លោកហ៊ុន សែន ព្រមានវាយខ្នោះអ្នកបកស្រាយខុសពីខ្លឹមសារកិច្ចព្រមព្រៀងសន្តិភាពទីក្រុងប៉ារីស
លោកនាយករដ្ឋមន្រ្តីហ៊ុន សែន បានប្រតិកម្មខ្លាំងៗទៅនឹងអ្នកអត្ថាធិប្បាយដែលបានរិះគន់ថា ការកែរដ្ឋធម្មនុញ្ញពីសំឡេង២/៣មកជា៥០បូក១ គឺខុសនឹងកិច្ចព្រមព្រៀងសន្តិភាពទីក្រុងប៉ារីស។ នៅក្នុងពិធីសម្ពោធដាក់ឱ្យប្រើប្រាស់អគារទីស្តីក្រសួងរៀបចំដែនដី នគរូបនីយកម្ម និងសំណង់នៅព្រឹកថ្ងៃចន្ទនេះ លោកហ៊ុន សែន បានហៅការរិះគន់បែបនេះថា ជាប្រមាថ ហើយព្រមានឱ្យអាជ្ញាធរសមត្ថកិច្ចចាត់ការទៅតាមផ្លូវច្បាប់ បើសិននៅបន្តលើកឡើងខុសពីការពិតនេះទៀត។
ចុះផ្សាយនៅថ្ងៃ៖
ស្តាប់ - ០២:១៣
វា គឺជារឿងដ៏«អាក្រក់អាក្រីណាស់» វា គឺជាការ«ប្រមាថ» ដល់ស្ថាប័នកំពូលៗរបស់ជាតិ និងព្រះមហាក្សត្រកម្ពុជាផង។ ទាំងនេះ គឺជាអ្វី ដែលលោកហ៊ុន សែន នាយករដ្ឋមន្រ្តីនៃកម្ពុជា បាននិយាយខ្លាំងៗទៅកាន់អ្នកអត្ថាធិប្បាយ ដែលរិះគន់ថា ការកែរដ្ឋធម្មនុញ្ញពីសំឡេង២/៣ មក ៥០បូក១ ជារឿងខុសនឹងស្មារតីនៃកិច្ចព្រមព្រៀងសន្តិភាពទីក្រុងបារីស ឆ្នាំ១៩៩១។ ការកែរដ្ឋធម្មនុញ្ញពីសំឡេង២/៣ មក៥០បូក១នេះ គឺធ្វើឡើងនៅក្នុងឆ្នាំ២០០៦ ដែលកែមកជាយ៉ាងនេះថា បើមានសំឡេងគាំទ្រលើសពី៥០ភាគរយ នៅក្នុងរដ្ឋសភា គឺអាចបង្កើតរដ្ឋាភិបាលបានហើយ។
ប្រតិកម្មខ្លាំងៗរបស់នាយកដ្ឋមន្រ្តីកម្ពុជានេះ មិនបានចុចឱ្យចំឈ្មោះបុគ្គលណា ឬក្រុមណាមួយទេ ប៉ុន្តែលោកទំនងជាចង់សំដៅទៅលើអ្នកអត្ថាធិប្បាយក្នុងស្រុកមួយរូប ដែលតែងតែលើកឡើងទាក់ទងទៅបញ្ហាកិច្ចព្រមព្រៀងសន្តិភាពទីក្រុងប៉ារីស។ អ្នកអត្ថាធិប្បាយរូបនោះ បានលើកឡើងថា ការកែរដ្ឋធម្មនុញ្ញពីសំឡេង២/៣ មកជា៥០បូក១ របស់រដ្ឋសភាជាតិ គឺខុសនឹងកិច្ចព្រមព្រៀងសន្តិភាពទីក្រុងប៉ារីស។
ប៉ុន្តែ សម្រាប់លោកនាយរកដ្ឋមន្រ្តី ហ៊ុន សែន វិញ លោកចោទសួរទៅវិញថា តើខុសត្រង់ណាទៅ បើកិច្ចព្រមព្រៀងសន្តិភាពទីក្រុងប៉ារីស មិនបានចែងតម្រូវឱ្យរដ្ឋធម្មនុញ្ញកម្ពុជាត្រូវតែប្រើប្រាស់សំឡេង២/៣ ជាដាច់ខាតឯណាផងនោះ។
ស្របទៅនឹងការបកស្រាយបែបនេះ លោកហ៊ុន សែន ក៏បានព្រមានកុំអ្នកអត្ថាធិប្បាយបកស្រាយព្រហើនដូច្នេះ។ លោកសង្កត់ធ្ងន់ថា ការបកស្រាយដោយចោទថា រដ្ឋសភាធ្វើខុសនឹងកិច្ចព្រមព្រៀងសន្តិភាពទីក្រុងប៉ារីស គឺគេមានសិទ្ធិទៅវាយខ្នោះ យកទៅអនុវត្តតាមផ្លូវច្បាប់ហើយ។
ជាមួយគ្នានេះ លោកប្រមុខរដ្ឋាភិបាលកម្ពុជាក៏បានឆ្លើយតបទៅនឹងការរិះគន់ និងការចង់ឱ្យកិច្ចព្រមព្រៀងសន្តិភាពទីក្រុងបារីស មកគ្របដណ្តប់លើបញ្ហាកម្ពុជា ឬចង់សើរើកិច្ចព្រមព្រៀងនេះឡើងវិញផងដែរ។ តាមលោក ហ៊ុន សែន ការចង់បានបែបហ្នឹង គឺមិនខុសនឹងការចង់ហៅបរទេសមកឱ្យត្រួតត្រាលើប្រទេសកម្ពុជាឡើងវិញនោះទេ។
ប៉ុន្តែ ទោះបីជាការចង់បានបែបនេះក្តី បែបនោះក្តី និងរិះគន់បរិហារយ៉ាងណាក៏ដោយចុះ ក៏លោកនៅតែអនុវត្តទៅតាមរដ្ឋធម្មនុញ្ញរបស់កម្ពុជាដដែល ព្រោះខ្លឹមសារទាំងប៉ុន្មាន ដែលមាននៅក្នុងកិច្ចព្រមព្រៀងសន្តិភាពទីក្រុងប៉ារីស គឺបានបញ្ចូលមកក្នុងរដ្ឋធម្មនុញ្ញអស់ហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ