លោក អ៊ូច ឡេង និងសកម្មជនការពារព្រៃឈើ៣នាក់ទៀត ត្រូវបានឃាត់ខ្លួនដោយអាជ្ញាធរខេត្តក្រចេះ
លោក អ៊ូច ឡេង និងសកម្មជនការពារព្រៃឡង់ចំនួន៣នាក់ទៀត ត្រូវបានបុគ្គលិកក្រុមហ៊ុនឯកជនមួយឈ្មោះ ស៊ីងបាយអូតិក (Think Biotech) ចាប់ឃាត់ខ្លួន កាលពីព្រឹកថ្ងៃទី១៣ មីនា និងបានបញ្ជូនទៅឃុំខ្លួននៅអធិការដ្ឋាននគរបាលស្រុកសំបូរខេត្តក្រចេះ។ បច្ចុប្បន្ន អតីតម្ចាស់ពានរង្វាន់វីរជនបរិស្ថាន Goldman Environmental Prize និងអ្នកការពារព្រៃឈើទាំង៣នាក់ទៀត កំពុងស្ថិតនៅក្នុងការចោទសួរពីអាជ្ញាធរស្រុកសំបូរខេត្តក្រចេះ ក្រោមការឃ្លាំមើលយ៉ាងយកចិត្តទុកដាក់ ពីអង្គការឃ្លាំមើលសិទ្ធិមនុស្សនៅកម្ពុជា។—
ចុះផ្សាយនៅថ្ងៃ៖
ស្តាប់ - ០២:០៧
បើតាមសេចក្តីរាយការណ៍ លោក អ៊ូច ឡេង និងសកម្មជនការពារព្រៃឡង់សរុប៣នាក់ទៀត បានស្ថិតនៅក្រោមការសាកសួរពីអាជ្ញាធរស្រុកនិងព្រះរាជអាជ្ញារងខេត្តក្រចេះ នៅព្រឹកថ្ងៃទី ១៤ មីនានេះ។ លោក អ៊ូច ឡេង រួមទាំងសមាជិកបណ្ដាញអ្នកការពារព្រៃឡង់៣នាក់ទៀត ដែលមានឈ្មោះ ខេម សុឃី លោកស្រី ថី និង លោកមេន ម៉ាត់ ត្រូវបានបុគ្គលិកក្រុមហ៊ុនសម្បទានដីមួយឈ្មោះថា ស៊ីងបាយអូតិក (Think Biotech) ចាប់ឃាត់ខ្លួន កាលពីព្រឹកថ្ងៃទី១៣ មីនា នៅចំណុចដំបូកស ភូមិរមួល ឃុំបឹងចា ស្រុកសំបូរ ខេត្តក្រចេះ។ ការចាប់ឃាត់ខ្លួននេះ ត្រូវបានបុគ្គលិកក្រុមហ៊ុនខាងលើអះអាងថា លោក អ៊ូច ឡេង រួមទាំងសមាជិកបណ្ដាញអ្នកការពារព្រៃឡង់៣នាក់ទៀត បានចូលទៅក្នុងបរិវេណដីក្រុមហ៊ុន និងបានថតរូបភាពផ្សេងៗ ដោយគ្មានការអនុញ្ញាត។
យ៉ាងណាក្តី លោក សាំង សែនករុណា អ្នកនាំពាក្យសមាគមការពារសិទ្ធិមនុស្សអាដហុក បានថ្លែងថា ក្នុងពេលចាប់ខ្លួននោះ លោក អ៊ូច ឡេង មិនបាននៅក្នុងបរិវេណក្រុមហ៊ុនខាងលើនេះទេ។ លោក អ៊ូច ឡេង គឺស្ថិតនៅក្នុងផ្ទះប្រជាពលរដ្ឋម្នាក់។ លោក សាំង សែនករុណា នៅមិនទាន់ធ្វើសេចក្តីសន្និដ្ឋានយ៉ាងណានៅឡើយទេ ចំពោះសំណុំរឿងនេះ។ ប៉ុន្តែលោកបានលើកឡើងថា ចេតនារបស់លោក អ៊ូច ឡេង និងសកម្មជនការពារព្រៃឈើខាងលើនេះ ទំនងដើម្បីស្វែងរកបទល្មើសព្រៃឈើតែប៉ុណ្ណោះ។ យ៉ាងណាក្តី លោករួមជាមួយតំណាងអង្គការសិទ្ធិមនុស្សលីកាដូ និងអង្គការសង្គមស៊ីវិលផ្សេងទៀត កំពុងឃ្លាំមើលសំណុំរឿងនេះ យ៉ាងយកចិត្តទុកដាក់បំផុត។
លោក អ៊ូច ឡេង ប្រធានអង្គការកិច្ចការពិសេសសិទ្ធិមនុស្សកម្ពុជា គឺជាមនុស្សម្នាក់ក្នុងចំណោមសកម្មជនការពារព្រៃឈើនិងបរិស្ថាន៥នាក់ផ្សេងទៀត ដែលបានទទួលពានរង្វាន់វីរជនបរិស្ថាន The Goldman Environmental Prize ពីសហរដ្ឋអាមេរិក កាលពីឆ្នាំ ២០១៨។
បើតាមសេចក្តីរាយការណ៍ ក្នុងពេលចាប់ឃាត់ខ្លួនដោយបុគ្គលិកក្រុមហ៊ុន ស៊ីងបាយអូតិក (Think Biotech) កាលពីថ្ងៃម្សិលមិញ លោក អ៊ូច ឡេង រួមទាំងសមាជិកបណ្តាញសហគមព្រៃឡង់ខេត្តក្រចេះ៣នាក់ទៀត បានរងនូវអំពើហិង្សានៅក្នុងក្រុមហ៊ុននោះទៀតផង។ បើតាមលោក ហេង ស្រស់ ដែលជាសហការីរបស់លោក អ៊ូច ឡេង វិញបានថ្លែងថា «លោក អ៊ូច ឡេង និងប្រជាពលរដ្ឋខាងលើ បានចុះទៅតំបន់នោះ ដើម្បីប្រមូលព័ត៌មាន តើថាក្រុមហ៊ុននោះ បានកាប់ឈើយកមកពីតំបន់ព្រៃឡង់ដែរឬទេ?
យ៉ាងណាក៏ដោយ គិតត្រឹមរសៀលថ្ងៃសៅរិ៍នេះ លោក អ៊ូច ឡេង និងអ្នកការពារព្រៃឈើទាំង៣នាក់ទៀត នៅមិនទាន់ដោះលែងឲ្យមានសេរីភាពវិញនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ