក្សាសន្តិសុខនៅតែបន្តជាប់គាំង។ បារាំង អង់គ្លេស អាមេរិក ព័រទុយហ្កាល់ និងអាល្លឺម៉ង់ បានស្នើឲ្យក្រុមប្រឹក្សាអនុម័តសេចក្តីសម្រេចមួយ ដោយដាក់កំហិតឲ្យរដ្ឋាភិបាលស៊ីរីអនុវត្តផែនការសន្តិភាព ៦ចំណុចរបស់លោកកូហ្វ៊ី អាណាន់ ក្នុងរយៈពេលយ៉ាងយូរបំផុត ១០ថ្ងៃ បើមិនដូច្នោះទេនឹងត្រូវទទួលទណ្ឌកម្ម។ ក៏ប៉ុន្តែ រុស្ស៊ីជំទាស់មិនឲ្យមានចែងអំពីទណ្ឌកម្មនេះ បើទោះជាមិនមែនជាទណ្ឌកម្មតាមផ្លូវយោធាក៏ដោយ។
លោកហ្វ្រង់ស័រ ហូឡង់ ប្រធានាធិបតីបារាំង បានអំពាវនាវដល់រុស្ស៊ី និងចិនឲ្យឈប់រារាំងការដាក់ទណ្ឌកម្មលើរបបដឹកនាំស៊ីរី ដែលកំពុងតែប្រើកម្លាំងសម្លាប់ប្រជាជនខ្លួនឯង។
រុស្ស៊ីក៏បានប្រកាសថ្កោលទោសការសម្លាប់រង្គាល នៅ Treimsa ដែរ ក៏ប៉ុន្តែ ហាក់ដូចជាបង្កប់នូវការទម្លាក់ការទទួលខុសត្រូវទៅលើក្រុមប្រឆាំងទៅវិញ។
ក្រុមប្រឆាំងស៊ីរីបានចេញសេចក្តីប្រកាសមួយ កាលពីល្ងាចថ្ងៃសុក្រ ថា ពួកគេលែងមានទំនុកចិត្តលើបេសកកម្មរបស់លោកកូហ្វ៊ី អាណាន់ ទៀតហើយ។ ចាប់ពីពេលនេះទៅ ក្រុមប្រឆាំងនឹងបញ្ឈប់ការទាក់ទងទាំងអស់ជាមួយលោកកូហ្វ៊ី អាណាន់ ហើយទាមទារឲ្យអ.ស.ប. និងសម្ព័ន្ធអារ៉ាប់បញ្ចប់បេសកកម្មរបស់លោកកូហ្វ៊ី អាណាន់ នៅស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ