កម្ពុជា បង្កើនការប្រុងប្រយ័ត្នដើម្បីទប់ទល់នឹងជម្ងឺគ្រុនឈាម
ក្រុមគ្រូពេទ្យរបស់ក្រសួងសុខាភិបាល និងមន្ទីរគ្រប់ខេត្តរាជធានីទូទាំងប្រទេស បានជួបជុំគ្នា ជាមួយ អង្គការក្រៅរដ្ឋាភិបាលនានា ដើម្បីលើកឡើងពីការគ្រប់គ្រងស្ថានភាពផ្ទុះជម្ងឺគ្រុនឈាម និងការរៀបចំទប់ទល់នឹងការរាតត្បាតនៃជម្ងឺដ៏កាចសាហាវនេះ។ ជម្ងឺគ្រុនឈាម ដែលឆ្លងតាមរយៈមូសខ្លា នឹងកើនឡើង នៅរដូវភ្លៀងធ្លាក់។ ក្នុងរយៈពេល ៧ ខែ នៅឆ្នាំ ២០១០នេះ ជម្ងឺគ្រុនឈាម បានសម្លាប់ជីវិតមនុស្សនៅកម្ពុជាចំនួន ១០ នាក់។
ចុះផ្សាយនៅថ្ងៃ៖
សេចក្តីរាយការណ៍របស់ លី ម៉េងហួរ
នៅរដូវភ្លៀងធ្លាក់ពេលនេះ ជម្ងឺគ្រុនឈាម កំពុងបង្កក្តីបារម្ភ ថាអាចនឹងកើនឡើង និងរាតត្បាតពីតំបន់មួយ ទៅតំបន់មួយ។ ដូច្នេះហើយ បានជានៅព្រឹកមិញ ក្រុមគ្រូពេទ្យមកពីបណ្តាខេត្តទូទាំងប្រទេស រួមនឹងអង្គការក្រៅរដ្ឋាភិបាលនានា បានជួបប្រជុំគ្នា និងដាក់ចេញនូវវិធានការទប់ស្កាត់ និងគ្រប់គ្រងស្ថានភាព ដែលអាចនឹងផ្ទុះជម្ងឺគ្រុនឈាម ដែលកើតឡើងច្រើនជាងគេ លើកុមារក្រោមអាយុ ១៥ ឆ្នាំ ។
វិធានការទប់ស្កាត់ការរាលដាលជម្ងឺគ្រុនឈាម គឺការប្រើប្រាស់ថ្នាំ Abat ដើម្បីសម្លាប់ដង្កូវទឹក ក្នុងពាងឬអាងទឹក។ ប៉ុន្តែវិធានការដាក់ថ្នាំ Abat សម្លាប់ដង្កូវទឹក នឹងមិនមានជោគជ័យ ១០០% ទេ។ ដូច្នេះចាំបាច់ ត្រូវមានការចូលរួមពីសហគមន៍ទាំងមូល ជាមួយភ្នាក់ងារសុខាភិបាល ដើម្បីប្រើប្រាស់មធ្យោបាយ បំបាត់ជំរកមូសខ្លា និងប្រភពដង្កូវទឹក។
លោក ឌួង សុជាតិ នាយកមជ្ឈមណ្ឌលជាតិប្រយុទ្ធនឹងជម្ងឺគ្រុនចាញ់ និងជម្ងឺគ្រុនឈាម បានលើកឡើងថា ថ្មីៗនេះ ថ្នាំ អាប៊ែត ( Abat ) សម្លាប់ដង្កូវទឹក ចំនួន ៦៦.៥១៩ គីឡូក្រាម ត្រូវបានបែងចែក ដើម្បីដាក់ទៅក្នុងពាងទឹករបស់ប្រជាជន។ ចំណែកអាល់ប៊ែតចំនួន ១០០ តោនទៀត នឹងត្រូវផ្តល់ទៅកាន់សហគមន៍តាមមូលដ្ឋាននាពេលខាងមុខ។
កម្មវិធីជាតិប្រឆាំងជម្ងឺគ្រុនឈាម ក៏កំពុងសាកល្បងប្រើត្រី ៧ ពណ៌ ឬត្រីក្រឹម ដើម្បីសម្លាប់ដង្កូវទឹក ជំនួសថ្នាំ អាល់ប៊ែត ដែលមានតំលៃថ្លៃ។
ក្នុងរយៈពេល ៧ ខែ នៅឆ្នាំ២០១០នេះ មានអ្នកជំងឺគ្រុនឈាមចំនួន ៣.៧៧១ នាក់។ ក្នុងនោះមាន ១០ នាក់ ស្លាប់ ដោយសារជំងឺគ្រុនឈាម។ ខេត្តដែលកើតមានជំងឺគ្រុនឈាមច្រើនជាងគេ គឺខេត្តកំពង់ចាម, បន្ទាយមានជ័យ, កណ្តាល, ភ្នំពេញ, កំពង់ឆ្នាំង, កែប និងកំពត។
កាលពីឆ្នាំ២០០៩ ជម្ងឺគ្រុនឈាម នៅកម្ពុជា មានចំនួន ១១.៦៥២ ករណី និងបានសម្លាប់មនុស្សចំនួន ៣៧ នាក់។ ចំណែកឆ្នាំ២០០៨ មានចំនួន ៩.៤៥៦ ករណី ដោយបានសម្លាប់មនុស្ស ៦៥ នាក់។
អង្គការសុខភាពពិភពលោក បានប៉ាន់ប្រមាណថា មានប្រជាជនប្រហែលជា ២៥០០លាននាក់ នៅលើសកលលោក ត្រូវបានរងគ្រោះថ្នាក់ ដោយជម្ងឺគ្រុនឈាម ហើយប្រជាជនប្រហែលជា ៥០ លាននាក់ បានកើតជម្ងឺគ្រុនឈាមជារៀងរាល់ឆ្នាំ។ ក្នុងនោះ ជនរងគ្រោះប្រមាណ ២៥.០០០ នាក់ ត្រូវបានស្លាប់បាត់បង់ជីវិតក្នុង១ឆ្នាំៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ