ក្រោយលទ្ធផលឆ្នោតសភា សហភាពអឺរ៉ុប អាចនឹងប្តូរទិសដៅនយោបាយ ?
ចុះផ្សាយនៅថ្ងៃ៖
ស្តាប់ - ០៤:១០
ប្រមុខដឹកនាំប្រទេសជាសមាជិកទាំង២៨របស់សហភាពអឺរ៉ុប ហាក់បានទទួលមេរៀនដ៏ជូរចត់មួយ ពីការបោះឆ្នោតសភា ថ្ងៃទី ២៥ឧសភា។ ការបោះឆ្នោតដែលក្រុមអ្នកប្រឆាំងនឹងអឺរ៉ូ ព្រមទាំងក្រុមជាតិនិយមជ្រុលប្រឆាំងនឹងអឺរ៉ុប បានទទួលសំឡេងគាំទ្រមានមុខមានមាត់ និងអាសនៈនៅក្នុងសភាអឺរ៉ុប នាំមុខដាច់ ក្នុងករណីប្រទេសបារាំង។ លោកប្រធានាធិបតីបារាំង ហ្វ្រង់ស័រ ហូឡង់ យល់ថាជ័យជំនះ របស់បក្សស្តាំជ្រុលនិយម រណសិរ្សជាតិ ក្នុងសម័យបោះឆ្នោតសភាអឺរ៉ុបនេះ មិនមែនត្រឹមតែបរាជ័យរបស់រដ្ឋាភិបាលបារាំងទេ តែជាបញ្ហារបស់អឺរ៉ុប និងទាមទារឱ្យអឺរ៉ុបប្តូរផ្លាស់។
ក្រោយមហន្តរាយ ដល់វេលាដែលត្រូវពន្យល់បំភ្លឺ ! ប្រមុខរដ្ឋ ប្រមុខរដ្ឋាភិបាលប្រទេសជាសមាជិកអឺរ៉ុបមួយចំនួន បានធ្វើដំណើរទៅជួបប្រជុំនៅរដ្ឋធានីអឺរ៉ុប ទាំងអារម្មណ៍មួរហ្មង ! កំណើនសំឡេងក្រុមអ្នកប្រឆាំងនឹងអឺរ៉ុប ក្នុងសភា គឺដូចព្រនង់យកវាយសំពងថ្នាក់ដឹកនាំអឺរ៉ុបដូច្នេះ។ ការពិភាក្សាពិគ្រោះបានធ្វើឡើងយ៉ាងឆ្វែងឆ្វាត់ មុនជំនួបបើក។
ជាការពិតណាស់ដែលថាម្នាក់ មានទស្សនៈផ្សេងគ្នា និងបកស្រាយខុសគ្នា ចំពោះលទ្ធផលឆ្នោតថ្ងៃ២៥ឧសភា ដែលបណ្តាជនអឺរ៉ុបបានបញ្ចេញតាមរយៈសន្លឹកឆ្នោត។ សម្រាប់លោកប្រធានាធិបតីបារាំង ការស្ទុះឡើងខ្លាំង និងជោគជ័យរបស់គណបក្សរណសិរ្សជាតិ ស្តាំនិយមជ្រុល ម៉ារីន ឡឺប៉ែន ក៏មកពីបណ្តាជនបារាំងចង់ច្រានចោលនយោបាយរឹតត្បិតរបស់អឺរ៉ុប។ “អឺរ៉ុបត្រូវតែទទួលដឹងឮនូវអ្វីដែលកើតឡើងនៅប្រទេសបារាំង !” “ព្រោះមិនមែនជាបញ្ហារបស់បារាំងម្នាក់ឯងទេ តែក៏ជាបញ្ហារបស់អឺរ៉ុបដែរ” ! នេះជាប្រសាសន៍របស់លោកហូឡង់ នៅពេលអញ្ជើញដល់ក្រុងព្រុចសែលភ្លាម ក្នុងអត្ថន័យបន្ទោសអឺរ៉ុប ដែលមិនចេះឆ្លើយតបទៅនឹងសេចក្តីត្រូវការ ទៅនឹងការរង់ចាំរបស់ប្រជាពលរដ្ឋ។ “ត្រូវប្តូរផ្លាស់អឺរ៉ុប” ! បើចង់ឃើញការបោះឆ្នោតលើកក្រោយ មានលទ្ធផលប្រឆាំងអឺរ៉ុបដូចអ្វីដែលបារាំងបានជួបនៅលើកនេះ។
បារាំងជារដ្ឋស្ថាបនិកមួយរបស់សហភាពអឺរ៉ុប ជាប្រជាជាតិដ៏ដំសំខាន់មួយមិនអាចខ្វះបាន ក្នុងជួយជំរុញអឺរ៉ុបឱ្យដើរទៅមុខ។ ក្នុងន័យនេះលោកហ្វ្រង់ស័រ ហូឡង់ បានបញ្ជាក់អំពីឆន្ទៈ តម្រង់ទិសអឺរ៉ុប ឡើយ ជាមួយនឹងកម្លាំងខ្លាំងជាងមុន ពោលគឺធ្វើឱ្យអឺរ៉ុបមានកំណើនសេដ្ឋកិច្ច មាន ការងារ និងអន្តរកាលថាមពល។
អង់គ្លេសគាំទ្របារាំង តែអាល្លឺម៉ង់មិនយល់ស្រប
បារាំងនិងអង់គ្លេស ប្រកាន់យកបន្ទាត់នយោបាយអឺរ៉ុប តែមួយ ជាការកម្របំផុតមែន ប៉ុន្តែអាចទៅរួច ! នាយករដ្ឋមន្ត្រី អង់គ្លេស ដេវីត កាមឺរោន បានប្រកាសទាមទារដូចគ្នា ឱ្យអឺរ៉ុបធ្វើកំណែទម្រង់ ! ព្រោះពេលនេះ « អឺរ៉ុបរីកធំជ្រុល អឺរ៉ុបផ្តាច់ការជ្រុល អឺរ៉ុបជ្រៀតជ្រែកជ្រុល »។ មិនខុសពីប្រធានាធិបតីបារាំង លោកនាយករដ្ឋមន្ត្រីអង់គ្លេស គ្មានជម្រើសអ្វី ក្រៅពីខំត្រដរការពារនយោបាយ តាមរយៈការបង្ខំអឺរ៉ុបឱ្យធ្វើការប្តូរផ្លាស់នោះទេ។ អង់គ្លេសបានជួបក្តី អាម៉ាសយ៉ាងខ្លាំង មិនចាញ់បារាំងឡើយ ព្រោះ គណបក្សប្រឆាំងអឺរ៉ុប Ukip ដែលធ្លាប់ទាមទារឱ្យអង់គ្លេសដកខ្លួនចេញពីសហភាពអឺរ៉ុប បាននាំមុខនៅក្នុងការបោះឆ្នោតសភាអឺរ៉ុបលើកនេះ។
« ដល់វេលាដែលត្រូវប្តូរផ្លាស់នយោបាយអឺរ៉ុបហើយ » ! នេះជាសំឡេង របស់ឮប្រមុខដឹកនាំរដ្ឋាភិបាលអ៊ីតាលី Matteo Renzi។ បានទទួលសំឡេងគាំទ្រ យ៉ាងត្រចះត្រចង់ ផ្ទុយពីបារាំងនិងអង់គ្លេស អ្នកឆ្វេងកណ្តាលនិយមរូបនេះ ក៏ស្នើសុំឱ្យអឺរ៉ុបផ្តល់ចម្លើយលឿនៗដែរ។ សម្រាប់លោក អឺរ៉ុបត្រូវចាត់ចែងដោះស្រាយឱ្យបានឆាប់ ការតែងតាំងថ្នាក់ដឹកនាំស្ថាប័ន និងកំណត់កាលបរិច្ឆេទបញ្ចេញសកម្មភាព ផ្តល់សន្ទុះសេដ្ឋកិច្ច ការងារ និងចំណាត់ការទប់ទល់នឹងចរន្តអន្តោប្រវេសន៍។
ប៉ុន្តែអ្នកដែលមានតួនាទី សំខាន់និងស្នូលបំផុត គឺលោកស្រី ប្រមុខរដ្ឋាភិបាលអាល្លឺម៉ង់។ លោកស្រី មែរកិល មិនយល់ស្រប នឹងគំនិតចង់កែប្រែអឺរ៉ុបឡើយ ! សម្រាប់លោកស្រី ដែលមានជោគជ័យក្នុងសភាអឺរ៉ុប គេត្រូវតែអូសទាញទឹកចិត្តពលរដ្ឋម្ចាស់ឆ្នោត ដែលងាកទៅគាំទ្រក្រុមជ្រុលនិយមមកវិញ តាមរយៈការជំរុញនយោបាយប្រកួតប្រជែង កំណើនសេដ្ឋកិច្ច ការងារ ទៅនោះនឹងអាចបន្សាបសេចក្តីក្រេចក្រោធប្រឆាំងអឺរ៉ុបបានហើយ។
កិច្ចការដែលលំបាកបំផុតរបស់សមាជិកទាំង២៨ប្រទេស មិនមែនការសរសេរគម្រោង កំណត់ទិសដៅ ផែនទីចង្អុលផ្លូវដឹកនាំអឺរ៉ុប ឱ្យប្តូរផ្លាស់នយោបាយ ឬប្តូរផ្លាស់អាទិភាព ៖ នយោបាយសេដ្ឋកិច្ច ថាមពល និងអន្តោប្រវេសន៍ទេ តែជម្រើសអនាគតប្រមុខដឹកនាំគណៈកម្មការអឺរ៉ុប មានលក្ខណៈផុយស្រួយខ្លាំងបំផុត ពេលនេះ។ បើតាមការបូកដករបស់សភាអឺរ៉ុប ប្រមុខដឹកនាំអភិរក្ស Jean Claude Junkersជាតិលុចសំបួរ ជាអ្នកឈ្នះ និងចង់ឱ្យសមាជិកទាំង២៨ប្រទេស តែងតាំងឱ្យបានជាប្រធានគណៈកម្មការអឺរ៉ុប តែនាយករដ្ឋមន្ត្រីអង់គ្លេស និងហុងគ្រី ព្រមទាំងសកម្មជនផ្ទាល់បក្សខ្លះ មិនគាំទ្រ។ ក្នុងខណៈដែលអឺរ៉ុបកំពុងវិលវល់ស្វែងរកប្រមុខដឹកនាំ ប្រមុខបក្សប្រឆាំងអឺរ៉ុប បារាំង លោកស្រីម៉ារីន ឡឺប៉ែន និងបក្សប្រឆាំងអង់គ្លេស កំពុងសំរុកប្រមូលផ្តុំសំឡេង ចងសម្ព័ន្ធភាព ដើម្បីឈានទៅបង្កើតជាក្រុមប្រឆាំងរឹងមាំមួយនៅសភាអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ