កសិករនឹងមានសង្ឃឹមពីទីផ្សារកសិផលរបស់ខ្លួនប្រសិនបើមានការប្រកួតប្រជែងបែបតម្លៃបែបទីផ្សារសេរី
ចុះផ្សាយនៅថ្ងៃ៖
ស្តាប់ - ០៤:៥៣
ភាពផ្តាច់មុខនៅក្នុងការទិញកសិផលពីប្រជាកសិករខ្មែរ ត្រូវបានស្តីបន្ទោសដោយប្រមុខរដ្ឋាភិបាលថាអាចមានការឃុបឃិតគ្នារវាងឈ្មួញកណ្តាលនិងអាជ្ញាធរមូលដ្ឋាន ដែលទង្វើនេះត្រូវបានបញ្ជាឲ្យអាជ្ញាធរខេត្តដោះស្រាយនិងបញ្ឈប់សកម្មភាពទាំងនេះ។ ជាការកត់សម្គាល់ការដែលឈ្មួញប្រើប្រាស់យុទ្ធសាស្ត្រផ្សេងៗដើម្បីក្រឡុកតម្លៃទីផ្សារកសិផលបានកើតមានជាយូរមកហើយ ហើយទើបតែពេលនេះដែលក្រសួងកសិកម្មមានវិធានការ ហើយប្រមុខរដ្ឋាភិបាលបានជម្រុញបន្ថែមទៀតកាលពីម្សិលមិញ។
ភាពផ្តាច់មុខទាក់ទងទៅនឹងការទិញកសិផលរបស់ឈ្មួញខិលខូចមួយចំនួន នៅក្នុងប្រទេសកម្ពុជាមិនមែនជារឿងថ្មីនោះទេ។ នៅតាមខេត្តនិងជនបទនានា ភាពផ្តាច់មុខនេះតែងកើតមានឡើង ដោយឈ្មួញកណ្តាល ដែលអាជ្ញាធរមូលដ្ឋានបិទផ្នែកបិទត្រចៀក ឬក៏សាច់ញាតិអាជ្ញាធរខ្លះដើរតួនាទីជាឈ្មួញកណ្តាល ដែលជាអ្នកប្រព្រឹត្តិដោយផ្ទាល់។
ការដែលបើកឱកាសឲ្យឈ្មួញកណ្តាលដែលទទួលទិញកសិផលពីប្រជាពលរដ្ឋធ្វើព្យុះធ្វើភ្លៀងស្រេចតែអំពើចិត្ត ទើបតែកំរើកឡើងខ្លាំងនៅពេលនេះ ហើយកាលពីថ្ងៃទី៣ឧសភាថ្មីៗនេះ ក្រសួងកសិកម្មបានចេញសេចក្តីប្រកាសមួយទាក់ទងទៅនឹងការលក់កសិផលពីប្រជាពលរដ្ឋ។
ក្រសួងកសិកម្មបានបញ្ជាក់ថាស្ថាប័នសមីនេះបានទទួលព័ត៌មានថា មានឈ្មួញខិលខូចរៀបចំវិធានការមិនស្របច្បាប់ និងខុសក្រឹត្យក្រមទីផ្សារសេរី ធ្វើឲ្យប្រជាជនបាត់ឱកាសក្នុងការលក់កសិផលនានា ជាពិសេសស្រូវតាមតម្លៃទីផ្សារពិតប្រាកដ ហើយត្រូវឲ្យលក់តាមតម្លៃថោកដែលឈ្មួញទាំងនោះបានកំណត់។
បន្ថែមពីលើនេះលោកនាយករដ្ឋមន្ត្រី ហ៊ុន សែន កាលពីព្រឹកថ្ងៃទី៤ឧសភា បានថ្លែង លើកឡើងពីបញ្ហាទីផ្សារកសិផលផងដែរ។ លោកនាយករដ្ឋមន្ត្រី មានប្រសាសន៍ពីភាពផ្តាច់មុខរបស់ឈ្មួញដែលមានការឃុបឃិតជាមួយនឹងអាជ្ញាធរក្នុងការទិញស្រូវពីប្រជាពលរដ្ឋនៅតំបន់ផលិតស្រូវ ដែលធ្វើឲ្យតម្លៃទីផ្សារស្រូវ មិនអាចអនុវត្តទៅតាមគោលការណ៍សេដ្ឋកិច្ចទីផ្សារសេរី។
ករណីនេះអ្នកដែលតាមដានដំណើរវិវត្តលើវិស័យកសិកម្ម មិនមានការភា្ញក់ផ្អើលទេ ព្រោះ ទង្វើបែបនេះ បានកើតឡើងចាប់តាំងពីប្រទេសកម្ពុជាបានប្តេជ្ញាចិត្តក្នុងការនាំចេញអង្ករឲ្យបាន១លានតោនក្នុងមួយឆ្នាំ។
អ្វីដែលជាការកត់សម្គាល់នោះគឺបញ្ហាទទួលទិញកសិផលផ្តាច់មុខនោះគឺកើតឡើងជាពិសេសនៅតាមខេត្តដែលជាប់ព្រុំដែនប្រទេសជិតខាង។ជាទូទៅរូបភាពដែលឈ្មួញកណ្តាលចំណាំអនុវត្តហើយដែលមានការពាក់ព័ន្ធពីអាជ្ញាធរមូលដ្ឋាននោះគឺ ការមិនអនុញ្ញាតឲ្យមានការប្រកួតប្រជែងតម្លៃទិញពីឈ្មួញដទៃ ដែលប្រាសចាកនឹងគោលការណ៍សេដ្ឋកិច្ចទីផ្សារសេរី។
មួយវិញទៀតការទម្លាក់តម្លៃកសិផលដែលកសិករជួបប្រទះជាញឹកញាប់ គឺដោយលើកឡើងថា ទិន្នផលច្រើន សំបូរហូរហៀរ ឬក៏គ្មានអ្នកទិញបន្ត ជាដើម ដែលលេសនេះត្រូវគេប្រើសម្រាប់ធ្វើបាបកសិករ ធ្វើឲ្យកសិករធ្វើស្រែក្នុងមួយរដូវមិនបានសល់អ្វីទាំងអស់ ផ្ទុយទៅវិញមានតែជំពាក់បំណុលគេ។
ក្រៅពីនេះកសិករនៅមានជម្រើសបង្កបង្កើនផលមួយទៀតគឺឈ្មួញបានឲ្យប្រជាកសិករខ្ចីបុលដើម្បីបានដើមក្នុងការដាំដុះនិងទិញសម្ភារៈ ជី ឬ ថ្មាំគីមីជាដើម។ លុះដល់ពេលបានផលកសិករត្រូវលក់ឲ្យម្ចាស់បំណុលតែម្នាក់គត់ មិនមានសិទ្ធិលក់ឲ្យអ្នកដទៃឡើយ។ រូបភាពនេះ ឃើញថាកសិករក៏មានការខាតបង់ដែរ ដោយសារស្រូវដែលលក់ឲ្យឈ្មួញម្ចាស់បំណុលបានតម្លៃត្រឹម ១ពាន់រៀលប៉ុណ្ណោះក្នុងមួយគីឡូក្រាម ក៏ប៉ុន្តែបើលក់ឲ្យអ្នកក្រៅយ៉ាងហោចណាស់ ក៏បានមួយគីឡូក្រាមតម្លៃ១២០០រៀលដែរ។ នេះគ្រាន់ជាឧទាហរណ៍មួយជាក់ស្តែង ដែលបានកើតមានឡើងនៅតំបន់ផលិតស្រូវប៉ុណ្ណោះ។ លើសពីនេះបញ្ហាគុណភាពក៏ជាការបង្អាប់មួយពីឈ្មួញ ជម្រុញឲ្យមានការទំលាក់ថ្ងៃផងដែរ។
ដូច្នេះប្រតិកម្មខ្លាំងៗរបស់ប្រមុខរដ្ឋាភិបាលនាពេលនេះវាមិនទាន់ហួសពេលទេ ដោយសារកម្ពុជាត្រូវការហូបបាយ និងនាំចេញអង្ករ ហើយកសិករនៅតែបន្តការដាំដុះដំណាំស្រូវ។ចង់មិនចង់ប្រសាសន៍របស់លោកនាយករដ្ឋមន្ត្រី ប្រាកដជាមានឥទ្ធិពលគ្របដណ្តប់លើអាជ្ញាធរមូលដ្ឋាន និងជួយឲ្យប្រជាជនមានទំនុកចិត្តក្នុងការបង្កបង្កើនផលរបស់ខ្លួន ហើយជាផ្នែកមួយជួយទប់ស្កាត់ការចំណាកស្រុកផងដែរ។
ក៏ប៉ុន្តែទាំងអស់នេះវាទាមទារនូវការតាំងចិត្តនិងឆន្ទៈពិតប្រាកដមួយ របស់អាជ្ញាធរមូលដ្ឋាននិងតាមបណ្តាខេត្តក្នុងការគោរពការណែនាំនេះ។បើពុំនោះទេស្ថានការណ៍នឹងមិនអាចផ្លាស់ ប្តូរបានទេ ហើយឈ្មួញដែលខិលខូចនិងអាជ្ញាធរដែលឃុបឃិត នៅតែឆ្លៀតឱកាសបាន
ដដែល។
ពិតមែនហើយ ការលុបបំបាត់ឈ្មួញកណ្តាលដែលផ្តាច់មុខ វាជារឿងមួយដែលត្រូវអបអរសាទរ ក៏ប៉ុន្តែទន្ទឹមនឹងនេះរដ្ឋាភិបាលក៏ត្រូវជម្រុញដោះស្រាយទីផ្សារបន្ថែមទៀត ឲ្យប្រជាកសិករក្នុងការលក់ផលិតផលដែលផលិតបាន។
ដំណាលគ្នានេះគួរមានយន្តការកាត់បន្ថយឬទប់ស្កាត់ការនាំចូលកសិផលពីបរទេសដែល ប៉ះពាល់ដល់ការផលិតរបស់កសិករខ្មែរ។បន្ថែមពីលើនេះ ក៏គួរតែជួយដល់កសិករខ្មែរក្នុងការប្រើប្រាស់បច្ចេកវិទ្យាកសិកម្មទំនើប ព្រមទាំងដោះស្រាយបញ្ហាធារាសាស្ត្រផងដែរ ដែលនេះដើម្បីទប់ទល់នឹងអាកាសធាតុដែលប្រែប្រួលពីមួយថ្ងៃទៅមួយថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ