ធនាគារពិភពលោកដាក់ក្តីរំពឹងថា កំណើនសេដ្ឋកិច្ចកម្ពុជានឹងកើនឡើងដល់ ៤.៥% ក្នុងឆ្នាំ២០២២
ធនាគារពិភពលោក នៅថ្ងៃទី០៩ធ្នូនេះ បានបង្ហាញការព្យាករអំពីចរន្តសេដ្ឋកិច្ចកម្ពុជានាឆ្នាំ២០២២ខាងមុខនេះថា សន្ទុះកំណើនសេដ្ឋកិច្ចកម្ពុជានឹងបន្តកើនឡើងក្នុងរង្វង់ ៤.៥ ភាគរយ។ ការព្យាករណ៍នេះ ធ្វើឡើងដោយផ្អែកទៅលើសញ្ញាល្អនៃការនាំចេញទំនិញក្នុងវិស័យកាត់ដេរ វិស័យកសិកម្ម ទោះបីជាបញ្ហាកូវីដ១៩នៅមិនទាន់ស្ងប់ស្ងាត់យ៉ាងណាក្តី។
ចុះផ្សាយនៅថ្ងៃ៖
ស្តាប់ - ០២:៤៧
សេចក្តីប្រកាសព័ត៌មានរបស់ធនាគារពិភពលោក ចេញផ្សាយនៅថ្ងៃទី០៩ធ្នូ បញ្ជាក់ថា ក្នុងឆ្នាំ២០២២ កំណើនសេដ្ឋកិច្ចរបស់កម្ពុជា នឹងបន្តកើនឡើងចំនួន ៤.៥%។ ការកើនឡើងនេះ ដោយសារតែវិស័យឧស្សាហកម្មកាត់ដេរ, ទំនិញក្នុងផ្នែកធ្វើដំណើរ ស្បែកជើង និងឧស្សាហកម្មផលិតកង់ រួមទាំងវិស័យកសិកម្មផងនោះ នៅតែបន្តដើរតួយ៉ាងសំខាន់ក្នុងការទ្រទ្រង់ដល់យន្តការស្តារសេដ្ឋកិច្ចឱ្យងើបឡើងវិញពីវិបត្តិជំងឺកូវីដ-១៩។
បើតាមទិន្ន័យរបស់ធនាគារពិភពលោក វិស័យឧស្សាហកម្មកាត់ដេរ ទំនិញធ្វើដំណើរ និងស្បែកជើងរបស់កម្ពុជា ក្នុងរយៈពេល៩ខែឆ្នាំ២០២១ បាននាំចេញទៅកាន់ទីផ្សារអន្តរជាតិក្នុងតម្លៃ ៥.៨ពាន់លានដុល្លារ កើនឡើង ១២% នៃទំនិញសរុប ឬ ១៥.២% បើធៀបទៅនឹងរយៈដូចគ្នាកាលពីឆ្នាំមុន។ បន្ថែមពីនេះ ឧស្សាហកម្មផលិតកង់ ការនាំចេញពីកម្ពុជាកើនឡើងចំនួន ២៤.១% ដោយគិតជាទឹកប្រាក់ប្រមាណ ៤.៧រយលានដុល្លារ និងវិស័យកសិកម្មដូចជា ស្រូវ អង្ករ ទទួលបានប្រាក់ចំណូល ២៨៥លានដុល្លារ ខណៈការនាំចេញកៅស៊ូ សម្រេចបានប្រមាណ ២៦៦លានដុល្លារ។
តែយ៉ាងណា ធនាគារពិភពលោកក៏បានបញ្ជាក់ថា កំណើនសេដ្ឋកិច្ច ៤.៥% នាឆ្នាំ២០២២ខាងមុខ ក៏អាចនឹងជួបហានិភ័យទៅវិញផងដែរ ប្រសិនបើស្ថានភាពជំងឺកូវីដ-១៩ នៅតែបន្តរីកសាយភាយម្តងទៀត។ ក្នុងនោះ ធនាគារពិភពលោកបន្តថា ដើម្បីធ្វើឱ្យសេដ្ឋកិច្ចមានកម្លាំងស្ទុះងើបឡើងវិញបាន កម្ពុជាចាំបាច់ត្រូវធ្វើកំណែទម្រង់នូវផ្នែកសំខាន់ៗមួយចំនួន ក្នុងនោះរួមមាន៖ ការដាក់ចេញនូវវិធាននិងបទប្បញ្ញត្តិច្បាស់លាស់ ស្តីពីការរៀនរស់ជាមួយកូវីដ-១៩ ស្របតាម «គន្លងប្រក្រតីភាពថ្មី» វិធានការផ្នែកបទប្បញ្ញត្តិនិងផ្នែកសារពើពន្ធ ដែលជួយដល់ការរស់រានឡើងវិញរបស់វិស័យទេសចរណ៍, និងការដាក់ចេញជាបន្ទាន់នូវបទប្បញ្ញត្តិនានាសម្រាប់អនុវត្តច្បាប់និយោគថ្មីជាដើម។
ដោយឡែក សម្រាប់ផលិតផលក្នុងស្រុកសរុបរបស់កម្ពុជាក្នុងឆ្នាំ២០២១នេះវិញ ធនាគារពិភពលោកក៏ដាក់ក្តីរំពឹងថា នឹងមានកំណើនត្រឹមតែ ២,២%សម្រាប់ឆ្នាំនេះ(២០២១)។ កំណើនតិចតួចនេះ គឺផ្អែកទៅលើទិដ្ឋភាពជាក់ស្តែងថា វិស័យសេវាកម្ម រួមមានវិស័យទេសចរណ៍ វិស័យសំណង់ និងអចលនទ្រព្យ នៅមានកំណើនយឺតយ៉ាវ។ ខណៈក្នុងរយៈពេល៩ខែ ឆ្នាំ២០២១នេះ កម្ពុជាបាននាំចូលមាសចំនួន ៤.០៨ពាន់លានដុល្លារ ដើម្បីទប់ទល់ឱនភាពសេដ្ឋកិច្ច និងទប់ស្កាត់អតិផរណា។
គួរបញ្ជាក់ថា ក្រៅតែពីការព្យាកររបស់ធនាគារពិភពលោក ធនាគារអភិវឌ្ឍន៍អាស៊ី នាពេលថ្មីៗនេះ ក៏បានព្យាករដែរថា សេដ្ឋកិច្ចកម្ពុជា ក្នុងឆ្នាំ២០២២ នឹងកើនឡើងរហូតដល់ ៥.៥% ខណៈលោកនាយករដ្ឋមន្ត្រី ហ៊ុន សែន ដាក់ក្តីរំពឹងថា សេដ្ឋកិច្ចកម្ពុជា នឹងស្ទុះលើសពី ៥% តាមរយៈកំណើននៃការនាំចេញទំនិញកសិកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ