លោក ហ៊ុន សែនសង្ឃឹមថារដ្ឋមន្រ្តីក្រសួងសាធារណការថ្មីនឹងជួយដោះស្រាយបញ្ហាឈឺក្បាលរបស់លោក
អស់រយៈពេលជិតកន្លះឆ្នាំមកហើយ ដែលលោកនាយករដ្ឋមន្ត្រីហ៊ុន សែន ឈឺក្បាលដោយសារតែបញ្ហារបស់ក្រសួង សាធារណការ និងដឹកជញ្ជូន។ លោកបានទទូចឲ្យលោករដ្ឋមន្ត្រីថ្មីធ្វើយ៉ាងណាត្រូវតែដោះស្រាយបញ្ហាសាធារណការនេះឲ្យបាន ដើម្បីកុំឲ្យប្រជាពលរដ្ឋរអូរទាំនិងធុញទ្រាន់តទៅទៀត។ លោកនាយករដ្ឋមន្រ្តីបានថ្លែងយ៉ាងដូច្នេះនៅក្នុងឱកាសបើកសម្ពោធអគាររដ្ឋបាលសាលារាជធានីភ្នំពេញនៅព្រឹកថ្ងៃអង្គារ ទី៥ មេសានេះ។ ហើយលោកទេសរដ្ឋមន្ត្រីស៊ុន ចាន់ថុល ក៏នឹងផ្ទេរទៅកាន់តំណែងថ្មី នៅក្រសួងសាធារណការ និងដឹកជញ្ជូន ជំនួសលោករដ្ឋមន្ត្រីត្រាំ អ៊ីវតឹក នៅថ្ងៃទី ៦ មេសាស្អែកនេះផងដែរ។
ចុះផ្សាយនៅថ្ងៃ៖
ស្តាប់ - ០១:៤១
លោកទេសរដ្ឋមន្ត្រីស៊ុន ចាន់ថុល បានប្រកាសប្តេជ្ញាថាលោកនឹងប្រឹងអស់ពីកម្លាំងកាយចិត្តធ្វើកំណែទម្រង់នៅក្នុងក្រសួងសាធារណការ និងដឹកជញ្ជូនឲ្យបានល្អប្រសើរឡើង ដែលក្នុងនោះរួមមានការចេញប័ណ្ណបើកបរ ការកសាងផ្លូវថ្នល់ និងធ្វើយ៉ាងណាឲ្យការដឹកជញ្ជូនមានតម្លៃទាបបំផុតតាមដែលអាចធ្វើបាន ដើម្បីទាក់ទាញវិនិយោគិន និងភ្ញៀវទេសចរជាដើម។
លោកស៊ុន ចាន់ថុល ក៏ធ្លាប់បានបម្រើការងារនៅក្នុងក្រសួងសាធារណការ និងដឹកជញ្ជូនផងដែរកាលពីប៉ុន្មានឆ្នាំមុន ហើយលោកបានចេញពីក្រសួងនោះនៅឆ្នាំ២០០៨។ លោកក៏បានសំណូមពរឲ្យប្រជាពលរដ្ឋខ្មែរទាំងអស់ទុកពេលវេលាឲ្យលោកបន្តិច ហើយកុំមានការព្រួយបារម្ភអី ព្រោះថាលោកក៏មានជំនាញក្នុងការដោះស្រាយបញ្ហាអស់ទាំងនេះផងដែរ។
សូមរំលឹកជូនថា លោកស៊ុន ចាន់ថុល គឺជារដ្ឋមន្ត្រីមួយរូបដែលល្បីឈ្មោះ ខាងធ្វើកំណែទម្រង់ស៊ីជម្រៅ និងចូលរួមកាត់បន្ថយ អំពើពុករលួយនៅក្រសួងពាណិជ្ជកម្មតាមរយៈពេលការបង្កើតការចុះបញ្ជីពាណិជ្ជកម្មតាមរយៈប្រព័ន្ធអនឡាញ និងការជ្រើសរើសមន្ត្រីបម្រើការងារនៅក្នុងក្រសួងជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ