លទ្ធផលបោះឆ្នោតប្រធានាធិបតីជុំទី១បង្ហាញឲ្យឃើញពីការពុះចែកបារាំងជាពីរ
ចុះផ្សាយនៅថ្ងៃ៖
ស្តាប់ - ០៤:៣៧
នៅបារាំង យុទ្ធនាការឃោសនាបោះឆ្នោតប្រធានាធិបតីកំពុងតែមានសន្ទុះយ៉ាងខ្លាំង ហើយគេត្រូវរង់ចាំការបោះឆ្នោតជុំទី២ នៅថ្ងៃអាទិត្យ ៧ឧសភា ខាងមុខ ទើបអាចដឹងបានថាតើ រវាងលោកអេម៉ានុយអែល ម៉ាក្រុង និងលោកស្រីម៉ារីន ឡឺប៉ែន នរណានឹងត្រូវក្លាយជាប្រធានាធិបតីបារាំង សម្រាប់រយៈពេល ៥ឆ្នាំខាងមុខ? ក៏ប៉ុន្តែ មិនថាលទ្ធផលនៅជុំទី២នឹងចេញជាយ៉ាងណានោះទេ លទ្ធផលជុំទី១ កាលពីថ្ងៃទី២៣មេសាកន្លងទៅ បានបង្ហាញឲ្យឃើញយ៉ាងច្បាស់ថា ប្រទេសបារាំងត្រូវពុះចែកជាពីរយ៉ាងដាច់ស្រឡះ។
រវាងដែនដីប៉ែកខាងកើត និងដែនដីប៉ែកខាងលិច, រវាងដែនដីជនបទ និងដែនដីក្រុង ប្រទេសបារាំងត្រូវពុះចែកជាពីរយ៉ាងដាច់ស្រឡះ រវាងអ្នកគាំទ្រលោកអេម៉ានុយអែល ម៉ាក្រុង និងអ្នកគាំទ្រលោកស្រីម៉ារីន ឡឺប៉ែន បេក្ខជនប្រធានាធិបតីដែលមានគោលនយោបាយបញ្ច្រាស់គ្នាទាំងស្រុង ទាំងក្នុងវិស័យសេដ្ឋកិច្ច សង្គមកិច្ច អន្តោប្រវេសន៍ និងជាពិសេស ទាក់ទងនឹងសហភាពអឺរ៉ុប។
ការពុះចែកប្រទេសបារាំងជាពីរដាច់ពីគ្នាត្រូវបានបង្ហាញឲ្យឃើញយ៉ាងច្បាស់ នៅពេលដែលគេមើលទៅលើលទ្ធផលបោះឆ្នោតជុំទី១ដាក់បង្ហាញនៅលើផែនទី។ គេស្ទើរតែអាចគូសបន្ទាត់ដោយត្រង់ពីជើងទៅត្បូង ពុះប្រទេសបារាំងជាពីរ ដោយនៅស្ទើរតែគ្រប់បណ្តាខេត្តទាំងអស់នៅប៉ែកខាងកើត លោកស្រីម៉ារីន ឡឺប៉ែន ជាអ្នកទទួលបានសំឡេងឆ្នោតនាំមុខគេ ចំណែកឯបណ្តាខេត្តនៅប៉ែកខាងលិចបានទៅលោកអេម៉ានុយអែល ម៉ាក្រុង។
ការពុះចែកនេះក៏ត្រូវបានបង្ហាញឲ្យឃើញយ៉ាងច្បាស់ក្រឡែតផងដែរ រវាងដែនដីក្រុង និងដែនដីជនបទ។ ឃុំសង្កាត់នៅតាមទីជនបទស្ទើរតែទាំងអស់សុទ្ធតែបោះឆ្នោតឲ្យលោកស្រីម៉ារីន ឡឺប៉ែន បានសំឡេងនាំមុខ ហើយផ្ទុយទៅវិញ នៅតាមក្រុងធំៗ និងតាមឃុំសង្កាត់ ដែលមានប្រជាជនចាប់ពី ១០ម៉ឺននាក់ឡើងទៅ នាំគ្នាបោះឆ្នោតឲ្យលោកអេម៉ានុយអែល ម៉ាក្រុង។
ឧទាហរណ៍ដ៏ជាក់ច្បាស់ជាងគេ គឺនៅទីក្រុងប៉ារីស ដែលលោកអេម៉ានុយអេល ម៉ាក្រុង បានទទួលសំឡេងឆ្នោតរហូតដល់ទៅជិត ៣៥% ដែលជាកម្រិតដ៏ខ្ពស់បំផុត បើធៀបនឹងសំឡេងគាំទ្រលោកគិតជាមធ្យមនៅទូទាំងប្រទេស។ ផ្ទុយទៅវិញ លោកស្រីម៉ារីន ឡឺប៉ែន បានទទួលសំឡេងឆ្នោតមិនដល់ ៥%ផង នៅប៉ារីស។
►លទ្ធផលលម្អិតនៃការបោះឆ្នោតប្រធានាធិបតីបារាំងជុំទី១
តាមការពិតគេអាចសង្កេតឃើញពីការពុះចែករវាងដីក្រុង និងដីជនបទនេះ តាំងពីក្នុងពេលដែលការរាប់សន្លឹកឆ្នោតកំពុងដំណើរការ នៅយប់ថ្ងៃអាទិត្យ។ ដោយសារតែការិយាល័យបោះឆ្នោតនៅតាមបណ្តាក្រុងធំៗត្រូវបិទទ្វារយឺតជាងគេ១ម៉ោង សន្លឹកឆ្នោតដែលត្រូវបានគេចាប់ផ្តើមរាប់ហើយដឹងលទ្ធផលមុនគេ គឺសន្លឹកឆ្នោតមកពីតាមទីជនបទ។ ហេតុដូច្នេះហើយបានជា លទ្ធផលបណ្តោះអាសន្នដែលផ្តល់ដោយក្រសួងមហាផ្ទៃ នៅពេលដែលសន្លឹកឆ្នោតទើបនឹងរាប់បានប្រមាណជាង ៣០% បង្ហាញថា លោកស្រីម៉ារីន ឡឺប៉ែន ដែលជាប់លេខ១នៅជុំទី១។ រហូតទាល់តែដល់ពេលដែលគេចាប់ផ្តើមរាប់សន្លឹកឆ្នោតមកពីតាមក្រុងធំៗ ទើបសំឡេងរបស់លោកអេម៉ានុយអែល ម៉ាក្រុង ចាប់ផ្តើមកើនឡើង រហូតលើសលោកស្រីម៉ារីន ឡឺប៉ែន ដល់ទៅជិត ៣% នៅពេលដែលការរាប់សន្លឹកឆ្នោតត្រូវបញ្ចប់នៅទូទាំងប្រទេស។ លទ្ធផលផ្លូវការនិងជាស្ថាពរ៖ លោកអេម៉ានុយអែល ម៉ាក្រុង ២៤,០១% លោកស្រីម៉ារីន ឡឺប៉ែន ២១,៣%។
ការពុះចែកសំឡេងឆ្នោតរវាងដីក្រុងនិងដីជនបទនេះ គឺជាតម្រ៉ុយបង្ហាញថា អ្នកដែលបោះឆ្នោតគាំទ្រលោកស្រីម៉ារីន ឡឺប៉ែន ដែលជាបេក្ខនារីមកពីគណបក្សស្តាំនិយមជ្រុល ភាគច្រើនគឺជាអ្នកដែលនៅឆ្ងាយពីចំណុចកណ្តាលនៃរដ្ឋបាលសាធារណៈ ហើយដែលយល់ថាខ្លួនត្រូវបានរដ្ឋាភិបាលបំភ្លេចចោលមិនគិតគូរ មិនទទួលបាននូវសេវាសាធារណៈសមរម្យ និងមិនទទួលបានផលប្រយោជន៍ពីនយោបាយដែលដាក់ចេញរដ្ឋាភិបាលបច្ចុប្បន្ន ក៏ដូចជារដ្ឋាភិបាលមុនៗ ទាំងរដ្ឋាភិបាលដែលកាន់កាប់ដោយគណបក្សឆ្វេងនិយម ក៏ដូចជារដ្ឋាភិបាលដែលកាន់កាប់ដោយគណបក្សស្តាំនិយម។ ហេតុដូច្នេះហើយបានជាពួកគេនាំគ្នាងាកទៅបោះឆ្នោតឲ្យគណបក្សស្តាំនិយមជ្រុលវិញ។
ចំណុចនេះត្រូវបានបញ្ជាក់ឲ្យឃើញកាន់តែច្បាស់ ប្រសិនបើគេពិនិត្យមើលទៅលើការបែងចែកសំឡេងឆ្នោតទៅតាមកម្រិតជីវភាពរបស់ប្រជាជន។ នៅក្នុងចំណោមប្រជាជនដែលមានប្រាក់ចំណូលទាប អ្នកគ្មានសញ្ញាបត្រឬមានកម្រិតសិក្សាទាប អ្នកអត់ការងារធ្វើ និងអ្នកធ្វើការក្នុងតំណែងទាប ភាគច្រើនបោះឆ្នោតឲ្យលោកស្រីម៉ារីន ឡឺប៉ែន។ ផ្ទុយទៅវិញ អ្នកមានប្រាក់ចំណូលមធ្យមនិងខ្ពស់ អ្នកមានសញ្ញាបត្រខ្ពស់ចាប់ពីបរិញ្ញាបត្រឡើងទៅ ព្រមទាំងអ្នកធ្វើការដែលមានតំណែងមធ្យមឬខ្ពស់ ភាគច្រើនបោះឆ្នោតឲ្យលោកអេម៉ានុយអែល ម៉ាក្រុង។
ចុងក្រោយ នៅមានចំណុចដែលគួរឲ្យកត់សម្គាល់មួយទៀត គឺនៅក្នុងចំណោមអ្នកបោះឆ្នោតក្មេងៗ ក្នុងចន្លោះពី ១៨ ទៅ២៥ឆ្នាំ លោកស្រីម៉ារីន ឡឺប៉ែន ជាអ្នកទទួលបានសំឡេងច្រើនជាងលោកអេម៉ានុយអែល ម៉ាក្រុង។ ចំណែកអ្នកដែលមានវ័យចាប់ពី៦០ឆ្នាំឡើងទៅ បោះឆ្នោតឲ្យលោកម៉ាក្រុងច្រើនជាងលោកស្រីឡឺប៉ែន។
តាមការពិតការស្ទាបស្ទង់មតិមុនពេលបោះឆ្នោតក៏បានបង្ហាញពីនិន្នាការបែបនេះដែរ។ ដូច្នេះ វាមិនមែនជារឿងដែលគួរឲ្យភ្ញាក់ផ្អើលនោះទេ ក៏ប៉ុន្តែ វាជារឿងដែលធ្វើឲ្យគេពិបាកនឹងរកសេចក្តីពន្យល់បាន ពីព្រោះជាទូទៅ គេគិតថា ក្មេងជំនាន់ក្រោយភាគច្រើនជាអ្នកមានគំនិតសេរីនិយម មានផ្នត់គំនិតបើកចំហ ទទួលយកវប្បធម៌ចម្រុះ មិនសូវប្រកាន់ពូជសាសន៍ ពណ៌សម្បុរ មិនប្រកាន់ទំនៀមទម្លាប់ប្រពៃណី និងគំនិតអភិរក្សនិយមដូចជាចាស់ៗ។ ផ្ទុយទៅវិញ នៅក្នុងការបោះឆ្នោតកាលពីថ្ងៃអាទិត្យ ពួកគេបែរជាបោះឆ្នោតឲ្យគណបក្សស្តាំនិយមជ្រុលច្រើនជាងចាស់ៗទៅវិញ។ គណបក្សស្តាំនិយមជ្រុល ដែលប្រកាន់គំនិតអភិរក្សនិយម និងមានគោលនយោបាយប្រឆាំងអន្តោប្រវេសន៍ ផ្ទុយពីផ្នត់គំនិតសេរីនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ