តើកងយោធាអវកាសអាមេរិកអាចនឹងលេចចេញរូបរាងដែរឬទេ?
ចុះផ្សាយនៅថ្ងៃ៖
ស្តាប់ - ០៤:៣០
កាលពីថ្ងៃច័ន្ទ ទី១៨ ខែមិថុនាកន្លងទៅនេះ លោក ដូណាល់ ត្រាំ ប្រធានាធិបតីសហរដ្ឋអាមេរិកបានប្រកាសបង្កើតកងយោធាទ័ពអវកាសអាមេរិកមួយ។ កងទ័ពថ្មីនេះនឹងក្លាយជាកំលាំងកងទ័ពទីប្រាំមួយស្ថិតក្រោមចំណុះអគ្គសេនាធិការយោធាចំរុះអាមេរិក។ នៅក្នុងសេចក្តីថ្លែងការណ៍មួយមុនបើកកិច្ចប្រជុំក្រុមប្រឹក្សាអវកាសជាតិ លោក ដូណាល់ ត្រាំ បានបញ្ជាក់ថា វាជាការចាំបាច់ដែលសហរដ្ឋអាមេរិកត្រូវប្រើប្រាស់កំលាំងយោធាពិសេសមួយដើម្បីគ្រប់គ្រងដែនអវកាសតែម្តង។ សេចក្តីអះអាងនេះហាក់ផ្ទុយគ្នាសស្រឡះពីអ្វីដែលមានចែងក្នុងសន្ធិសញ្ញាអវកាស ដែលសហរដ្ឋអាមេរិកខ្លួនឯងជាសហស្ថាបនិក។
ការបង្កើតទ័ពអវកាសនេះ គឺនឹងបំបែកខ្លួនចេញកងទ័ពជើងអាកាសអាមេរិកដែលមានស្រាប់ទៅហើយ។ បើតាមសេចក្តីប្រកាសរបស់លោកប្រធានាធិបតីអាមេរិក កំលាំងកងទ័ពទាំងពីរនេះនឹងមានចំណុះ និងសមត្ថភាពប្រហែលគ្នា។ តាមពិតទៅ គំនិតបង្កើតកងទ័ពអវកាសនេះមិនមែនជារឿងថ្មីថ្មោងឡើយ។ មានប្រធានាធិបតីអាមេរិកមុនៗក៏ធ្លាប់បានលើកយកគំរោងនេះមកជជែកពិភាក្សាផងដែរ។ លោកស្រី Dana White អ្នកនាំពាក្យក្រសួងការពារជាតិអាមេរិកបានថ្លែងថា មន្រ្តីជាន់ខ្ពស់ក្រសួងនឹងត្រៀមខ្លួនអនុវត្តសេចក្តីបង្គាប់របស់លោកប្រធានាធិបតី ដូណាល់ ត្រាំ ដើម្បីឈានទៅសំរេចគោលដៅបង្កើតកង័ពអវកាសមួយនេះ។
ប៉ុន្តែទន្ទឹមគ្នានេះ គំរោងបង្កើតទ័ពអវកាសនេះក៏ទទួលការរិះគន់ខ្លាំងពីសំណាក់ក្រុមមេដឹកនាំយោធាជាន់ខ្ពស់អាមេរិកផងដែរ។ នៅក្នុងសវនកម្មសួរដេញដោលមួយនៅចំពោះមុខសភាកុងគ្រែសកាលពីឆ្នាំ២០១៧ លោក David Goldfein អគ្គមេបញ្ជាការកងទ័ពជើងអាកាសអាមេរិកបានគូសបញ្ជាក់ថា ការបង្កើតកងទ័ពអវកាស គឺមិនមែនជារឿងល្អឡើយ។ សព្វថ្ងៃនេះ កងទ័ពជើងអាកាសអាមេរិកជាអ្នកតាមដានរាល់សកម្មភាពយោធានៅលើដែនអាកាសប្រទេសរួចជាស្រេចទៅហើយ។ ដូចនេះ គេមិនចាំបាច់ត្រូវបង្កើតផែនកងទ័ពថ្មីមួយឡើយ។
គិតមកដល់ពេលនេះ សេចក្តីសំរេចបង្កើតកងទ័ពអវកាសអាមេរិកនេះគ្រាន់តែជាគំរោងរបស់រដ្ឋាភិបាលអាមេរិកប៉ុណ្ណោះ។ ដើម្បីឲ្យគំរោងនេះលេចចេញជារូបរាងពិតប្រាកដបាន គេត្រូវរង់ចាំការអនុម័តពីសភាកុងគ្រែសជាមុនសិន។ ទាក់ទងនឹងសំណុំរឿងនេះ ក្រុមសមាជិកសភាតំណាងរាស្រ្ត និងក្រុមសមាជិកព្រឹទ្ធសភាទាំងពីរគណបក្សពុំមានគំនិតស្រុះស្រួលជាធ្លុងមួយឡើយ។ លោក Bill Nelson សមាជិកព្រឹទ្ធសភាមកពីគណបក្សប្រជាធិបតេយ្យជាមនុស្សម្នាក់ប្រឆាំងនឹងគំរោងនេះបានអះអាងថា វាមិនទាន់ដល់ពេលត្រូវបំបែកកងទ័ពជើងអាកាស ដើម្បីបង្កើតកងទ័ពអវកាសឡើយ។ មានគ្រោះថ្នាក់ជាច្រើនត្រូវប្រឈមសំរាប់បេសកកម្មរបស់កងទ័ពអវកាស។
កាលពីខែធ្នូ ឆ្នាំ២០១៦កន្លងទៅនេះ លោក ដូណាល់ ត្រាំ បានចុះហត្ថលេខាលើក្រឹត្យប្រធានាធិបតីមួយបង្គាប់ឲ្យមានការបើកឡើងវិញនូវប្រតិបត្តិការរុករកជីវិតរស់នៅលើភពព្រះច័ន្ទ និងភពព្រះអង្គារ។ វាជាបេសកកម្មស្ថិតក្រោមការចំណាយប្រាក់ឧបត្ថម្ភរបស់រដ្ឋាភិបាលអាមេរិក។ លោក ត្រាំ ក៏បានបញ្ជាឲ្យពិនិត្យសើរើឡើងវិញផងដែរចំពោះច្បាប់គ្រប់គ្រងក្រុមហ៊ុនឯកជនដែលមានអាជីវកម្មជំនាញផែ្នកហោះហើរបញ្ជូនយានទៅទីអវកាស។ សព្វថ្ងៃនេះ ក្រុមហ៊ុនឯកជនអាមេរិកធំៗដូចជា Space X និង Blue Origin ជាដើមកំពុងតែបង្កើនសមត្ថភាពបច្ចេកវិទ្យាផលិតយានចម្លងដែលមានល្បឿនលឿនលើលោក។ តួយ៉ាងក្រុមហ៊ុន Space X បានប្រើប្រាស់យាន Falcon Heavy កាលពីថ្ងៃទី ៦ កុម្ភៈកន្លងទៅនេះ ដើម្បីដឹកជញ្ជូនរថយន្ត Tesla មួយគ្រឿងទៅដាក់បង្ហោះចោលនៅលើគន្លងតារាវិថីនៃភពព្រះអង្គារ។ នាឆ្នាំ២០២៥ខាងមុខនេះ ក្រុមហ៊ុន Space X ក៏គ្រោងបញ្ជូនមនុស្សទៅភពព្រះច័ន្ទដោយប្រើប្រាស់យានចម្លងមានកំលាំងមហិមារក្លាំងក្លាបីដងលើសយាន Falcon Heavy ទៅទៀត។ គោលដៅរបស់ក្រុមហ៊ុន គឺតាមរយៈយានបែបនេះ គេនឹងអាចបញ្ជូនមនុស្សទៅកាន់ទៅភពព្រះអង្គារ។ ចំណែកក្រុមហ៊ុន Blue Origin វិញកំពុងតែបង្កើតបច្ចេកវិទ្យាផលិតយាន New Glenn ដែលមានសមត្ថភាពអាចផ្ទុកសំភារៈរាប់សិបតោនយកទៅដាក់នៅលើគន្លងតារាវិថី។
សូមរំលឹកជូនថា កាលពីឆ្នាំ១៩៦១ លោកប្រធានាធិបតី John F. Kenneedy បានដាក់គោលដៅមួយ គឺធ្វើយ៉ាងណាសំរេចបេសកកម្មបញ្ជូនអវកាសនិកទៅកាន់ភពព្រះច័ន្ទ។ គឺចាប់ពីពេលនោះហើយដែលសហរដ្ឋអាមេរិក និងអតីតៈសហភាពសូវៀតបានប្រជែងគ្នាអស់រយៈដប់ឆ្នាំក្នុងការឈានទៅសំរេចបេកកម្មនេះ។ សម័យកាលនោះ មហាអំណាចទាំងពីរក៏បានប្រជែងគ្នាផែ្នកនយោបាយ និងមនោគមន៍វិជ្ជាផងដែរក្នុងកំឡុងពេលសម័យសង្គ្រាមត្រជាក់រវាងប្លុកទាំងពីរ។ គេត្រូវរង់ចាំរហូតដល់ឆ្នាំ១៩៦៩ ទើបមានអវកាសនិកអាមេរិកបានជាន់ជើងនៅលើភពព្រះច័ន្ទជាលើកតំបូង។ ហើយទីបំផុត គឺសហរដ្ឋអាមេរិកបានសំរេចគោលដៅរបស់ខ្លួន។ បើតាមគំរោងរបស់លោក ត្រាំ គឺចាប់ពីឆ្នាំ២០១៩ខាងមុខនេះ សហរដ្ឋអាមេរិកមានគំរោងបញ្ជូនយានរុករកស្វ័យប្រវត្តិមួយទៅកាន់ភពព្រះច័ន្ទ។ នេះជាលើកទីមួយហើយចាប់ពីឆ្នាំ១៩៧២ ដែលមានការបើកប្រតិបត្តិការបេសកកម្មបែបនេះនៅភពព្រះច័ន្ទ។
សូមបញ្ជាក់ថា សហរដ្ឋអាមេរិកជាប្រទេសហត្ថលេខីនៃសន្ធិសញ្ញាអវកាស។ សន្ធិសញ្ញានេះត្រូវបានតាក់តែងឡើងក្រោមគំនិតផ្តួចផ្តើមរួមគ្នារវាងសហរដ្ឋអាមេរិក និងសហភាពសូវៀត។ គោលបំណងចម្បងនៃសន្ធិសញ្ញានេះ គឺអភិរក្សទីអវកាសដែលជាសម្បត្តិរួមរបស់មនុស្សជាតិ និងចៀសវាងមិនឲ្យប្រជាជាតិណាមួយប្រើប្រាស់មហិច្ឆតាគ្រប់គ្រងបង្កើតអធិបតេយ្យភាពរបស់ខ្លួន។ អត្ថបទគតិយុត្តអន្តរជាតិនេះបានចូលជាធរមានកាលពីចុងឆ្នាំ១៩៦៧។ ខ្លឹមសារនៃសន្ធិសញ្ញានេះបានហាមឃាត់មិនឲ្យមានការពង្រាយអាវុធប្រល័យលោកណាមួយឡើយនៅក្នុងលំហអវកាស។ សន្ធិសញ្ញានេះក៏បានចែងច្បាស់ផងដែរថា ការប្រើប្រាស់ភពព្រះច័ន្ទ ឬភពណាមួយផ្សេងទៀតក្នុងលំហអវកាស គឺត្រូវបានអនុញ្ញាតតែសំរាប់គោលដៅស្រាវជ្រាវវិទ្យាសាស្រ្តតែប៉ុណ្ណោះ។ បើទោះបីជាមានការហាមឃាត់យ៉ាងណាក៏ដោយ ប៉ុន្តែ សន្ធិសញ្ញានេះពុំបានហាមឃាត់ក្រុមហ៊ុនឯកជនដែលចង់រុករក ឬធ្វើអាជីវកម្មធនធានរ៉ែដែលមាននៅលើបណ្តាភពទាំងឡាយក្នុងលំហអវកាសឡើយ។
ដោយឡែក សន្ធិសញ្ញាស្តីពីភពព្រះច័ន្ទត្រូវបានតាក់តែងឡើងកាលពីឆ្នាំ១៩៧៩។ សន្ធិសញ្ញានេះមានកម្មវត្ថុជំរុញថែរក្សាភពព្រះច័ន្ទដែលជាភពរណបវិលជុំវិញភពផែនដី។ ហើយភពព្រះច័ន្ទត្រូវបានចាត់ទុកថាជាបេតិកភ័ណ្ឌមនុស្សជាតិ។ ប៉ុន្តែ មកដល់សព្វថ្ងៃនេះ សន្ធិសញ្ញាស្តីពីការអភិរក្សភពព្រះច័ន្ធនេះពុំត្រូវបានប្រទេសមហាអំណាចអវកាសចុះហត្ថលេខាឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ