សមាគមអ្នកចិញ្ចឹមសត្វ៖ ការនាំជ្រូកចូលពីវៀតណាមបន្តកើតមានក្នុងរូបភាពតូច
ទោះបីជាមានការហាមឃាត់ការនាំចូលជ្រូកពីវៀតណាមក្តី តែការដឹកជ្រូកដោយម៉ូតូពីវៀតណាមមកកម្ពុជាដោយខុសច្បាប់នៅតែកើតមាន។ នេះបើតាមការអះអាងរបស់ប្រធានសមាគមអ្នកចិញ្ចឹមសត្វកម្ពុជា។ ការនាំជ្រូកពីវៀតណាមដោយខុសច្បាប់នេះ បន្តកើតឡើង ខណៈចិនវិញ បានហាមឃាត់មិនឲ្យមានការនាំជ្រូកពីកម្ពុជា ជុំវិញករណីជំងឺប៉េស្តជ្រូកអាហ្រ្វិក។
ចុះផ្សាយនៅថ្ងៃ៖
ស្តាប់ - ០២:០៨
ប្រធានសមាគមអ្នកចិញ្ចឹមសត្វកម្ពុជា លោក ស្រ៊ុន ពៅ បានអះអាងប្រាប់វិទ្យុបារាំងអន្តរជាតិនាថ្ងៃទី២ ខែឧសភានេះថាការនាំចូលជ្រូកពីវៀតណាមត្រូវបានបិទជាស្ថាពរហើយ ប៉ុន្តែនៅតែមានជនខិលខូចមួយចំនួនតូចដឹកជ្រូកតាមច្រករបៀងចូលមកទឹកដីកម្ពុជា។ លោកអះអាងថាសមាជិករបស់សមាគមអ្នកចិញ្ចឹមសត្វបានរាយការណ៍ពីករណី ដែលថាមានការដឹកជ្រូកខុសច្បាប់ពីវៀតណាមចូលមកកម្ពុជា។
កាលពីចុងខែកុម្ភៈ ក្រសួងកសិកម្មបានដាក់ចេញវិធានការបន្ទាន់ចំនួន៧ ដើម្បីបង្ការ និងទប់ស្កាត់ការឆ្លងរាលដាលជំងឺប៉េស្តជ្រូកអាហ្វ្រិក ចូលមកក្នុងប្រទេសកម្ពុជា។ វិធានការទាំងនោះ រួមមានៈ ការទប់ស្កាត់ការនាំចូលជ្រូករស់ និងផលិតផលជ្រូកគ្រប់ប្រភេទ ដែលខុសច្បាប់នៅតាមច្រកព្រំដែន។
លោក ស្រ៊ុន ពៅ លើកឡើងថាក្រសួងបានរឹតបន្តឹងខ្លាំងចំពោះការនាំជ្រូកពីក្រៅប្រទេសមែន ប៉ុន្តែមិនមានវិធានការដាក់ពន្ធធនាគារ ចំពោះអ្នកប្រព្រឹត្តឡើយ។ លោកយល់ថាក្រសួងអាចអនុវត្តវិធានការហាមឃាត់នេះបានតាមច្រកព្រំដែនដែលមានគយ និងប៉ូលីស ប៉ុន្តែពិបាកក្នុងការហាមឃាត់ជនខិលខូច ដែលដឹកជ្រូកដោយម៉ូតូតាមច្រករបៀង។
ប៉ុន្តែ លោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វបានអះអាងថាបច្ចុប្បន្ននេះកម្ពុជាមិនបាននាំចូលជ្រូកមកពីវៀតណាមទៀតទេ។
ទោះបីជាអាជ្ញាធរបានធ្វើការរឹតបន្តឹងការនាំជ្រូកពីវៀតណាមចូលមកក្នុងទឹកដីកម្ពុជាក្តី ប៉ុន្តែករណីជំងឺប៉េស្តជ្រូកអាហ្វ្រិក នៅតែផ្ទុះឡើងនៅកម្ពុជាក្នុងខេត្តរតនគិរី។ បន្ទាប់ពីករណីនេះកើតឡើងចិន បានប្រកាសមិនអនុញ្ញាតឲ្យមានការនាំជ្រូកពីប្រទេសកម្ពុជាចូលក្នុងប្រទេសចិនឡើង។ នេះបើតាមការចុះផ្សាយរបស់សារព័ត៌មាន Reuters កាលពីចុងខែមេសា។
សូមជម្រាបជូនថា ករណីប៉េស្តជ្រូកអាហ្វ្រិក បានផ្ទុះឡើងជាលើកដំបូងនៅកម្ពុជា ក្នុងខេត្តរតនគិរី ស្រុកអូរជុំ និងស្រុកអូរយ៉ាដាវ កាលពីដើមខែមេសាកន្លងទៅ។ បើតាមលោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ រហូតមកដល់ពេលនេះ មិនមានករណីនេះផ្ទុះឡើងបន្តទៅស្រុក ឬខេត្តផ្សេងទៀតទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ