ការរាតត្បាតនៃមេរោគ Ebola កំពុងបង្កក្តីបារម្ភយ៉ាងខ្លាំងនៅទូទាំងពិភពលោក
ចុះផ្សាយនៅថ្ងៃ៖
ស្តាប់ - ០៦:២៤
មេរោគ Ebola ដែលកំពុងរាតត្បាតនៅតាមប្រទេសក្នុងតំបន់អាហ្វ្រិក កំពុងបង្កក្តីបារម្ភកាន់តែខ្លាំងដល់អ្នកជំនាញខាងផ្នែកសុខាភិបាល នៅទូទាំងពិភពលោក។ អង្គការគ្រូពេទ្យគ្មានព្រំដែនបានទាញសញ្ញាអាសន្នថា ការរាតត្បាតនៃមេរោគ Ebola នៅក្នុងពេលបច្ចុប្បន្ននេះ មានសភាពធ្ងន់ធ្ងរបំផុត ដែលគេមិនធ្លាប់ឃើញពីមុន ហើយថា វាអាចនឹងមានសភាពកាន់តែធ្ងន់ធ្ងរជាងនេះទៅទៀត រហូតគ្រប់គ្រងលែងបាន។ បណ្តាប្រទេសនៅអឺរ៉ុប និងអាស៊ី ក៏កំពុងតែបង្កើនការប្រុងប្រយ័ត្នខ្ពស់ផងដែរ ដើម្បីត្រៀមទប់ទល់នឹងមេរោគដ៏កាចសាហាវនេះ។
រដ្ឋាភិបាលលីបេរីយ៉ា ដែលជាប្រទេសកំពុងរងគ្រោះខ្លាំងដោយមេរោគ Ebola បានសម្រេច កាលពីថ្ងៃពុធ បិទទ្វារសាលារៀននៅទូទាំងប្រទេស ហើយមន្រ្តីរដ្ឋការដែលមិនចាំបាច់មួយចំនួនត្រូវបានដាក់ឲ្យឈប់សម្រាក រយៈពេល ៣០ថ្ងៃ។
នៅសៀរ៉ាឡេអូនវិញ ប្រធានាធិបតីទើបនឹងបានប្រកាសនៅថ្ងៃព្រហស្បតិ៍នេះ ដាក់ប្រទេសឲ្យស្ថិតក្នុងភាពអាសន្ន ដោយសារតែការរាតត្បាតនៃមេរោគ Ebola។ លោក Ernest Bai Koroma ប្រធានាធិបតីសៀរ៉ាឡេអូនក៏បានប្រកាសផងដែរថាលោកបានសម្រេចលុបចោល ដំណើរទៅចូលរួមក្នុងជំនួបកំពូល រវាងមេដឹកនាំអាហ្វ្រិក និងលោកអូបាម៉ា ដែលនឹងត្រូវបើកធ្វើនៅរដ្ឋធានីវ៉ាស៊ីងតោន នៅសប្តាហ៍ក្រោយ។
គួរបញ្ជាក់ថា មេរោគ Ebola ចាប់ផ្តើមរាលដាលដំបូង កាលពីខែមីនា ចេញពីប្រទេសហ្គីណេ (អាហ្វ្រិកខាងលិច) ហើយបន្ទាប់មក ក៏បានរាលដាលបន្តិចម្តងៗ ទៅកាន់ប្រទេសដែលនៅជិតខាង។ គិតមកត្រឹមពេលនេះ មានប្រទេសចំនួន ៣ ដែលកំពុងទទួលរងការរាតត្បាតនៃមេរោគ Ebola គឺមានហ្គីណេ លីបេរីយ៉ា និងសៀរ៉ាឡេអូន។ នៅនីហ្សេរីយ៉ាក៏គេរកឃើញមានករណីឆ្លងមេរោគ Ebola នេះមួយដែរ ក៏ប៉ុន្តែ គេមិនឃើញមានករណីឆ្លងរាលដាលទៅមនុស្សផ្សេងទៀតទេ។
អ្នកឆ្លងមេរោគ Ebola មានអត្រាស្លាប់ខ្ពស់រហូតដល់ទៅ ៩០%
យោងតាមអង្គការសុខភាពពិភពលោក គិតមកទល់នឹងថ្ងៃទី៣១កក្កដានេះ គេរកឃើញមានមនុស្ស ១ ៣២៣នាក់ ដែលបានឆ្លងមេរោគ Ebola ហើយក្នុងនោះ មាន ៧២៩នាក់ត្រូវស្លាប់ ពោលគឺ អត្រានៃការឆ្លងហើយស្លាប់ដោយមេរោគ Ebola នេះ មានរហូតដល់ទៅជាង ៥០%។ ក៏ប៉ុន្តែ បើតាមអង្គការគ្រូពេទ្យគ្មានព្រំដែន មេរោគ Ebola ដែលកំពុងរាតត្បាតនៅអាហ្វ្រិកខាងលិចនៅពេលនេះ អាចមានអត្រានៃការស្លាប់រហូតដល់ទៅ ៩០% ឯណោះ ពោលគឺ វាជាមេរោគដ៏កាចសាហាវបំផុតនៅលើពិភពលោក។
យោងតាមអ្នកជំនាញខាងមេរោគ Ebola អត្រានៃការស្លាប់ដោយមេរោគនេះអាចត្រូវកាត់បន្ថយបានច្រើន ប្រសិនបើអ្នកជំងឺប្រញាប់ប្រញាល់ទៅមន្ទីរពេទ្យ ដើម្បីស្វែងរកការព្យាបាលឲ្យបានឆាប់។ ក៏ប៉ុន្តែ បញ្ហាចោទ គឺនៅត្រង់ថា រោគសញ្ញានៃជំងឺ Ebola នេះ ពិបាកនឹងកំណត់ច្បាស់លាស់។ បើតាមអង្គការសុខភាពពិភពលោក អ្នកកើតជំងឺ Ebola អាចមានរោគសញ្ញាស្រដៀងទៅនឹងជំងឺជាច្រើនផ្សេងទៀត ដូចជា មានការគ្រុនក្តៅដូចគ្រុនចាញ់ ឬគ្រុនពោះវៀន ឬមានការរាគក្អួត ដូចជំងឺរាគរូស ជាដើម ដែលអាចនាំឲ្យអ្នកជំងឺមិនដឹងថាខ្លួនឆ្លងមេរោគ Ebola ហើយមិនរូតរះទៅមន្ទីរពេទ្យ។
មេរោគ Ebola ឆ្លងពីមនុស្សទៅមនុស្ស តែមិនឆ្លងតាមខ្យល់ដង្ហើម
មេរោគ Ebola ត្រូវបានគេរកឃើញដំបូង កាលពីឆ្នាំ១៩៧៦ នៅសាធារណរដ្ឋប្រជាធិបតេយ្យកុងហ្គោ។ មេរោគនេះមានប្រភពដើមចេញពីសត្វជ្រឹងមួយប្រភេទនៅអាហ្វ្រិក បន្ទាប់មកវាឆ្លងទៅសត្វផ្សេងៗទៀត រហូតឆ្លងទៅដល់មនុស្ស ហើយរាលដាលកាន់តែខ្លាំង តាមរយៈការឆ្លងពីមនុស្សទៅមនុស្ស។ រហូតមកទល់នឹងពេលនេះ គេមិនទាន់រកឃើញវ៉ាក់សាំង ដើម្បីបង្ការមេរោគនេះនៅឡើយទេ។
មេរោគ Ebola ឆ្លងពីមនុស្សទៅមនុស្សតាមរយៈការប៉ះពាល់អ្នកជំងឺដោយផ្ទាល់ ឬប៉ះពាល់កំហាក ឈាម កម្អួតរបស់អ្នកជំងឺ ប៉ុន្តែ មិនមានការឆ្លងតាមខ្យល់ដង្ហើមទេ។ នេះជាចំណុចសំខាន់ ដែលក្រុមអ្នកជំនាញខាងមេរោគ Ebola កំពុងតែព្យាយាមផ្សព្វផ្សាយ ជាពិសេស ដល់ប្រជាជន នៅក្នុងតំបន់អាហ្វ្រិកខាងលិច ដែលកំពុងប្រឈមមុខនឹងការរាតត្បាតនៃមេរោគ Ebola ពីព្រោះ គេមើលឃើញថា ប្រជាជននៅក្នុងប្រទេសអស់ទាំងនេះកំពុងតែនាំគ្នាភ័យខ្លាចខ្លាំង ដោយពួកគេគិតថា មេរោគ Ebola អាចឆ្លងតាមខ្យល់ដង្ហើម ដោយគ្រាន់តែនៅក្បែរ ឬនៅក្នុងបន្ទប់ ឬអគារជាមួយអ្នកជំងឺ។ ការភ័យខ្លាចជ្រុលហួសហេតុបែបនេះជាហេតុផលចម្បងមួយ ដែលធ្វើឲ្យគេពិបាកទប់ស្កាត់ការរីករាលដាលនៃមេរោគ Ebola ពីព្រោះថា អ្នកខ្លះដែលបានឆ្លងមេរោគ Ebola ដោយមានរោគសញ្ញាជាអាការៈគ្រុនក្តៅ រាគ ឬក្អួត ក៏ប៉ុន្តែ ចេះតែអល់អែកមិនហ៊ានទៅមន្ទីរពេទ្យ ក៏មិនដឹងខ្លួនថាមានជំងឺ Ebola មិនបានទទួលការព្យាបាល និងមិនអាចបង្ការការឆ្លងរាលដាលទៅអ្នកដទៃទៀត។
អឺរ៉ុប និងអាស៊ីកំពុងបង្កើនការប្រុងប្រយ័ត្នចាំទប់ទល់នឹងមេរោគ Ebola
បើយោងតាមអ្នកជំនាញខាងផ្នែកសុខាភិបាល មេរោគ Ebola ដែលកំពុងរាតត្បាតនៅអាហ្វ្រិកខាងលិច នៅពេលនេះ អាចនឹងឆ្លងទៅដល់តំបន់ផ្សេងៗទៀត ទាំងនៅអឺរ៉ុប និងអាស៊ី ជាពិសេស ឆ្លងតាមរយៈអ្នកធ្វើដំណើរតាមយន្តហោះ។ ហេតុដូច្នេះហើយបានជាប្រទេសជាច្រើនទាំងនៅអឺរ៉ុប និងអាស៊ី កំពុងតែចាប់ផ្តើមដាក់វិធានការតាមដានមើលអ្នកដំណើរពីតំបន់អាហ្វ្រិក ខាងលិច ដែលមានរោគសញ្ញាប្រហាក់ប្រហែលនឹងរោគសញ្ញា Ebola ដើម្បីស្ទាក់ចាប់ករណី Ebola ដំបូងឲ្យបានទាន់ពេល ដើម្បីបង្កាកុំឲ្យឆ្លងរាលដាលនៅក្នុងប្រទេសរបស់គេ។
អង្គការអាកាសចរណ៍ស៊ីវិលអន្តរជាតិក៏កំពុងតែពិភាក្សាជាមួយអ្នក ជំនាញខាងមេរោគ Ebola នេះដែរ ដើម្បីសិក្សាអំពីវិធានការដែលគេអាចអនុវត្ត ចំពោះក្រុមហ៊ុនអាកាសចរណ៍ ឬនៅតាមព្រលានយន្តហោះអន្តរជាតិ ដើម្បីបង្ការការរីករាលដាលនៃមេរោគ Ebola ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ