អ.ស.ហ៖បើមិនបន្ថែមជំនួយ មានពលរដ្ឋស៊ីរីជាច្រើននឹងស្លាប់ដោយអត់បាយ
លោកមីស្ទូរ៉ា ប្រេសិតពិសេសរបស់អង្គការសហប្រជាជាតិទទួលបន្ទុកសំណុំរឿងស៊ីរីបានទាញសញ្ញាអាសន្ននៅថ្ងៃព្រហស្បតិ៍ ទី២៦ឧសភាថា បើសហគមន៍អន្តរជាតិមិនបន្ថែមជំនួយឲ្យបានរួសរាន់ទេ នោះនឹងមានពលរដ្ឋស៊ីរីជាច្រើនរយនាក់ត្រូវស្លាប់ដោយអត់បាយ។ ការព្រមានរបស់លោកមីស្ទូរ៉ាបានធ្លាក់មក ចំពេលដែលអង្គការសុខភាពពិភពលោក OMS បានចេញផ្សាយរបាយការណ៍មួយស្តីពីអំពើហិង្សាប្រឆាំងនឹងបុគ្គលិកបម្រើសេវាសុខភាពនៅក្នុង១៩ប្រទេស។ តាម OMS ស៊ីរីជាប្រទេសគ្រោះថ្នាក់ជាងគេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
គឺនៅក្រោយកិច្ចប្រជុំក្រុមការងារក្នុងទីក្រុងហ្សឺណែវ ប្រទេសស្វ៊ីសស្តីពីការនាំជំនួយមនុស្សធម៌ទៅឲ្យស៊ីរីដែលលោកមីស្ទួរ៉ាបានថ្លែងថា មានជនស៊ីវិលស៊ីរីជាច្រើនដែលកំពុងរងគ្រោះស្លាប់ដោយគ្មានអាហារទទួលទាន ពិសេសប្រជាជនដែលរស់ក្នុងតំបន់ឡោមព័ទ្ធដោយកម្លាំងរដ្ឋាភិបាល និងដែលគេមិនអាចដឹកជញ្ជូនជំនួយទៅដល់។ លោកហ្សង់ អ៊ីហ្ស៊ីឡាន អ្នកទទួលខុសត្រូវក្រុមការងារផ្គត់ផ្គង់ជំនួយមនុស្សធម៌ឲ្យដឹងថា ការចែកចាយជំនួយមនុស្សធម៌ក្នុងខែឧសភានេះមានកម្រិតតិចតួចខ្លាំងណាស់ បើធៀបនឹងតម្រូវការជាក់ស្តែងរបស់ប្រជាជនស៊ីរី។
ក្នុងចំណោមពលរដ្ឋស៊ីរីប្រមាណជា ១លាននាក់ដែលអង្គការសហប្រជាជាតិសង្ឃឹមដឹកជំនួយទៅឲ្យតាមផ្លូវគោក គឺមានតែប្រមាណ ១៦០ ០០០នាក់ប៉ុណ្ណោះដែលបានទទួល។ លោកហ្សង់ អ៊ីហ្សីឡានបានបន្ថែមថា មានបញ្ហា និងឧបសគ្គជាច្រើនដែលក្រុមការងាររបស់លោកបានជួបប្រទះ ទោះបីជានៅទីកន្លែងដែលមានការអនុញ្ញាតពីរដ្ឋអំណាចក្នុងស្រុកក៏ដោយ។ ជាក់ស្តែងគឺស្រុកម៉ាដាយ៉ាដែលកំពុងស្ថិតក្រោមការឡោមព័ទ្ធរបស់កម្លាំងរដ្ឋាភិបាល និងដែលមានកូនក្មេងយ៉ាងច្រើនកំពុងខ្វះអាហារ ហើយពួកគេនឹងត្រូវស្លាប់បើជំនួយនៅតែមិនអាចចូលទៅបានទេនោះ។
ក្រៅពីជួបឧបសគ្គ និងការរារាំងរបស់រដ្ឋអំណាច លោកមីស្ទូរ៉ាក៏បានត្អូញត្អែរពីការលំបាកដឹកជញ្ជូនជំនួយ ព្រោះមានតំបន់ខ្លះមិនអាចដឹកតាមរថយនុ្តបានទេ។ ក្នុងករណីនេះ លោកប្រេសិតពិសេសសហប្រជាជាតិបានស្នើឲ្យមានការទម្លាក់ជំនួយតាមយន្តហោះ ឬតាមឧទ្ធម្ភាគចក្រនៅតាមតំបន់ដាច់ស្រយោល ពិសេសតំបន់ដែលគ្រប់គ្រងដោយរដ្ឋាភិបាល។ ទន្ទឹមគ្នានឹងការទាញសញ្ញាអាសន្នរបស់លោកមីស្ទូរ៉ាស្តីពីគ្រោះអត់ឃ្លាននៅស៊ីរី អង្គការសុខភាពពិភពលោក OMS ទើបបានចេញផ្សាយរបាយការណ៍មួយស្តីពីអំពើហិង្សាប្រឆាំងបុគ្គលិកបម្រើសេវាសុខភាពក្នុង ១៩ប្រទេស។
តាមរបាយការណ៍ មានការវាយប្រហារចំនួន ២៥៦ដងសំដៅទីកន្លែង រថយន្ត និងបុគ្គលិកបម្រើសេវាសុខភាពនៅក្នុង ១៩ប្រទេសនាឆ្នាំ ២០១៥ កន្លងទៅ។ ការវាយប្រហារនោះបានបណ្តាលឲ្យមានមនុស្សស្លាប់ ៤៣៤នាក់ រួមមានបុគ្គលិកពេទ្យ អ្នកជម្ងឺ និងជនស៊ីវិលផ្សេងទៀត។ OMS បានចាត់ចំណាត់ថ្នាក់ស៊ីរី ជាប្រទេសគ្រោះថ្នាក់ជាងគេសម្រាប់បុគ្គលិកបម្រើសេវាសុខភាព ព្រោះក្នុងឆ្នាំ ២០១៥ មានការវាយប្រហារចំនួន ១៣៥ដងដោយបានសម្លាប់មនុស្ស ១៧៣នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ