លោក ហ៊ុន សែន ស្នើឲ្យមន្ត្រីរៀបចំទទួលផែនទី១៨ផ្ទាំងដោយតម្លាភាព
លោកនាយករដ្ឋមន្ត្រី ហ៊ុន សែន បានណែនាំឲ្យមន្ត្រីរៀបចំទទួលផែនទីចំនួន១៨ផ្ទាំង ដែលបានរកឃើញនៅអង្គការសហប្រជាជាតិ ដែលផែនទីនេះត្រូវប្រទេសកម្ពុជាដាក់ប្តឹងទៅអង្គការសហប្រជាជាតិពីការទំលាក់គ្រាប់បែបលើប្រទេសរបស់ខ្លួននៅក្នុងអំឡុងសម័យសង្គមរាស្ត្រនិយម។ ការលើកឡើងនេះបានធ្វើឡើងនៅឯកិច្ចប្រជុំគណៈរដ្ឋមន្ត្រីមួយនៅថ្ងៃសុក្រនេះក្នុងវិមានសន្តិភាព។ អ្នកពាក់ព័ន្ធនិងបក្សប្រឆាំងក៍ស្វាគមន៍ដែរក្នុងការទទួលផែនទីនេះ ប្រកបដោយតម្លាភាព។
ចុះផ្សាយនៅថ្ងៃ៖
ស្តាប់ - ០២:១៤
លោកនាយករដ្ឋមន្ត្រី ហ៊ុន សែន នៅក្នុងកិច្ចប្រជុំគណៈរដ្ឋមន្ត្រីនៅព្រឹកថ្ងៃសុក្រនេះ បានមានប្រសាសន៍ណែនាំឲ្យមន្ត្រីរបស់លោក ស្វាគមន៍ចំពោះការចូលរួមណាមួយពីអ្នកពាក់ព័ន្ធនានាក្នុងការចូលរួមជាសាក្សីដើម្បីពិនិត្យនិងចុះហត្ថលេខាទទួលផែនទី១៨ផ្ទាំង ដែលនឹងបញ្ជូនមកដល់កម្ពុជាក្នុងពេលឆាប់ៗនេះ។
ក្រៅពីសេចក្តីព្រាងច្បាប់ស្តីពីស្ថិតិនិងសេចក្តីព្រាងច្បាប់៣ឆ្នាំរំកិល២០១៦-២០១៨ លោកនាយករដ្ឋមន្ត្រី បានលើកឡើងពាក់ព័ន្ធនឹងផែនទីដែលរដ្ឋាភិបាលកម្ពុជាបានសុំខ្ចីពីអង្គការសហប្រជាជាតិ ដើម្បីយកមកផ្ទៀងផ្ទាត់ជាមួយផែនទីដែលបាននិងកំពុងប្រើប្រាស់សព្វថ្ងៃ។
លោក ហ៊ុន សែន ថាទោះបីជាមានឬគ្មានផែនទី ដែលត្រូវបានយកទៅតម្កល់នៅអង្គការសហប្រជាជាតិយ៉ាងណាក្តី ក៏ប៉ុន្តែការវិវត្តចុងក្រោយគឺផែនទីដទៃផ្សេងទៀតដែលមានចំនួន១៨ផ្ទាំង ជាផែនទីដែលកម្ពុជាបានប្តឹងពាក់ព័ន្ធទៅនឹងការដែលគេទំលាក់គ្រាប់បែកលើទឹកដីកម្ពុជា ដែលនឹងទទួលបាននៅពេលខាងមុខ។
តាមលោកផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី លោកនាយករដ្ឋមន្ត្រីបានណែនាំមន្ត្រីថា សូមកុំយកមកតាមរបៀបស្ងាត់ស្ងៀម គឺធ្វើម៉េចត្រូវបើកឲ្យមានតម្លាភាព ដោយត្រូវអញ្ជើញខាងរាជបណ្ឌិតសភាដែលកំពុងបង្កើតក្រុមស្រាវជ្រាវផ្នែកវិទ្យាសាស្ត្រអំពីបញ្ហាផែនទី រួមទាំងបក្សប្រឆាំងផងដែរប្រសិនបើគេចង់ចូលរួម។
សូមបញ្ជាក់ថា បញ្ហាព្រំដែនដែលបានផ្ទុះឡើងនៅច្រើនចំណុចជាមួយវៀតណាម ត្រូវបានប្រមុខរដ្ឋាភិបាលកម្ពុជាសរសេរលិខិតស្នើសុំកិច្ចសហការពីអង្គការសហប្រជាជាតិ និងប្រទេសមហាអំណាចចំនួនបីគឺអាមេរិក បារាំង និងអង់គ្លេស ដើម្បីសុំខ្ចីផែនទីបោនរបស់កម្ពុជាខ្នាត ១លើ១រយពាន់។ក៏ប៉ុន្តែរហូតមកទល់ពេលនេះនៅមិនទាន់ឃើញមានឆ្លើយតបពីខាងណាមួយនៅឡើយ។
កាលពីពេលថ្មីៗនេះ ការប្រកាសទិញផែនទីពីប្រទេសបារាំងតម្លៃប្រមាណជា១៦៨ដុល្លារ របស់លោក សម រង្សី បានបង្កជាប្រតិកម្មពីសំណាក់គណបក្សកាន់អំណាចថាជាការមើលងាយការងារព្រំដែនរដ្ឋាភិបាល ហើយពេលនេះក៏បានស្ងប់ស្ងាត់ទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ