ក្រោយចូលឆ្នាំ នាយករដ្ឋមន្ដ្រីខ្មែរ-ថៃ នឹងជិះរថភ្លើងរួមគ្នាដើម្បីតភ្ជាប់ផ្លូវដែកនៃប្រទេសទាំងពីរ
លោកនាយករដ្ឋមន្ដ្រី ហ៊ុន សែន និងសមភាគីថៃ លោក ប្រាយុទ្ធ ចាន់អូចារ នឹងជិះរថភ្លើងរួមគ្នា នៅថ្ងៃទី២២ខែមេសាខាងមុខ ដើម្បីជានិមិត្តរូបនៃការតភ្ជាប់ការដឹកជញ្ជូនតាមផ្លូវដែកឆ្លងកាត់ព្រំដែននៃប្រទេសទាំងពីរ។ នេះបើតាមការជូនដំណឹងរបស់ក្រសួងសាធារណការ និង ដឹកជញ្ជូន។ សម្រាប់ក្រសួងសាធារណការនិងដឹកជញ្ជូន នេះគឺជាព្រឹត្តិការណ៍ប្រវត្តិសាស្ត្ររបស់ប្រទេសកម្ពុជានិងថៃ។ ចំណែកអ្នកជំនាញផ្នែកសេដ្ឋកិច្ចវិញ មើលឃើញថា ការតភ្ជាប់ផ្លូវដែករវាងកម្ពុជានឹងថៃនេះ នឹងជួយសម្រួលការដឹកជញ្ជូនរវាងប្រទេសទាំងពីរ ជាពិសេសអាចពង្រីកទំហំពាណិជ្ជកម្មរវាងប្រទេសទាំងពីរ ឲ្យបានកាន់តែធំធេងជាងមុនថែមទៀត។
ចុះផ្សាយនៅថ្ងៃ៖
បើតាមការគូសបញ្ជាក់របស់ក្រសួងសាធារណការនិងដឹកជញ្ជូន នៅថ្ងៃទី២២ខែមេសា ក្រោយពិធីបុណ្យចូលឆ្នាំ លោកនាយករដ្ឋមន្ដ្រី ហ៊ុន សែន និង លោកនាយករដ្ឋមន្ដ្រី ប្រាយុទ្ធ ចាន់អូចារ នឹងចុះហត្ថលេខាលើកិច្ចព្រមព្រៀងសហប្រតិបត្តិការរួមគ្នា លើការដឹកជញ្ជូនឆ្លងកាត់ព្រំដែនរវាងប្រទេសទាំងពីរ ព្រមទាំងធ្វើពិធីប្រគល់និងទទួលក្បាលរថភ្លើង ដែលជាអំណោយរបស់រដ្ឋាភិបាលថៃ ជូនរដ្ឋាភិបាលកម្ពុជា។ បន្ថែមពីលើនោះ លោកទាំងពីរក៏នឹងធ្វើដំណើរតាមរថភ្លើងរួមគ្នា ពីស្ថានីយ៍បានខ្លងលឹក មកកាន់ស្ថានីយ៍រថភ្លើងប៉ោយប៉ែត ដើម្បីជានិមិត្តរូបនៃការតភ្ជាប់ផ្លូវដែករវាងប្រទេសទាំងពីរផងដែរ។
សូមជម្រាបជូនថា ការតភ្ជាប់ផ្លូវដែកកម្ពុជាថៃនេះ ធ្វើឡើងបន្ទាប់ពីកម្ពុជាបានបញ្ចប់ការស្ដារផ្លូវដែកភាគខាងជើងរបស់ខ្លួន ពីប៉ោយប៉ែតមកភ្នំពេញ នៅចុងឆ្នាំ២០១៨។ ការស្ដារផ្លូវដែកពីប៉ោយប៉ែតមកភ្នំពេញ ដែលមានប្រវែងសរុប៣៨៦គីឡូម៉ែត្រ ត្រូវចំណាយថវិកាប្រមាណ៧៧លានដុល្លារសហរដ្ឋអាមេរិក។ ក្នុងនោះ ទឹកប្រាក់ជាង១៣លានដុល្លារ គឺជាជំនួយរបស់ធនាគារអភិវឌ្ឍអាស៊ី ADB, ជាង៦៣លានដុល្លារ ជាទឹកប្រាក់របស់រដ្ឋាភិបាលកម្ពុជា, និងជំនួយជាដែកពីម៉ាឡេស៊ីខ្លះផង។
អ្នកជំនាញសេដ្ឋកិច្ចមើលឃើញថា ការស្ដារផ្លូវដែកភាគខាងជើងរបស់កម្ពុជា នឹងជួយសម្រួលការដឹកជញ្ជូនរវាងប្រទេសកម្ពុជា-ថៃ ព្រមទាំងអាចពង្រីកទំហំពាណិជ្ជកម្មរវាងប្រទេសទាំងពីរឲ្យបានកាន់តែធំធេងជាងមុន ខណៈទំនិញនាំចូលមកកម្ពុជាពីប្រទេសថៃ មាន៧០ភាគរយ ចូលតាមច្រកប៉ោយប៉ែត។
សម្រាប់ប្រទេសថៃ កម្ពុជាគឺជាដៃគូពាណិជ្ជកម្មដ៏សំខាន់មួយ នៅក្នុងចំណោមប្រទេសអាស៊ាន។ ពាណិជ្ជកម្មទ្វេភាគីរវាងប្រទេសទាំងពីរមានទំហំ ៨,៣ ប៊ីលានដុល្លារនៅឆ្នាំ២០១៨ ដែលចំនួននេះ កើនឡើងប្រមាណ៣៥,៥ភាគរយ បើធៀបនឹងឆ្នាំ២០១៧។ កម្ពុជានិងថៃ ប្ដេជ្ញាពង្រីកទំហំពាណិជ្ជកម្មរួមគ្នាឲ្យបាន១៥ប៊ីលានដុល្លារ នៅឆ្នាំ២០២០ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ