ធនាគារពិភពលោក៖ ការធ្លាក់ចុះជាគំហុកនៃសេដ្ឋកិច្ចកម្ពុជា ដោយសារការពឹងផ្អែកលើផលិតផល និងទីផ្សារតូចចង្អៀត
ធនាគារពិភពលោក នៅថ្ងៃចន្ទទី៣១មករា បានចេញផ្សាយនូវរបាយការណ៍ជំនួយស្មារតីអំពីស្ថានភាពសេដ្ឋកិច្ចនៅកម្ពុជា នៅអំឡុងពេលនៃការរាតត្បាតជំងឺកូវីដ១៩។ របាយការណ៍របស់ធនាគារពិភពលោក បានបង្ហាញថា សេដ្ឋកិច្ចកម្ពុជា បានធ្លាក់ចុះជាគំហុកនៅអំឡុងពេលវិបត្តិនៃជំងឺកូវីដ១៩ ដោយសារតែការពឹងផ្អែកលើផលិតផល និងទីផ្សារនាំចេញ តូចចង្អៀតពេក។ ក៏ប៉ុន្តែសម្រាប់អ្នកនាំពាក្យក្រសួងពាណិជ្ជកម្ម បញ្ជាក់ថា របាយការណ៍របស់ធនាគារពិភពលោកនេះ ត្រឹមត្រូវតែមួយជ្រុងប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:៤០
ថ្លែងប្រាប់វិទ្យុបារាំងអន្តរជាតិនៅព្រឹកថ្ងៃអង្គារនេះ លោក ប៉ែន សុវិជាតិ អនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានបញ្ជាក់ថា របាយការណ៍ចេញផ្សាយរបស់ធនាគារពិភពលោក នោះ គឺត្រូវតែមួយផ្នែកប៉ុណ្ណោះ។ លោកថា ផលិតផលដែលនាំចេញរបស់កម្ពុជា គឺជាផលិតផលសក្តានុពល ដែលត្រូវបាននាំចេញក្នុងបរិមាណ និងទំហំទឹកប្រាក់ធំ តែក៏មានផលិតផលផ្សេងៗទៀត ដែលកំពុងធ្វើពិពិធកម្មនៅក្នុងតំបន់សេដ្ខកិច្ចពិសេសសម្រាប់ការនាំចេញ ដូចជា គ្រឿងបន្លាស់ គ្រឿងបង្គុំ និងផលិតផលកសិកម្ម។
ការបញ្ជាក់នេះ ធ្វើឡើងបន្ទាប់ពីធនាគារពិភពលោក បានចេញផ្សាយនូវរបាយការណ៍មួយ ដោយបង្ហាញថា ក្នុងរយៈពេលប៉ុន្មានឆ្នាំចុងក្រោយ កម្ពុជាបានពឹងផ្អែកទៅលើការនាំចេញផលិតផលធំៗរបស់ខ្លួន មានជាអាទិ៍ ផលិតផលក្នុងវិស័យកាត់ដេរ ស្បែកជើង អង្ករ ដំឡូងមី និងទេសចរណ៍។ ធនាគារពិភពលោក បញ្ជាក់ថា ការនាំចេញផលិតផលទាំងនោះ មានទំហំដល់ទៅ៨០% នៃទំហំនាំចេញសរុបរបស់កម្ពុជា ស្របពេលទីផ្សារធំៗដែលទទួលទំនិញទាំងនោះ មានតែពីរប៉ុណ្ណោះ គឺ សហភាពអឺរ៉ុប និងសហរដ្ឋអាមេរិក។
បើតាមធនាគារពិភពលោក កម្ពុជាត្រូវបង្កើនផលិតភាពរបស់ក្រុមហ៊ុននិងពលករ ការជំរុញវិនិយោគក្នុងស្រុកបន្ថែម និងជាពិសេសការពង្រីកពិពិធកម្មក្នុងការនាំចេញ។ ការធ្វើពិពិធកម្មនាំចេញ ដោយវិនិយោគលើធនធានមនុស្ស ការកែលម្អសមត្ថភាពស្ថាប័នទីផ្សារ រួមទាំងការបង្កើនការគ្រប់គ្រងផ្នែកវិនិយោគសាធារណៈ ជាដើម។
ទោះយ៉ាងណា អ្នកនាំពាក្យក្រសួងពាណិជ្ជកម្ម បានឆ្លើយតបវិញថា បច្ចុប្បន្នកម្ពុជាមានទីផ្សារនាំចេញធំៗផ្សេងទៀត ក្រៅពីសហភាពអឺរ៉ុប និងសហរដ្ឋអាមេរិក។ ក្នុងនោះ ចិន កូរ៉េ ជប៉ុន កាណាដា ក៏ជាទីផ្សារ ដែលមានទំហំទឹកប្រាក់ធំផងដែរ។ នៅទន្ទឹមនេះ កម្ពុជាក៏កំពុងតែធ្វើពិពិធកម្មច្រកទីផ្សារជាបណ្ដើរៗបន្តទៅទៀត។
លោកប៉ែន សុវិជាតិ លើកឡើងទៀតថា រយៈពេល៥ឆ្នាំខាងមុខ ក្រសួងពាណិជ្ជកម្មនឹងពង្រឹងលើផលិតផល ដែលមានសក្ដានុពលស្រាប់ និងជំរុញពិពិធកម្មផលិតកម្មថ្មីៗទៀត សម្រាប់ឆ្លើយតបនឹងតម្រូវការទីផ្សារ ខណៈដែលទីផ្សារក្នុងតំបន់ដែលមានការរំពឹងខ្ពស់បច្ចុប្បន្ននេះ គឺជាពិសេសទីផ្សារចិន និងប្រទេសជាដៃគូពាណិជ្ជកម្ម ក្រោមកិច្ចព្រមព្រៀងពាណិជ្ជកម្មភាពជាដៃគូគ្រប់ជ្រុងជ្រោយ RCEP និងកិច្ចព្រមព្រៀងពាណិជ្ជកម្មទ្វេភាគីកម្ពុជា-ចិន ជាដើម។ បើតាមមន្ត្រីជាន់ខ្ពស់រូបនេះ នៅត្រីមាសទីមួយឆ្នាំ២០២២នេះ កម្ពុជាក៏នឹងអាចទទួលបានការបង្កើនទីផ្សារនាំចេញបន្ថែមទៀត គឺទីផ្សារពាណិជ្ជកម្មសេរី កម្ពុជា-កូរ៉េ។
គួរបញ្ជាក់ថា ជាង២ទសវត្សរ៍ចុងក្រោយ កំណើនសេដ្ឋកិច្ចកម្ពុជាមានជាមធ្យម ៧.៧% ក្នុងមួយឆ្នាំ។ ប៉ុន្តែនៅក្នុងឆ្នាំ២០២០ ទំហំសេដ្ឋកិច្ចធ្លាក់ចុះមកដក ៣.១% មុននឹងស្ដារឡើងវិញនៅក្នុងកំណើន ២.២% នៅដំណាច់ឆ្នាំ២០២១។ នេះបើតាមធនាគារពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ