គណៈកម្មការទី១ នឹងឃ្លាំមើលចំណាត់ការរបស់ក្រសួងកសិកម្មក្នុងការដោះស្រាយបញ្ហាដីធ្លី
ដំណោះស្រាយ ជូនប្រជាពលរដ្ឋដែលមានបញ្ហាដីធ្លី មួយចំនួន ពិសេសនៅតំបន់ចំនួន៣ ត្រូវបានលើកឡើងនៅក្នុងការឆ្លើយបំភ្លឺរបស់រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ នៅក្នុងជំនួបជាមួយនឹងប្រធានគណៈកម្មការទី១នៃរដ្ឋសភា នាព្រឹកថ្ងៃទី ០៩ ខែ កុម្ភៈឆ្នាំ ២០១៥នេះ។ លោក អេង ឆៃអ៊ាង បានថ្លែងប្រាប់ក្រុមអ្នកកាសែតក្រោយជំនួបថា គណៈកម្មការទី១របស់លោក ទទួលយកចំណាត់ការរបស់ក្រសួងកសិកម្ម ប៉ុន្តែនឹងនៅតែឃ្លាំមើលការអនុវត្តផ្ទាល់។
ចុះផ្សាយនៅថ្ងៃ៖
ស្តាប់ - ០២:០០
គណៈកម្មការទី១ នៃរដ្ឋសភា បានស្នើអោយក្រសួងកសិកម្ម ដោះស្រាយបញ្ហាដីធ្លីដោយកុំអោយមានគំនាបពីតុលាការ និង ពន្លឿនដំណោះស្រាយបញ្ហាដីធ្លី ជូនដល់ប្រជាពលរដ្ឋទាំងឡាយពិសេសគឺតំបន់ជម្លោះដែលមានទីតាំងនៅភូមិខ្នងក្រពើលិចនិងខ្នងក្រពើកើត ក្នុងឃុំត្រមូង ស្រុកមេមត់ខេត្តត្បូងឃ្មុំ ដែលអូសបន្លាយយូរ ណាស់មកហើយ។ លោក អេង ឆៃអ៊ាង បានថ្លែងដូច្នេះក្រោយជំនួបជាមួយថ្នាក់ដឹកនាំក្រសួងកសិកម្ម។
ឆ្លើយតបនឹងក្តីព្រួយបារម្ភរបស់គណៈកម្មការទី១នៃរដ្ឋសភា លោក អ៊ុក រ៉ាប៊ុន រដ្ឋមន្ត្រីក្រសួងកសិកម្មដែលបង្ហាញសុទិដ្ឋិនិយមក្នុងការដោះស្រាយបញ្ហាជូនប្រជាពលរដ្ឋ បានបញ្ជាក់ថា ចំពោះបញ្ហាដីធ្លីនៅសាលាកសិកម្មព្រែកលៀប ក្រសួងត្រូវការពេលវេលាខ្លះដើម្បីដោះស្រាយ ព្រោះវាមានចំនុចមួយចំនួនដែលជាវិវាទរវាងក្រុមហ៊ុននិង ប្រជាពលរដ្ឋ។ចំនែក ជម្លោះដីធ្លីនៅភូមិខ្នងក្រពើលិចនិងខ្នងក្រពើកើត ក្រសួងកំពុងតែជម្រុញពន្លឿនការដោះស្រាយ ។
រីឯជម្លោះដីធ្លីរបស់សហគមន៍ជនជាតិគួយ នៅឃុំប្រមេរ ស្រុកត្បែងមានជ័យ ខេត្តព្រះវិហារ លោក រដ្ឋមន្ត្រីបានបញ្ជាក់ថាកន្លងមកមិនមានការស្នើសុំចុះបញ្ជីដីនោះទេ។ ដូច្នេះដើម្បីដោះស្រាយ លោកសូមអំពាវនាវអោយក្រុមសហគមន៍ជនជាតិ លើកសំណូមពរនិង ដាក់សំនើរសុំចុះបញ្ជីដីធ្លី ដែលជាកម្មសិទ្ធិផ្ទាល់ខ្លួន និង ដីដែលជាកម្មសិទ្ធិសហគមន៍។ ក្រៅពីនេះ លោករដ្ឋមន្ត្រី អោយដឹងថា សកម្មភាពរបស់ក្រុមហ៊ុន ត្រូវបានសម្រេចអោយផ្អាករហូតទាល់តែ ការដោះស្រាយបានបិទបញ្ចប់។
សូមបញ្ជាក់ថាគណៈកម្មការទី១នៃរដ្ឋសភា បាន កោះហៅរដ្ឋមន្ត្រីក្រសួងកសិកម្ម រុក្ខាប្រមាញ់ និង នេសាទ អោយឆ្លើយបំភ្លឺទាក់ទងនឹងទំនាស់ដីធ្លីជាច្រើនករណី ដែលជាប់ពាក់ព័ន្ធនឹងក្រសួង ក្រោយពីគណៈកម្មការនេះ បានទទួលពាក្យបណ្តឹងពីប្រជាពលរដ្ឋដែលមានទំនាស់ដីធ្លី និង បានចុះទៅដល់ទីកន្លែងជួបជាមួយប្រជាពលរដ្ឋ ហើយពិនិត្យឃើញថា មានភាពមិនប្រក្រតីជាច្រើនរបស់អាជ្ញាធរមានសមត្ថកិច្ច ក្នុងការអនុវត្តសេចក្តីសម្រេចរបស់រាជរដ្ឋាភិបាល។ ក្នុងនោះក្រៅពីករណីដីធ្លីទាំង៣កន្លែងដែលបានលើកឡើងខាងលើក៏រួមមាន ជម្លោះដីធ្លីនៅ ខេត្តក្រចេះនិង ខេត្តកោះកុង ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ