តើកូរ៉េខាងជើងបាញ់សាកល្បងផ្កាយរណប ឬមីស៊ីល?
នៅថ្ងៃអាទិត្យនេះ កូរ៉េខាងជើងបានធ្វើការបាញ់សាកល្បងនូវអ្វីដែលខ្លួនអះអាងថា ជាការសាកល្បងបង្ហោះផ្កាយរណប។ មានអ្នកជំនាញជាច្រើនសុទ្ធតែបានទទួលស្គាល់ថា កូរ៉េខាងជើងពិតជាបានបង្ហោះផ្កាយរណបទៅដាក់ក្នុងតារាវិថីពិតមែន។ ក៏ប៉ុន្តែ អាមេរិក និងសម្ព័ន្ធមិត្ត ព្រមទាំងប្រទេសជាច្រើនផ្សេងទៀត ហើយបូករួមទាំងក្រុមប្រឹក្សាសន្តិសុខអ.ស.ប.ផង សុទ្ធតែបាននាំគ្នាថ្កោលទោសកូរ៉េខាងជើងថាបានបាញ់សាកល្បងមីស៊ីលបាលីស្ទីក (Ballistic Missile)។ តើអ្វីដែលកូរ៉េខាងជើងបាញ់សាកល្បងនេះ គឺជាមីស៊ីលបាលីស្ទីក ឬជាផ្កាយរណប?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:២៨
ជាដំបូងគួរបញ្ជាក់ថា នេះមិនមែនជាលើកទីមួយទេ ដែលកូរ៉េខាងជើងធ្វើការសាកល្បងបាញ់បង្ហោះផ្កាយរណប។ កាលពីឆ្នាំ២០១២ កូរ៉េខាងជើងក៏ធ្លាប់បានបាញ់សាកល្បងមីស៊ីលនេះម្តងដែរ ដោយអះអាងថា ជាការបាញ់បង្ហោះផ្កាយរណប សម្រាប់ប្រើក្នុងវិស័យទូរគមនាគមន៍។ ហើយនៅក្នុងការបាញ់សាកល្បង កាលពីឆ្នាំ២០១២នោះ ក៏ដូចជា ការសាកល្បង នៅថ្ងៃអាទិត្យនេះដែរ បណ្តាក្រុមអ្នកជំនាញជាច្រើន រួមមានទាំងមន្រ្តីរដ្ឋាភិបាលអាមេរិក និងកូរ៉េខាងត្បូងផង សុទ្ធតែទទួលស្គាល់ថា កូរ៉េខាងជើងពិតជាបានបាញ់បង្ហោះផ្កាយរណបមួយទៅក្នុងតារាវិថីពិតមែន ឬបើមិនមែនផ្កាយរណបពិតប្រាកដ យ៉ាងហោចណាស់ក៏ជាវត្ថុមួយ ដែលស្រដៀងនឹងផ្កាយរណបដែរ។
ក៏ប៉ុន្តែ បើទោះបីជាយ៉ាងនេះក៏ដោយ អ.ស.ប ក៏ដូចជាបណ្តាប្រទេសមហាអំណាច ក្នុងនោះក៏រួមមានទាំងចិន និងរុស្ស៊ី ផងដែរ សុទ្ធតែបានរិះគន់កូរ៉េខាងជើង ដោយហៅការបាញ់សាកល្បងនេះថាជាការបង្កហេតុ និងជាការរំលោភទៅលើសេចក្តីសម្រេចរបស់ក្រុមប្រឹក្សាសន្តិសុខអ.ស.ប ចេញកាលពីឆ្នាំ២០០៦ និង២០០៩ ដែលបានហាមឃាត់ដាច់ខាតមិនឲ្យកូរ៉េខាងជើងធ្វើសកម្មភាពអ្វីទាំងអស់ ដែលទាក់ទងនឹងកម្មវិធីនុយក្លេអ៊ែរ និងមីស៊ីលបាលីស្ទីក។
តាមការពិត សម្រាប់សហរដ្ឋអាមេរិក និងសម្ព័ន្ធមិត្ត បើទោះបីជាអ្វីដែលកូរ៉េខាងជើងបាញ់បង្ហោះនេះជាផ្កាយរណបមែន ឬមិនមែនវាមិនសំខាន់នោះទេ។ អ្វីដែលសំខាន់គឺនៅត្រង់ថា តួមីស៊ីល ដែលកូរ៉េខាងជើងបាញ់សាកល្បងនេះ គឺជាប្រភេទមីស៊ីលប្រើបច្ចេកវិទ្យាតែមួយ ជាមួយនឹងបាលិស្ទីកអន្តរទ្វីប ដែលអាចប្រើបានទាំងក្នុងវិស័យអវកាស និងប្រើជាអាវុធក្នុងវិស័យយោធា។
គេនៅចាំបានថា នៅក្នុងអំឡុងសង្រ្គាមត្រជាក់ គឺបច្ចេកវិទ្យាមីស៊ីលបាលីស្ទិកដូចអ្វីដែលកូរ៉េខាងជើងបានបាញ់សាកល្បងនេះហើយ ដែលត្រូវបានសហរដ្ឋអាមេរិក និងសហភាពសូវៀតយកទៅប្រើនៅក្នុងការប្រជែងគ្នាក្នុងវិស័យអវកាសផង និងប្រើជាមីស៊ីលអន្តរទ្វីបផ្ទុកក្បាលគ្រាប់នុយក្លេអ៊ែរដើម្បីទុកកំញើញគ្នាផង។
និយាយដោយខ្លី បច្ចេកវិទ្យានៃតួមីស៊ីលតែមួយ បើវាផ្ទុកផ្កាយរណប វាគឺជារ៉ុកកែតស៊ីវិល សម្រាប់ប្រើក្នុងវិស័យអវកាស តែបើគេដកផ្កាយរណបចេញ ហើយជំនួសមកវិញដោយក្បាលគ្រាប់ វាគឺជាមីស៊ីលអន្តរទ្វីប ដែលអាចបាញ់បានចម្ងាយរាប់ម៉ឺនគីឡូម៉ែត្រ ហើយជាពិសេស វាជាប្រភេទមីស៊ីលដែលអាចផ្ទុកក្បាលគ្រាប់នុយក្លេអ៊ែរបាន។
ដូច្នេះ គេអាចនិយាយបានថា អ្វីដែលកូរ៉េខាងជើងបាញ់សាកល្បងនៅពេលនេះ អាចជាការសាកល្បងបង្ហោះផ្កាយរណបផង ហើយក៏ជាការសាកល្បងមីស៊ីលបាលីស្ទិកផងដែរ។ ការសាកល្បងមីស៊ីលបាលីស្ទិកមួយខែក្រោយពីធ្វើការសាកល្បងអាវុធនុយក្លេអ៊ែរ គឺជាការធ្វើផ្គើនផ្ទួនទៅនឹងបម្រាមរបស់ក្រុមប្រឹក្សាសន្តិសុខអ.ស.ប ដែលហាមឃាត់កូរ៉េខាងជើងមិនឲ្យធ្វើសកម្មភាពអ្វីទាំងអស់ដែលទាក់ទងនឹងវិស័យនុយក្លេអ៊ែរ និងបច្ចេកវិទ្យាមីស៊ីលបាលីស្ទិក។
គួរបញ្ជាក់ថា នៅក្នុងពេលបច្ចុប្បន្ននេះ អ្នកជំនាញជាច្រើនបានប៉ាន់ស្មានថា កូរ៉េខាងជើងមានសមត្ថភាពអាចផលិតបានក្បាលគ្រាប់នុយក្លេអ៊ែរជាច្រើនគ្រាប់រួចទៅហើយ គ្រាន់តែមិនទាន់មានបច្ចេកវិទ្យាគ្រប់គ្រាន់ ដើម្បីអាចយកក្បាលគ្រាប់នុយក្លេអ៊ែរទាំងនេះទៅប្រើប្រាស់បាន។
ប្រសិនបើកូរ៉េខាងជើងអាចផលិតមីស៊ីលបាលីស្ទិកបានដោយជោគជ័យ និងអាចអភិវឌ្ឍបច្ចេកវិទ្យាទំនើប ដើម្បីផលិតក្បាលគ្រាប់នុយក្លេអ៊ែរ ដែលមានទំហំតូច និងស្រាលល្មមអាចបំពាក់លើមីស៊ីលនេះបាន កូរ៉េខាងជើងនឹងអាចក្លាយទៅជាមហាអំណាចនុយក្លេអ៊ែរមួយដោយពិតប្រាកដ ហើយដល់ពេលនោះ មិនមែនតែជប៉ុន និងកូរ៉េខាងត្បូង ដែលនៅក្បែរខាងកូរ៉េខាងជើងនោះទេ ដែលត្រូវបារម្ភ សូម្បីតែសហរដ្ឋអាមេរិកក៏ត្រូវស្ថិតក្រោមការគំរាមកំហែងពីអាវុធនុយក្លេអ៊ែររបស់កូរ៉េខាងជើងនោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ