លោកដូណាល់ត្រាំមានសុទិដ្ឋិនិយមតែក៏ “មិនខ្លាចនឹងដើរចេញ” ពីជំនួបកំពូលជាមួយលោកគីមជុងអ៊ុន
កាលពីថ្ងៃពុធម្សិលមិញ ក្រោយពីបានទទួលស្គាល់ថា ប្រមុខទីភ្នាក់ងារចារកិច្ចសេអ៊ីអាបានទៅជួបដោយសម្ងាត់ជាមួយលោកគីម ជុងអ៊ុន លោកដូណាល់ត្រាំបានបង្ហាញនូវសុទិដ្ឋិនិយមថា ជំនួបកំពូលរវាងលោក និងលោកប្រមុខដឹកនាំកូរ៉េខាងជើងអាចនឹងរៀបចំធ្វើទៅបានដូចការគ្រោងទុក។ ក៏ប៉ុន្តែ ក្នុងពេលជាមួយគ្នា លោកដូណាល់ត្រាំក៏បានព្រមានផងដែរថា លោកក៏មិនខ្លាចនឹងដើរចេញពីជំនួបនេះដែរ ប្រសិនបើវាមិនទំនងជានឹងអាចចេញជាលទ្ធផលអ្វីមួយទេនោះ។
ចុះផ្សាយនៅថ្ងៃ៖ កែប្រែថ្ងៃទី៖
កាលពីថ្ងៃពុធម្សិលមិញនេះ លោកដូណាល់ ត្រាំមិនត្រឹមតែទទួលស្គាល់ថា ប្រមុខសេអ៊ីអាបានទៅជួបដោយសម្ងាត់ជាមួយនឹងលោកគីម ជុងអ៊ុននោះទេ តែលោកថែមទាំងបានអះអាងថែមទៀតថា បេសកកម្មសម្ងាត់ទៅកាន់ទីក្រុងព្យុងយ៉ាងនេះ គឺបានប្រកបទៅដោយជោគជ័យ។
ថ្លែងនៅក្នុងសន្និសីទសារព័ត៌មាន ក្រោយជំនួបជាមួយលោកនាយករដ្ឋមន្រ្តីជប៉ុន ស្ហ៊ីនហ្សូ អាបេ ដែលជាអ្នកមិនសូវទុកចិត្តលើដំណើរការចរចាជាមួយកូរ៉េខាងជើងនៅពេលនេះ លោកដូណាល់ ត្រាំបានបង្ហាញនូវក្តីសង្ឃឹមរបស់លោកថា ជំនួបកំពូល រវាងលោក និងលោកគីម ជុងអ៊ុន ដែលអាចនឹងប្រព្រឹត្តទៅនៅចុងខែឧសភា ឬដើមខែមិថុនាខាងមុនេះ អាចនឹងទទួលបានជោគជ័យ។
ក៏ប៉ុន្តែ ក្នុងពេលជាមួយគ្នា លោកដូណាល់ ត្រាំក៏បានធ្វើការព្រមានផងដែរថា ប្រសិនបើលោកមើលទៅឃើញថា ជំនួបកំពូលនេះនឹងមិនអាចចេញជាលទ្ធផលអ្វីទេនោះ លោកនឹងមិនទៅចូលរួមជំនួបកំពូលនេះទេ ហើយបើទោះបីជាជំនួបកំពូលនេះចាប់ផ្តើមបើកធ្វើហើយក៏ដោយ ក៏លោកមិនខ្លាចនឹងដើរចេញវិញនោះដែរ។
សម្រាប់លោកដូណាល់ ត្រាំ កូរ៉េខាងជើង “នឹងមានអនាគតភ្លឺស្វាង” ប្រសិនបើសុខចិត្តបោះបង់ចោលកម្មវិធីផលិតអាវុធនុយក្លេអ៊ែរ ហើយថា លុបបំបាត់កម្មវិធីផលិតអាវុធនុយក្លេអ៊ែរនេះ ចាំបាច់ត្រូវតែធ្វើឡើង “យ៉ាងពេញលេញ និងជាស្ថាពរដោយគ្មានផ្លូវអាចបកក្រោយវិញបាន”។
លោកស្ហ៊ីនហ្សូ អាបេវិញ ក្រៅពីបានស្នើសុំឲ្យលោកដូណាល់ ត្រាំលើកយកសំណុំរឿងចាប់ជំរឹតជនជាតិជប៉ុនកាលពីសម័យសង្រ្គាមត្រជាក់ ទៅជជែកជាមួយលោកគីម ជុងអ៊ុន ក៏បានទទូចផងដែរកុំអាមេរិកធ្វើសម្បទានអ្វីមួយដល់កូរ៉េខាងជើង ដោយគ្រាន់តែលោកគីម ជុងអ៊ុនយល់ព្រមចូលតុចរចាតែប៉ុណ្ណឹង ពោលគឺចាំបាច់ត្រូវតែរង់ចាំមើលលទ្ធផលនៃការចរចានេះជាមុនសិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ