កាប៊ូល៖ ភេរវកម្មដោយគ្រាប់បែកអត្តឃាត សម្លាប់មនុស្សយ៉ាងតិច៦០នាក់ នៅមណ្ឌលចុះឈ្មោះបោះឆ្នោត
កាលពីព្រឹកថ្ងៃអាទិត្យម្សិលមិញ អំពើភេរវកម្មបំផ្ទុះគ្រាប់បែកអត្តឃាតមួយ បានសម្លាប់ជីវិតមនុស្សយ៉ាងតិច៦០នាក់និង ១១២នាក់ផ្សេងទៀតរងរបួស នៅមុខមណ្ឌលចុះឈ្មោះបោះឆ្នោតមួយកន្លែង នៅទីក្រុងកាប៊ូលនៃប្រទេសអាហ្វហ្កានីស្ថាន។ ក្រុមជីហាតរដ្ឋអ៊ីស្លាម ដែលហៅកាត់ថា IS បានចេញមុខប្រកាសថា ខ្លួនជាអ្នកនៅពីក្រោយហេតុការណ៍បំផ្ទុះគ្រាប់បែកអត្តឃាតនេះ។
ចុះផ្សាយនៅថ្ងៃ៖
ស្តាប់ - ០២:០៤
ភេរវកម្មបំផ្ទុះគ្រាប់បែកអត្តឃាតដោយក្រុមជីហាតរដ្ឋអ៊ីស្លាម បានសម្លាប់ជីវិតមនុស្សយ៉ាងតិច៦០នាក់ និងធ្វើអោយរបួសយ៉ាងតិច១១២នាក់ ដែលក្នុងនោះរួមទាំងស្រ្តីនិងកុមារផងដែរ។ ហេតុការណ៍វាយប្រហារនេះ បានកើតឡើងនៅច្រកចូលមណ្ឌលចុះឈ្មោះបោះឆ្នោតមួយកន្លែងក្នុងក្រុងកាប៊ូល ក្នុងពេលដែលប្រជាពលរដ្ឋអាហ្វហ្កានីស្ថានកំពុងឈរចាំធ្វើអត្តសញ្ញាណប័ណ្ណ ដែលជាឯកសារចាំបាច់សម្រាប់ការចុះឈ្មោះបោះឆ្នោតសភានាពេលខាងមុខ។
ប្រធានាធិបតីអាហ្វហ្កានីស្ថាន លោក Ashraf Ghani បានហៅការវាយប្រហារនេះថាជា អំពីសាហាវយ៉ង់ឃ្នង។
ចំណែកឯកអគ្គរដ្ឋទូតអាមេរិកប្រចាំនៅកាប៊ូល លោក John Bass បានហៅហេតុការណ៍បំផ្ទុះគ្រាប់បែកនេះថាជា អំពើហឹង្សាដែលមិនសមហេតុផលនេះ ដែលបង្ហាញពីភាពល្ងង់ខ្លៅនិងអមនុស្សធម៌របស់សត្រូវនៃលទ្ធិប្រជាធិបតេយ្យនិងសន្តិភាពនៅក្នុងប្រទេសអាហ្វហ្គានីស្ថាន។
សូមបញ្ជាក់ថា ការបោះឆ្នោតសភាអាហ្វហ្កានីស្ថាននឹងត្រូវធ្វើឡើងនៅថ្ងៃទី២០ខែតុលាខាងមុខនេះ មុនការបោះឆ្នោតប្រធានាធិបតីដែលនឹងធ្វើឡើងក្នុងឆ្នាំ២០១៩។
ជនរងគ្រោះម្នាក់ក្នុងហេតុការណ៍នេះដែលកំពុងស្ថិតនៅលើគ្រែសង្គ្រោះបន្ទាន់ក្នុងមន្ទីរពេទ្យ បានប្រាប់ទៅកាន់សារព័ត៌មាន AFP ថា ពួកគេទាំងអស់គ្នាចង់ទៅបោះឆ្នោតដើម្បីផ្លាស់ប្តូរតំណាងសភា ដែលបច្ចុប្បន្នខ្ចិលច្រអូសនិងពុករលួយ។
សភាអាហ្វហ្កានីស្ថានហួសអាណត្តិទាំងពី៣ឆ្នាំមុនមកម្លេះ ប៉ុន្តែដោយសារបញ្ហាអសន្តិសុខនិងភាពតានតឹងក្នុងប្រទេស ការបោះឆ្នោតសភាត្រូវបានពន្យាពេលជាបន្តបន្ទាប់។
ប្រជាពលរដ្ឋអាហ្វហ្កានីស្ថានមួយចំនួន បានសម្តែងនូវការព្រួយបារម្ភចំពោះបញ្ហាសុវត្ថិភាពក្នុងរដូវកាលចុះឈ្មោះបោះឆ្នោតនេះនិងក្នុងកំឡុងពេលបោះឆ្នោតខាងមុខ ហើយពួកគេបានសម្តែងនូវការមិនពេញចិត្តផងដែរចំពោះរដ្ឋាភិបាលអាហ្វហ្កានីស្ថាននិងក្រុមប្រដាប់អាវុធផ្សេងទៀតដូចជាក្រុមតាលីបង់។
មន្ត្រីអាជ្ញាធរអាហ្វហ្កានីស្ថានក៏បានទទួលស្គាល់ថា សន្តិសុខគឺជាបញ្ហាចោទដ៏សំខាន់មួយដែលគួរអោយព្រួយបារម្ភ ពីព្រោះថា ក្រុមតាលីបង់និងក្រុមយោធាដទៃទៀតបានគ្រប់គ្រងនិងកំពុងប្រជែងដណ្ដើមកាន់កាប់តំបន់សំខាន់ៗនៃប្រទេសអាហ្វហ្កានីស្ថាន។
សូមរំលឹកថា ក្រុមតាលីបង់បានធ្វើការវាយប្រហារទៅលើមណ្ឌលទទួលចុះឈ្មោះឆ្នោតពីរកន្លែងរួចមកហើយក្នុងប្រទេសអាហ្វហ្កានីស្ថាន កាលពីថ្ងៃអង្គារនិងថ្ងៃសុក្រសប្ដាហ៍មុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ