IMF ព្យាករសេដ្ឋកិច្ចកម្ពុជាប្រហាក់ប្រហែលADB និងWB ទាំងកំណើនឆ្នាំ២០២១ និងឆ្នាំ២០២២
មូលនិធិរូបិយវត្ថុអន្តរជាតិ(IMF) បានវាយតម្លៃថាសេដ្ឋកិច្ចកម្ពុជាក្នុងឆ្នាំ២០២១ មានកំណើនខ្ពស់ជាងមុន ក្នុងអត្រា២,២% ហើយនឹងបន្តងើបឡើងក្នុងរង្វង់ប្រមាណ ៥% ដោយសារការរំពឹងទុកការបន្តងើបឡើងនៃតម្រូវការសកល។ ការព្យាករឡើងវិញរបស់ IMFដូច្នេះ បានធ្វើឡើងតាមរយៈកិច្ចប្រជុំបូកសរុបការងាររបស់ក្រុមបេសកកម្ម Article IV នៃមូលនិធិរូបិយវត្ថុអន្តរជាតិ លើការវាយតម្លៃលើស្ថានភាពម៉ាក្រូសេដ្ឋកិច្ចកម្ពុជា កាលពីថ្ងៃចន្ទ។ នេះបើតាមសេចក្តីប្រកាសរបស់ក្រសួងសេដ្ឋកិច្ច និងហិរញ្ញវត្ថុកម្ពុជា។
ចុះផ្សាយនៅថ្ងៃ៖
ស្តាប់ - ០២:២៧
តាមរយៈកិច្ចប្រជុំអនឡាញ ដែលមានការចូលរួមពីលោករដ្ឋមន្ត្រីសេដ្ឋកិច្ចកម្ពុជា អូន ព័ន្ធមុនីរ័ត្ន និងប្រធានបេសកកម្មមូលនិធិរូបិយវត្ថុអន្តរជាតិ(IMF)ផងនោះ កំណើនសេដ្ឋកិច្ចកម្ពុជាឆ្នាំ២០២១នេះ ត្រូវបានព្យាករជាថ្មីដោយសា្ថប័នIMF ថាមានកំណើន ២,២% ដោយសារ មានការគាំទ្រដោយនិន្នាការល្អជាងការរំពឹងទុក នៃវិស័យកម្មន្តសាល និងវិស័យកសិកម្ម ដែលជំរុញដោយភាពរឹងមាំ នៃតម្រូវការខាងក្រៅ ខណៈវិស័យសំណង់ វិស័យអចលនទ្រព្យ និងវិស័យសណ្ឋាគារ និងភោជនីយដ្ឋាន រងផលប៉ះទង្គិចដោយសារ «ព្រឹត្តិការណ៍សហគមន៍ ២០ កុម្ភៈ»។
ទន្ទឹមគ្នានេះ សេដ្ឋកិច្ចកម្ពុជាត្រូវបានព្យាករថា នឹងបន្តងើបឡើងក្នុងរង្វង់ប្រមាណ៥% ក្នុងឆ្នាំ២០២២ ដោយសារការរំពឹងទុកការបន្តងើបឡើងនៃតម្រូវការសកល ការបន្តសក្តានុពលកំណើន នៃវិស័យកាត់ដេរ និងវិស័យកម្មន្តសាលមិនមែនកាត់ដេរ និងការកើនឡើងសន្សឹមៗ នៃវិស័យគាំទ្រផ្សេងទៀត ព្រមទាំងប្រសិទ្ធភាព នៃការដាក់ចេញវិធានការគោលនយោបាយរបស់រាជរដ្ឋាភិបាល ជាពិសេស «ផែនការស្តារសេដ្ឋកិច្ចឡើងវិញក្រោយវិបត្តិជំងឺកូវីដ-១៩»។ នេះបើតាម IMF។
កំណើន ២,២%នេះ គឺដូចគ្នាទៅនឹងការព្យាករដោយធនាគារពិភពលោក(Worl Bank) កាលពីថ្ងៃចន្ទដើមសប្តាហ៍នេះ ថាកំណើនសេដ្ឋកិច្ចកម្ពុជាក្នុងឆ្នាំ២០២១នេះ ត្រូវបានកែសម្រួលមកនៅត្រឹមអត្រា ២,២%ប៉ុណ្ណោះ។ក៏ប៉ុន្តែធនាគារពិភពលោកក៏បានរំពឹងថា សេដ្ឋកិច្ចកម្ពុជាអាចមានការកើនឡើងចំនួន ៤,៥% សម្រាប់ឆ្នាំ២០២២ខាងមុខ ជាមួយនឹងការស្នើឱ្យកម្ពុជាដោះស្រាយបញ្ហាជាប់គាំងលើផ្នែកផ្គង់ផ្គង់ និងព្យាយាមទាញប្រយោជន៍ពីកិច្ចព្រមព្រៀងពាណិជ្ជកម្មសេរីកម្ពុជា-ចិន ដើម្បីធានាបានកំណើនសេដ្ឋកិច្ចល្អ។
កាលពីថ្ងៃទី២២ ខែកញ្ញាកន្លងទៅ ធនាគារអភិវឌ្ឍន៍អាស៊ី(ADB) បានព្យាករថា សេដ្ឋកិច្ចកម្ពុជា នឹងមានកំណើនត្រឹម១,៩% ក្នុងឆ្នាំ២០២១ ដោយសារការអូសបន្លាយនៃជំងឺកូវីដ-១៩។ គឺជាការព្យាករដែលទាញថយក្រោយវិញ បន្ទាប់ពីស្ថាប័នហិរញ្ញវត្ថុអន្តរជាតិមួយនេះ បានព្យាករកាលពីខែមេសាកន្លងទៅថា កំណើនសេដ្ឋកិច្ចកម្ពុជាឆ្នាំ២០២១នេះ នឹងឡើងដល់៤%។ ក៏ប៉ុន្តែ ADB រំពឹងថាកំណើនសេដ្ឋកិច្ចកម្ពុជា នឹងងើបឡើងវិញក្នុងកម្រិត៥,៥% នៅឆ្នាំ២០២២ ប្រហាក់ប្រហែលនឹង IMF ដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ