កុនខ្មែរមួយ ត្រូវបានជ្រើសរើសទៅប្រកួតយកពានរង្វាន់អន្តរជាតិអូស្ការ
ភាពយន្តប្រទេសកម្ពុជាមួយ ដែលមានចំណងជើងថា «តន្ត្រីជីវិត» ដឹកនាំដោយ លោកស្រី ខេលី សូ និង លោក សុខ វិសាល ត្រូវបានគណៈកម្មាធិការអូស្ការប្រចាំកម្ពុជា (COSC) ជ្រើសរើសដើម្បីយកទៅប្រកួតបន្តសម្រាប់ពានរង្វាន់ភាពយន្តជាលក្ខណៈអន្តរជាតិអូស្ការលើកទី៩២ ដែលនឹងប្រព្រឹត្តទៅនៅឆ្នាំ២០២០ខាងមុខនេះ។ នេះបើតាមការប្រកាសរបស់គណៈកម្មាធិការអូស្ការប្រចាំកម្ពុជា នៅព្រឹកថ្ងៃសុក្រនេះ។
ចុះផ្សាយនៅថ្ងៃ៖
ស្តាប់ - ០១:៣៨
លោកស្រី Mariam Arthur ប្រធានគណៈកម្មាធិការអូស្ការខេមបូឌា បានឲ្យដឹងថា ឆ្នាំនេះមានខ្សែភាពយន្តកម្ពុជាចំនួន២ ដែលតម្រូវឲ្យសមាជិកគណៈកម្មាធិការធ្វើការបោះឆ្នោត។ ភាពយន្តទាំង២រឿងនោះ គឺមានដូចជា ខ្សែភាពយន្តចំណងជើងថា «បោកចំបាប់» និង ខ្សែភាពយន្ត «តន្ត្រីជីវិត»។
លោកស្រីបានបន្តឲ្យដឹងទៀតថា ដំណើរការនៃការបោះឆ្នោតគឺមានចំនួន ២ជុំ។ ដោយជុំទី១ គឺជាការបោះឆ្នោតទៅលើ Yes ឬ No ដើម្បីបញ្ជាក់ថា តើខ្សែភាពយន្តនោះមានសភាពល្អសម្រាប់តំណាងឲ្យប្រទេសកម្ពុជាដែរទេ។ ឯជុំទី២នោះ គឺជាការវាយតម្លៃដាក់ពិន្ទុ ដោយផ្អែកទៅលើ សាច់រឿង ការដឹកនាំ ការសម្ដែង បច្ចេកទេសប្លង់ថត បច្ចេកទេសសំឡេង ភ្លេង និងប្រធានបទជាសកល។
លោកស្រី ឌី សាវ៉េត ដែលជាសមាជិកមួយរូប ក្នុងចំណោមសមាជិកគណៈកម្មាធិការបោះឆ្នោតផ្សេងៗទៀតបានមើលឃើញថា ចំពោះការបោះឆ្នោតទៅលើភាពយន្តទាំង២នេះ លោកស្រីបានផ្ដល់តម្លៃទៅលើផ្នែកដូចជា ផ្នែកសាច់រឿង តួសម្ដែង និងបច្ចេកទេសប្លង់ថត។ លោកស្រី ឌី សាវ៉េត បន្ថែមឲ្យដឹងទៀតថា ការសរសេរសាច់រឿងនោះល្អ បញ្ជាក់អំពីភាពមានគំនិត ហើយបើតួសម្ដែងគឺមើលថា ការសម្តែងរបស់តួនោះ ចំសាច់រឿងបានល្អ ឬ មធ្យម។ ឯបច្ចេកទេសប្លង់ថតវិញ គឺមើលថាតើប្លង់ថតនោះយកលំនាំត្រឹមត្រូវតាមឈុតឆាកដែរឬអត់។
គួរឲ្យដឹងដែរថា ក្រោយពេលត្រូវបានជ្រើសរើស ខ្សែភាពយន្ត «តន្ត្រីជីវិត» នេះ នឹងត្រូវបញ្ជូនបន្តទៅ The Academy ដើម្បីពិចារណាលើ ប្រភេទពានរង្វាន់លក្ខណៈអន្តរជាតិ របស់ពានរង្វាន់អូស្ការ។ ទោះយ៉ាងណាក្ដី ខ្សែភាពយន្តមួយនេះ នឹងត្រូវនៅរង់ចាំមើលទៀតថា វានឹងត្រូវបានជ្រើសរើសជា បេក្ខភាពចុងក្រោយសម្រាប់ដណ្ដើមយកពានរង្វាន់អូស្ការដែរឬទេ។
សូមបញ្ជាក់ថា ពិធីប្រគល់ពានរង្វាន់អូស្ការ គឺមានរៀបចំឡើងជារៀងរាល់ឆ្នាំ នៅហូលីវូដ សហរដ្ឋអាមេរិក ហើយពិធីប្រគល់ពានរង្វាន់នេះ គឺនឹងត្រូវធ្វើឡើងនៅថ្ងៃអាទិត្យ ទី៩ ខែកុម្ភៈ ឆ្នាំ២០២០ខាងមុខ៕
អត្ថបទដោយ៖ ងួន វឌ្ឍនៈបណ្ឌិត
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ