លីកាដូ៖ ពលរដ្ឋរងគ្រោះព្រោះរឿងដីធ្លីកើនឡើងបីដងក្នុងឆ្នាំ២០១៤
នៅថ្ងៃព្រហស្បតិ៍នេះ អង្គការសម្ព័ន្ធខ្មែរជំរឿន និងការពារសិទ្ធិមនុស្ស “លីកាដូ” បានចេញសេចក្តីថ្លែងការណ៍មួយបង្ហាញពីការកើនឡើងជាថ្មីនៃជម្លោះដីធ្លីនៅក្នុងប្រទេសកម្ពុជា។ ជាការកើនឡើងនៅក្នុងឆ្នាំ២០១៤ ដែលអង្គការនេះរកឃើញថា មានចំនួនដល់ទៅបីដង បើធៀបនឹងឆ្នាំ២០១៣។ អង្គការលីកាដូ បានអំពាវនាវដល់រដ្ឋាភិបាលកម្ពុជា និងអាជ្ញាធរពាក់ព័ន្ធ ធ្វើការដោះស្រាយបញ្ហាជម្លោះដីធ្លីទាំងនោះជាបន្ទាន់។
ចុះផ្សាយនៅថ្ងៃ៖
ស្តាប់ - ០២:០៩
យ៉ាងហោចណាស់ប្រជាពលរដ្ឋជាងមួយម៉ឹន៦រយគ្រួសារ(១០,៦២៥គ្រួសារ)ឫប្រមាណជាង៤ម៉ឹន៩ពាន់៥រយនាក់(៤៩,៥១៩នាក់) បានទទួលរងផលប៉ះពាល់ដោយសារជម្លោះដីធ្លីនៅក្នុងឆ្នាំ២០១៤ ដែលចំនួននេះ ភាគច្រើនកើតឡើងនៅក្នុងខេត្តចំនួន១៣នៅទូទាំងប្រទេសកម្ពុជា។ នេះគឺជារកការឃើញរបស់អង្គការលីកាដូ ។ លីកាដូ បានបន្តថា ចំនួននេះបើប្រៀបធៀបនឹងឆ្នាំ២០១៣កន្លងទៅ គឺបានកើនឡើងចំនួនបីដង ដែលឆ្នាំ២០១៣ មានពលរដ្ឋរងគ្រោះតែចំនួនជាង៣ពាន់៤រយគ្រួសារ(៣,៤៧៥គ្រួសារ)ប៉ុណ្ណោះ។
នៅក្នុងសេចក្តីថ្លែងការណ៍របស់ខ្លួនក្រោមចំណងជើងថា “ការកើនឡើងជាថ្មីនៃជម្លោះដីធ្លី គួរតែត្រូវបានដោះស្រាយជាបន្ទាន់” លីកាដូ បានសម្តែងការព្រួយបារម្ភជាខ្លាំងចំពោះទិន្នន័យនៃការកើនឡើងខ្លាំងបែបនេះ។ លោកអំ សំអាត អ្នកសម្របសម្រួលបច្ចេកទេសស៊ើបអង្កេតរបស់អង្គការលីកាដូ បានលើកឡើងថា មូលហេតុដែលធ្វើឲ្យបញ្ហាជម្លោះដីធ្លីនៅក្នុងប្រទេសកម្ពុជាកើនឡើងដូច្នេះរួមមានដូចជា អំពើពុករលួយនិងប្រព័ន្ធតុលាការមាននិន្នាការនយោបាយ ការប្រើប្រាស់កងកម្លាំងប្រដាប់អាវុធខុសច្បាប់ដែលរួមមានកងយោធា និងការចូលពាក់ព័ន្ធរបស់ក្រុមហ៊ុនដែលមានទំនាក់ទំនងល្អជាមួយអាជ្ញាធររដ្ឋ និង ដោយអាជ្ញាធររដ្ឋផ្ទាល់។
ក្រៅពីបង្ហាញនូវការកើនឡើងនៃពលរដ្ឋរងគ្រោះព្រោះរឿងជម្លោះដីធ្លីនៅក្នុងឆ្នាំចាស់ លីកាដូក៏បានបង្ហាញពីស្ថានភាពជម្លោះដីធ្លីនៅក្នុងឆ្នាំថ្មី២០១៥នេះផងដែរ។ ឆ្នាំ២០១៥ បើតាមលីកាដូ ស្ថានភាពជម្លោះដីធ្លី មិនទាន់មានសញ្ញាអ្វីប្រសើរឡើងនោះទេ ។ ជាងនេះទៅទៀត ឆ្នាំ២០១៥ បានបើកទំព័រជាមួយនឹងការកើនឡើងនៃការបំផ្លិចបំផ្លាញ ដោយសារប្រជាពលរដ្ឋកម្ពុជានៅតែបន្តត្រូវបានគេបណ្តេញចេញដោយបង្ខំពីផ្ទះសម្បែងរបស់ពួកគេ។ អង្គការលីកាដូ បាន សម្តែងការសោកស្តាយចំពោះអាជ្ញាធររដ្ឋដែលបានសន្យាម្តងហើយម្តងទៀតចំពោះការស្វែងរកដំណោះស្រាយលើបញ្ហាដីធ្លីជូនប្រជាពលរដ្ឋ។
យ៉ាងណាក៏ដោយ ក្រសួងរៀបចំដែនដី នគរូបនីយកម្ម និងសំណង់ នៅព្រឹកថ្ងៃព្រហស្បតិ៍នេះ មិនអាចទាក់ទងសុំការអធិប្បាយបាននៅឡើយទេ ជុំវិញការលើកឡើងរបស់អង្គការលីកាដូនេះ។ អង្គការលីកាដូ បានអំពាវនាវទៅដល់រដ្ឋាភិបាលកម្ពុជាដូចអាជ្ញាធរដែលជាប់ពាកព័ន្ធទាំងអស់ឲ្យទទួលស្គាល់នូវបញ្ហាជម្លោះដីធ្លីដែលកំពុងកើតមានទាំងនេះ ហើយចាត់វិធានការសមរម្យណាមួយ ដើម្បីដោះស្រាយជាបន្ទាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ