វៀតណាម-អាល់ហ្សេរី ពីមិត្តភាពប្រវត្តិសាស្ត្រ ទៅដៃគូសេដ្ឋកិច្ច
ចុះផ្សាយនៅថ្ងៃ៖
ស្តាប់ - ០៣:៥៦
តើវៀតណាមកំពុងបោះជំហានទៅរុករានដីថ្មីនៅអាហ្វ្រិក តាមរយៈប្រទេសអាល់ហ្សេរីឬ ? នេះជាទស្សនៈវិស័យមួយដែលឆ្លុះបញ្ចាំងឱ្យឃើញ នាឱកាសទស្សនកិច្ចផ្លូវរដ្ឋរបស់នាយករដ្ឋមន្ត្រីវៀតណាម នៅប្រទេសអាល់ហ្សេរី បីថ្ងៃ សប្តាហ៍នេះ។ អាល់ហ្សេរី និងវៀតណាម បានបង្កើនទស្សនកិច្ចរបស់គណៈប្រតិភូ ជំនួបពិភាក្សាជាន់ខ្ពស់ច្រើនឡើងៗ ដើម្បីពង្រឹងកិច្ចសហប្រតិបត្តការទ្វេភាគីផង ដើម្បីសម្តែងការគាំទ្រគ្នាទៅវិញទៅមកផង លើឆាកអន្តរជាតិ ក្នុងរង្វង់អង្គការឬវេទិកាអន្តរជាតិ និងពិសេសដើម្បីផ្តល់កម្លាំងចលករដល់ការផ្តោះប្តូរពាណិជ្ជកម្មរវាងគ្នា។
មានប្រវត្តិជាមិត្តនឹងគ្នា ធ្លាប់បានជួយគ្នាទៅវិញទៅមក ក្នុងគ្រាក្រ ជាពិសេសនៅក្នុងពេលមានសង្គ្រាម ពេលប្រយុទ្ធតស៊ូទាមទារឯករាជ្យពីនឹមអាណានិគមនិយមបារាំង។ ពលរដ្ឋនិងរដ្ឋាភិបាលអាល់ហ្សេរីធ្លាប់គាំទ្រយ៉ាងពេញទំហឹងពលរដ្ឋវៀតណាមក្នុងសង្គ្រាមឈ្លានពានអាមេរិក ហើយគឺវៀតណាមដែលទទួលស្គាល់មុនគេរដ្ឋាភិបាលបណ្តោះអាសន្នអាល់ហ្សេរីនៅឆ្នាំ១៩៥៨ និងដាក់ទូតភ្លាមនៅក្រុងអាល់ហ្សេ នៅឆ្នាំ១៩៦២ ពេលអាល់ហ្សេរីបានទទួលឯករាជ្យ...
រាល់ពេលរាល់លើក វៀតណាមតែងតែថ្លែងរំលឹកអំណរគុណ អាល់ហ្សេរី ដែលបានជួយខ្លួនក្នុងអតីតកាល មិនថាក្នុងបុព្វហេតុឯករាជ្យឬបុព្វហេតុបង្រួបបង្រួមវៀតណាមខាងជើងនិងខាងត្បូងទេ។ វៀតណាមអរគុណអាល់ហ្សេរី ដែលទទួលស្គាល់លក្ខន្តិកៈសេដ្ឋកិច្ចទីផ្សារវៀតណាម។
ទំនាក់ទំនងអាល់ហ្សេរី-វៀតណាម ដ៏រលូន បានរីកធំធាត់ជាលំដាប់ និងល្អប្រសើរបំផុតខាងផ្នែកនយោបាយ ប៉ុន្តែមិត្តភាពនេះមានកំរិត បើនិយាយអំពីវិស័យសេដ្ឋកិច្ច ពាណិជ្ជកម្ម។ ហេតុដូច្នេះហើយបានជា ប្រមុខដឹកនាំទាំងពីរប្រទេសបានប្តេជ្ញាពង្រីកសក្តានុពលមិត្តភាពឱ្យបានច្រើនបន្ថែមទៀត លើគ្រប់វិស័យ។
នាឱកាសជួបសន្ទនាមួយទល់នឹងមួយ នៅថ្ងៃទី ១ មិថុនា ២០១៥ នាយករដ្ឋមន្ត្រីអាល់ហ្សេរី លោក Abdelmalek Sellal និងសមភាគី វៀតណាម លោកNguyen Tan Dung បានសម្រេចធ្វើឱ្យប្រសើរឡើង និងប្រកបដោយប្រសិទ្ធិភាពគណៈកម្មការសហប្រតិបត្តិការអន្តររដ្ឋាភិបាល និងគាំទ្របេក្ខភាពអាល់ហ្សេរី-វៀតណាម ក្នុងស្ថាប័នអង្គការសហប្រជាជាតិ ឬអង្គការអន្តរជាតិ។ មិនតែប៉ុណ្ណោះ អាល់ហ្សេរី បានបង្ហាញការគាំទ្រវៀតណាម ក្នុងដំណោះស្រាយដោយសន្តិវិធី ជម្លោះនៅសមុទ្ទចិនខាងត្បូង ស្របតាមច្បាប់អន្តរជាតិ។ ឯចំណែកវៀតណាម គាំទ្របេក្ខភាពអាល់ហ្សេរី ជាសមាជិកអង្គការពាណិជ្ជកម្មពិភពលោក OMC ដោយមិនបាច់គិតយូរ។
លើវិស័យសេដ្ឋកិច្ច និងពាណិជ្ជកម្ម ថ្វីបើចិនឈានមុខគេខ្លាំងនៅអាល់ហ្សេរី ឬនៅអាហ្វ្រិក ស្ទើរតែម៉ៅដាច់ទីផ្សារទៅហើយក៏ដោយ ក៏អាល់ហ្សេរី សន្យាប្រកាន់យកនយោបាយប្រកួតប្រជែង ដោយផ្តល់សំណាងឱ្យវៀតណាមអាចជ្រៀតចូលក្នុងទីផ្សារអាល់ហ្សេរី។ សម្រាប់អាល់ហ្សេរីផ្ទាល់ដែលចង់ពង្រឹងសេដ្ឋកិច្ច ឱ្យដើរទាន់ប្រទេសជិតខាង មើលខ្លួនឯងថាជាប្រទេសមួយប្រកបដោយយុទ្ធសាស្ត្រ ជាច្រកផ្លូវសម្រាប់វៀតណាមឈានរកការអភិវឌ្ឍន៍សេដ្ឋកិច្ចក្នុងទ្វីបអាហ្វ្រិកទាំងមូល។ មិនខុសគ្នានេះដែរ វៀតណាម ក៏មានអំណះអំណាងគ្រប់គ្រាន់ក្នុងការតាំងខ្លួនជាច្រកទ្វារសម្រាប់អាល់ហ្សេរីហោះជំហានចូលអាស៊ី។
ដោយមើលឃើញពីប្រយោជន៍យុទ្ធសាស្ត្រដូចគ្នា ទើបប្រមុខដឹកនាំទាំងពីរចង់រៀបចំឱ្យមានភាពជាដៃគូ តាមគំរូថ្មី កិច្ចសហប្រតិបត្តិការថ្មី ដែលសក្តិសម និងមានអានុភាព ដើម្បីឱ្យពាណិជ្ជកម្មទ្វេភាគី បានឡើងដល់ទៅ១ពាន់លានដុល្លារ នៅពេលអនាគតដ៏ខ្លីខាងមុខ មិនមែនត្រឹមតែ ២៥០លានដុល្លារដូចពេលបច្ចុប្បន្ន។ ឧស្សាហកម្ម កសិកម្ម កសិចំណីអាហារ ប្រេង រ៉ែ កាត់ដេរ ហេដ្ឋារចនាសម្ព័ន្ធ ហិរញ្ញវត្ថុ បច្ចេកវិទ្យាព័ត៌មានវិទ្យា ទូរគមនាគមន៍ និងទេសចរណ៍ ជាវិស័យសំខាន់ៗដែលប្រទេសទាំងពីរនឹងសម្រួលកិច្ចសហប្រតិបត្តិការឱ្យកាន់តែប្រសើរឡើង។
អាល់ហ្សេរីត្រូវការជំនួយពីវៀតណាម សម្រាប់អភិវឌ្ឍន៍ឧស្សាហកម្មកាត់ដេរ និងកសិចំណីអាហារ ដោយត្រៀមខ្លួនជាស្រេចនឹងផ្តល់ដីរាប់ម៉ឺនហិចតារដល់ក្រុមហ៊ុនវៀតណាម សម្រាប់អភិវឌ្ឍន៍ដំណាំស្រូវ ចិញ្ចឹមសត្វ។ ក្រុមហ៊ុនប្រេងវៀតណាម និងអាល់ហ្សេរី ចាប់ពីខែកក្កដាទៅនឹងអាចផលិត និងធ្វើពាណិជ្ជកម្មប្រេងបានប្រមាណពី ២ម៉ឺនទៅ៤ម៉ឺនប៉ារីល។ មិនតែប៉ុណ្ណោះវៀតណាមអាចពង្រីកគម្រោងរបស់ខ្លួនបានទៀត។ អាល់ហ្សេរី ស្វាគមន៍ការចូលរួមចំណែករុករករ៉ែរបស់វៀតណាម ដែលជាវិស័យមានសក្តានុពលខ្លាំង និងរង់ចាំទទួលកម្មករសំណង់មានសមត្ថភាព សម្រាប់សម្រេចសមិទ្ធិសាងសង់សំណង់លំនៅដ្ឋាន។
កិច្ចព្រមព្រៀងកិច្ចសហប្រតិបត្តិការទ្វេភាគីលើ វិស័យទេសចរណ៍ សុខាភិបាល វប្បធម៌ ឆ្នាំ២០១៦-១៨ ត្រូវបានចុះហត្ថលេខាក្រោមអធិបតីភាពនាយករដ្ឋមន្ត្រីទាំងពីររូប ដែលមិនលាក់បាំងនឹងអបអរសាទរដំណើរទស្សនកិច្ចប្រកបដោយផ្លែផ្កា ប្រែក្លាយមិត្តភាពនយោបាយប្រវត្តិសាស្ត្រ ឱ្យជាចំណងកិច្ចសហប្រតិបត្តិការពហុទម្រង់ទ្វេភាគី ដល់កំរិតកំពូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ