ធនាគារពិភពលោក៖ សេដ្ឋកិច្ចកម្ពុជាកើនត្រឹមតែ២,២%ក្នុងឆ្នាំ២០២១ និងរំពឹង៤,៥%ក្នុងឆ្នាំ២០២២ខាងមុខ
ធនាគារពិភពលោកនៅព្រឹកថ្ងៃចន្ទនេះបានព្យាករថា កំណើនសេដ្ឋកិច្ចកម្ពុជាក្នុងឆ្នាំ២០២១នេះត្រូវបានកែសម្រួលមកនៅត្រឹមអត្រា ២,២ភាគរយប៉ុណ្ណោះ។ការធ្លាក់ចុះ បើទោះបីជាការនាំចេញរបស់កម្ពុជាផ្ទាល់មានភាពរឹងមាំ និងគាំទ្រដោយលក្ខខណ្ឌតម្រូវការខាងក្រៅល្អក៏ដោយ។ បន្ថែមពីនេះ សម្រាប់ឆ្នាំ២០២២ខាងមុខ ធនាគារពិភពលោកក៏បានរំពឹងថា សេដ្ឋកិច្ចកម្ពុជាអាចមានការកើនឡើងចំនួន ៤,៥ភាគរយ។ ជាមួយគ្នានេះ ធនាគារពិភពលោកបានស្នើឱ្យកម្ពុជាដោះស្រាយបញ្ហាជាប់គាំងលើផ្នែកផ្គង់ផ្គង់ និងព្យាយាមទាញប្រយោជន៍ពីកិច្ចព្រមព្រៀងពាណិជ្ជកម្មសេរីកម្ពុជា-ចិនដើម្បីធានាបានកំណើនសេដ្ឋកិច្ចល្អ។
ចុះផ្សាយនៅថ្ងៃ៖
ស្តាប់ - ០២:១៤
ក្នុងរបាយការណ៍ចំនួន២សន្លឹកដែលចេញផ្សាយដោយធនាគារពិភពលោកនៅថ្ងៃចន្ទទី២៨កញ្ញានេះបានឱ្យដឹងថា កំណើនសេដ្ឋកិច្ចកម្ពុជានៅឆ្នាំ២០២១នេះ អាចមានសន្ទុះងើបឡើងបានត្រឹមតែ២,២ភាគរយប៉ុណ្ណោះ ដែលចំនួននេះគឺ ជាការកែសម្រួលចុះពីការព្យាករណ៍ទស្សនៈវិស័យម៉ាក្រូសេដ្ឋកិច្ចចំនួន៤,០ភាគរយកាលពីអំឡុងខែមេសាឆ្នាំ២០២១កន្លងទៅ។ ជុំវិញកំណើន ២,២ភាគរយនេះ ត្រូវបានធនាគារពិភពលោកបញ្ជាក់ថា ដោយសារកម្ពុជាកំពុងរងគ្រោះពីមេរោគបំប្លែងថ្មីប្រភេទ(ដែលតា) និងបើទោះបីជា វិស័យកសិកម្ម ការនាំចេញទំនិញ និងការវិនិយោគរបស់កម្ពុជានៅមានភាពធន់ក៏ដោយ។
ជាក់ស្តែង របាយការណ៍ខាងដើមបានលើកឡើងថា កំណើនតិចតួចនេះ គឺកើតឡើងដោយសារការបង្អាកពីវិស័យទេសចរណ៍ សំណង់ និងអចលនទ្រព្យដែលនៅកំពុងបន្តរងផលប៉ះពាល់យ៉ាងខ្លាំងពីជំងឺកូវីដ១៩ និងភាពមិនទាន់ច្បាស់លាស់របស់កម្ពុជាទៅលើទស្សនវិស័យគ្រប់គ្រងផលប៉ះពាល់សង្គម និងសេដ្ឋកិច្ច។
តែយ៉ាងណា បើតាមធនាគារពិភពលោក កម្ពុជានឹងបានទទួលបានកំណើនសេដ្ឋកិច្ចចំនួន៤,៥ភាគរយក្នុងឆ្នាំ២០២២ខាងមុន។
សម្រាប់ដោះស្រាយវិបត្តិសេដ្ឋកិច្ចក៏រុំាំរ៉ៃនេះ ធនាគារពិភពលោកបានស្នើឱ្យកម្ពុជាត្រូវតែចាត់វិធានការរឹងមាំមួយជាក់លាក់ ដោយត្រូវពង្រឹងភាពប្រកួតប្រជែងខាងក្រៅ ក៏ដូចជាជម្រុញដល់ផ្នែកផលិត និងការនាំចេញ ជាពិសេសទាញយកផលប្រយោជន៍ពីច្បាប់វិនិយោគថ្មី និងកិច្ចព្រមព្រៀងពាណិជ្ជកម្មសេរីកម្ពុជាចិន។ បន្ថែមពីនេះ កម្ពុជាត្រូវដោះស្រាយបញ្ហារាំងស្ទះពីផ្នែកផ្គត់ផ្គង់ ដោយកាត់បន្ថយការចំណាយលើអាជីវកម្ម ភស្តុភារ និងថាមពល។ ក្នុងនោះ កម្ពុជាក៏ត្រូវលុបបំបាត់ភាពមិនទន់ភ្លន់ ក្នុងការអនុវត្តបទបញ្ញាតិ្តសំខាន់ៗទាក់ទងនឹងការងារ ដែលបង្កជាការកក់ស្ទះដល់ភាពរឹងមាំនៃការងើបឡើងវិញរបស់ទីផ្សារការងារ។
សូមរំលឹកថា កាលពីសប្តាហ៍កន្លងទៅ ធនាគារអភិវឌ្ឍន៍អាស៊ី(ADB) ក៏បានព្យាករណ៍ទម្លាក់សេដ្ឋកិច្ចកម្ពុជាមកនៅត្រឹមកំណើន១,៩% នៅឆ្នាំ២០២១ ដោយថយចុះពីការព្យាករណ៍៤ភាគរយក្នុងដើមខែមេសា ឆ្នាំ២០២១។ការកែសម្រួលកំណើនសេដ្ឋកិច្ច ដោយសម្អាងថា បញ្ហារាតត្បាតកូវីដ១៩នៅតែបន្ដអូសបន្លាយយូរដែលបង្កផលប៉ះពាល់ដល់សកម្មភាពសេដ្ឋកិច្ច និងការផ្អាកដំណើរការរោងចក្រជាដើម។ ក្នុងនោះADBក៏បានបង្ហាញការព្យាករណ៍របស់ខ្លួនថែមទៀតថា សេដ្ឋកិច្ចកម្ពុជានឹងអាចកើនឡើងរហូតដល់៥ ៥ភាគរយក្នុងឆ្នាំ២០២២ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ