ពលរដ្ឋ៧ឡានខានមកដាក់ញត្តិ និងបណ្ដឹង នៅរដ្ឋសភានារសៀលនេះ
ព្រឹកនេះ អ្នកភូមិប្រហែល២០០នាក់នៅខេត្តស្វាយរៀង បានខកដំណើរមកភ្នំពេញ ដើម្បីដាក់ញត្តិ និងបណ្ដឹង នៅរដ្ឋសភាកម្ពុជា ទាក់ទងនឹងវិវាទដីធ្លីរបស់ពួកគេ។ បើតាមប្រភព រថយន្តប្រភេទទេសចរណ៍ចំនួន៧គ្រឿង ដែលដឹកអ្នកមានជម្លោះដីធ្លីទាំងនោះ ត្រូវបានស្កាត់ដោយអាជ្ញាធរខេត្តស្វាយរៀង ខណៈដែលពលរដ្ឋខ្លះទៀតបានឆ្លងផុតរបាំងសមត្ថកិច្ចខេត្តជាប់ព្រំដែនវៀតណាមនោះ។
ចុះផ្សាយនៅថ្ងៃ៖
ស្តាប់ - ០១:៣២
លោក ថេង សាវឿន អគ្គលេខាធិការសម្ព័ន្ធសហគមន៍កសិករកម្ពុជា បានប្រាប់នៅព្រឹកថ្ងៃចន្ទនេះថា អាជ្ញាធរខេត្តស្វាយរៀងបានស្ទាក់ដំណើររថយន្ត៧គ្រឿង ដែលត្រូវដឹកកសិករប្រហែល២០០នាក់ ពីស្រុករមាសហែក ឆ្ពោះមករាជធានីភ្នំពេញ។
អ្នកមានជម្លោះដីធ្លីនៅស្រុករមាសហែក ខេត្តស្វាយរៀងទាំងនោះ បានប៉ុនប៉ងមកជួបកសិករមួយចំនួនទៀត ដែលមកពីស្រុកស្វាយជ្រុំ ខេត្តស្វាយរៀង និងមកពីស្រុកព្រៃនប់ ខេត្តព្រះសីហនុ ដើម្បីដាក់ញត្តិ និងបណ្ដឹង នៅរដ្ឋសភាកម្ពុជា ទាក់ទងនឹងបញ្ហាដីធ្លី។
លោក ចិន សាធាន នាយរងរដ្ឋបាលសាលាខេត្តស្វាយរៀង បានបញ្ជាក់ប្រាប់ថា សមត្ថកិច្ចស្រុករមាសហែក បានឃាត់រថយន្តរបស់អ្នកភូមិមែន ប៉ុន្តែគឺដើម្បីទុកឱ្យអាជ្ញាធរខេត្តដោះស្រាយជម្លោះដីធ្លីរវាងអ្នកស្រុក និងក្រុមហ៊ុន អិន ខេ វ៉ិនឈើ (NK Ventures) នៅថ្នាក់មូលដ្ឋាន។ ប៉ុន្តែ មន្ត្រីសាលាខេត្តរូបនេះ បានឱ្យដឹងទៀតថា សមត្ថកិច្ចមិនអាចទប់ស្កាត់ពួកគេបានទាំងអស់គ្នាទេ។
សម្ព័ន្ធសហគមន៍កសិករកម្ពុជា ដែលរៀបចំការប្រមូលផ្តុំគ្នារបស់កសិករ៦៥០នាក់ នៅមុខរដ្ឋសភាកម្ពុជា នារសៀលនេះ បានអះអាងថា មានអ្នកភូមិជិត៥០០នាក់ ក្នុងនោះមានអ្នកខេត្តតាកែវជាកម្លាំងជំនួយផង នឹងអាចដាក់ញត្តិ និងបណ្ដឹងរបស់ពួកគេជូនសមាជិកសភាបាន។
ការធ្វើដំណើរមកដាក់ញត្តិ និងបណ្ដឹង នៅរាជធានីភ្នំពេញ ដើម្បីស្នើអ្នកតំណាងរាស្ត្រចុះស៊ើបអង្កេត និងធ្វើអន្តរាគមន៍ក្នុងវិវាទដីធ្លីជាមួយក្រុមហ៊ុនឯកជននោះ កើតឡើងបន្ទាប់ពីអ្នកភូមិ១៨៤៧គ្រួសារមិនទទួលបានដំណោះស្រាយ និងសិទ្ធិកាន់កាប់ដីធ្លី ពីអាជ្ញាធរខេត្តស្វាយរៀង និងខេត្តព្រះសីហនុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ