សន្តិភាពយេម៉ែនពិបាកនឹងកើតមាន ក្រោយក្រុមឧទ្ទាមហ៊ូទីទាត់ចោលសំណើអង្គការសហប្រជាជាតិ
ចុះផ្សាយនៅថ្ងៃ៖
ស្តាប់ - ០៤:១១
សុខសន្តិភាពនៅយេម៉ែន ប្រហែលជាមិនអាចកើតមាន តាមការចង់បានរបស់ប្រជាជនយេម៉ែនទេ។ ថ្ងៃអាទិត្យកន្លងទៅ ខណៈរដ្ឋាភិបាលយេម៉ែន ប្រកាសទទួលយកសំណើសន្តិភាព របស់អង្គការសហប្រជាជាតិ ក្រុមឧទ្ទាមហ៊ូទី និងក្រុមគាំទ្រអតីតប្រធានាធិបតីសាឡេ បានទាត់ចោលសំណើនេះទាំងស្រុង។ សង្គ្រាមនៅតែបន្ត ការចរចារវាងក្រុមជម្លោះដែលបានធ្វើឡើងកាលពីខែសីហា នៅកូវ៉ែត គ្មានអ្វីវិវត្តន៍ទៅមុខឡើយ។
ក្រុមជម្លោះក្នុងវិបត្តិសង្គ្រាមយេម៉ែន សុទ្ធតែរឹងក្បាលដូចគ្នា បើភាគីម្ខាងបន្ទន់ជំហរ ម្ខាងទៀតរឹងរូសភ្លាម។ ក្រុមរដ្ឋាភិបាលកាន់អំណាចដែលសហគមន៍អន្តរជាតិ ទទួលស្គាល់ គឺរដ្ឋាភិបាលភៀសខ្លួន របស់ប្រធានាធិបតី ម៉ាន់សួ ហាឌី។ កាលពីថ្ងៃអាទិត្យ រដ្ឋាភិបាលលោកហាឌី សុខចិត្តទទួលយកសំណើសន្តិភាពរបស់អង្គការសហប្រជាជាតិ។ ប៉ុន្តែ ថ្ងៃអាទិត្យដដែល សំណើសន្តិភាពត្រូវបានទាត់ចោល ដោយភាគីក្រុមឧទ្ទាមហ៊ូទី និងកងកម្លាំងដែលគាំទ្រអតីតប្រធានាធិបតី អាប់ដាឡា សាឡេ។
គួររំលឹកឡើងវិញថា ក្រុមប្រឹក្សាសន្តិសុខអង្គការសហប្រជាជាតិបានចេញសេចក្តីសម្រេចលេខ២២១៦ ចែងអោយ ក្នុងពេល៤៥ថ្ងៃទៅមុខ ក្រុមឧទ្ទាមហ៊ូទី ត្រូវដកថយពីតំបន់ដែលខ្លួនកាន់កាប់បានតាំងពីឆ្នាំ២០១៤។ អ.ស.បស្នើអោយក្រុមឧទ្ទាមប្រគល់អាវុធធុនធ្ងន់ទៅអោយកងទ័ព ស្នើអោយមានការបញ្ឈប់ការឡោមព័ទ្ធទីក្រុងនានា និងសុំអោយដោះលែងអ្នកទោសទាំងសងខាងផងដែរ។
សំណើអ.ស.ប ត្រូវចិត្តរដ្ឋាភិបាលលោកម៉ាន់សួ ណាស់ ព្រោះក្រុមរដ្ឋាភិបាលទាមទារ អោយដៃគូនយោបាយអនាគត ដាច់ខាតត្រូវតែគ្មានក្រុមប្រយុទ្ធ។ ក្រុមរដ្ឋាភិបាលលោកម៉ាន់សួ ហាឌី បានទាមទារអោយក្រុមឧទ្ទាមនិងក្រុមគាំទ្រអតីតប្រធានាធិបតីសាឡេ ចុះហត្ថលេខាលើកិច្ចព្រមព្រៀងយ៉ាងយូរថ្ងៃ៧សីហានេះ។ ប៉ុន្តែ ក្រុមឧទ្ទាមនិងក្រុមគាំទ្រអតីតប្រធានាធិបតីអាប់ដាឡា សាឡេ នៅតែទាមទារលក្ខខណ្ឌ អោយមានការតែងតាំងប្រធានរដ្ឋមួយ ជាមុនសិន សម្រាប់ការដឹកនាំនយោបាយអន្តរកាល។
កិច្ចចរចាក្រោមអធិបតីភាពរបស់អង្គការសហប្រជាជាតិ នៅកូវ៉ែត កាលពីខែមេសា មិនទាន់មានអ្វីលេចឡើងគួរកត់សំគាល់ទេ ព្រោះមើលទៅ ក្រុមភាគីជម្លោះទាំងសង្ខាងមិនព្រមបន្ទន់ ជំហរដាក់គ្នាទាលឮតែសោះ។ កាលពីថ្ងៃសៅរ៍ ក្រុមរដ្ឋាភិបាលលោកហាឌី បានគំរាមដើរចេញពីកិច្ចចរចា ទំរាំតែប្តូរចិត្តព្រមពន្យារពេលកិច្ចចរចាថែម១សប្តាហ៍ទៀត។ មិនដឹងថា តើកិច្ចចរចានេះនឹងចេញអ្វីលើសពីនេះទេ។
បទឈប់បាញ់ដែលប្រកាស កាលពីខែមេសាវិញ ត្រូវបានរំលោភច្រើនដងទៅហើយ។ ថ្ងៃសៅរ៍កន្លងទៅ ក្រុមឧទ្ទាមបានបន្តវាយលុកនៅភាគខាងត្បូងអារ៉ាប៊ី សាអូឌិត។ ថ្ងៃអាទិត្យកន្លងមកដែរ ការប្រយុទ្ធរវាងក្រុមជម្លោះទាំងសង្ខាង នៅតែបន្តមាន សម្លាប់ទាហានអារ៉ាប៊ី សាអូឌីត និងទាហានឧទ្ទាមហ៊ូទី ជិត២០នាក់ នៅតាមព្រំដែនរវាងយេម៉ែន និងអារ៉ាប៊ី សាអូឌីត។
គួររំលឹកថា សង្គ្រាមនៅយេម៉ែនជាងមួយឆ្នាំមកនេះ ជាជម្លោះរវាងនិកាយស៊ុននីត និងនិកាយស្ហ៊ីអ៊ិត។ ក្រុមប្រយុទ្ធខាងនិកាយស៊ុននីត ជាក្រុមរដ្ឋាភិបាលលោកហាឌី ដែលកំពុងភៀសខ្លួននៅអារ៉ាប៊ី សាអូឌិត តែសហគមន៍អន្តរជាតិទទួលស្គាល់រដ្ឋាភិបាលមួយនេះ។ ក្រុមរដ្ឋាភិបាលស្របច្បាប់នេះ បានទទួលជំនួយពីអារ៉ាប៊ីសាអូឌីត។
ក្រុមប្រយុទ្ធម្ខាងទៀត និកាយស្ហ៊ីអ៊ីត ដឹកនាំដោយក្រុមឧទ្ទាមហ៊ូទី និងក្រុមគាំទ្រអតីតប្រធានាធិបតី អាប់ដាឡា សាឡេ ដែលត្រូវគេទំលាក់ពីអំណាច ក្នុងឆ្នាំ២០១២។ ក្រុម រដ្ឋាភិបាល លោកហាឌី បានចោទក្រុមឧទ្ទាមហ៊ូទីថា ជាក្រុមភេរវជន ហើយចោទទៀតថា អ៊ីរ៉ង់បានលូកដៃជួយក្រុមនេះ។
អ៊ីរ៉ង់លូកដៃ ក្នុងជម្លោះយេម៉ែន ហើយអារ៉ាប៊ីសាអូឌីត និងប្រទេសសម្ព័ន្ធអារ៉ាប់លូកដៃដែរ ដើម្បីប្រយុទ្ធនឹងអ៊ីរ៉ង់ដោយប្រយោល មែនរឺយ៉ាងណានោះ គឺឃើញថា សង្គ្រាមយេម៉ែនហាក់មីនសូវត្រូវបានគេអើពើប៉ុន្មានទេ។ បើអ៊ីរ៉ង់លូកដៃក្នុងជម្លោះយេម៉ែន នោះមានន័យថា អារ៉ាប៊ីសាអូឌីត និងអ៊ិរ៉ង់ដែលជាសត្រូវនឹងគ្នា នៅដើមបូព៌ា កំពុងតែយកយេម៉ែនធ្វើជាសមរភូមិសង្គ្រាម ប្រឆាំងគ្នា ដោយប្រើក្រុមជម្លោះយេម៉ែន ជាកូនអុកសង្គ្រាមទៅហើយ។ អារ់ាប៊ីសាអូឌីត ជួយទំលាក់គ្រាប់បែក កំទេចទាំងក្រុមឧទ្ទាម សម្លាប់ដល់ទាំងមនុស្សស្លូតត្រង់ ក៏នៅតែគ្មានអ្នកណាហ៊ានបន្ទោស។
ក្រុមជម្លោះជាតិយេម៉ែន ខ្លួនឯង នៅតែរឹងរូស មិនព្រមបើកភ្នែកមើលពីទុក្ខវេទនាប្រជាជន។ សង្គ្រាមអូសបន្លាយជាង១ឆ្នាំ៤ខែមកនេះ សម្លាប់មនុស្សជាង៦ ៤០០នាក់ បង្ករបួស៣ម៉ឺននាក់។ នេះនៅមិនគិតពីប្រជាជនដែលភ័យខ្លាច នាំគ្នារត់ភៀសខ្លួនរាប់លាននាក់ផង។ ក្រៅពីអស្ថិរភាពសន្តិសុខក្នុងស្រុក ក្រុមអាល់កៃដា និងក្រុមរដ្ឋអ៊ីស្លាមវិញ កំពុងពង្រឹងវត្តមានខ្លួននៅយេម៉ែនផងដែរ។ តើថ្ងៃណាទៅ ទើបសុខសន្តិភាពអាចកើតមាននៅយេម៉ែន បើភាគីជម្លោះនិមួយៗ មិនព្រមបន្ទន់ជំហររកគ្នាផងនោះ ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ