ធនាគារពិភពលោក៖ វិស័យកម្មន្តសាលកម្ពុជានឹងជួបព្យុះភ្លៀងនាពេលខាងមុខ បន្ទាប់ពីតម្រូវការពីសហរដ្ឋអាមេរិកធ្លាក់ចុះ
ធនាគារពិភពលោកបានអះអាងថា ការនាំចេញវិស័យកម្មន្តសាលរបស់កម្ពុជានារយៈពេលប៉ុន្មានខែខាងមុខ នឹងអាចជួបព្យុះភ្លៀងខ្លាំង។ ការបញ្ជាក់ពីធនាគារពិភពលោកបែបនេះ គឺធ្វើឡើងដោយយោងទៅលើបរិយាកាសខាងក្រៅមិនសូវអំណោយផល ដែលបណ្តាលមកពីការធ្លាក់ចុះនៃតម្រូវការពីសហរដ្ឋអាមេរិក និងការធ្លាក់ចុះជារចនាសម្ព័ន្ធទូទៅនៅប្រទេសចិន។ ក្នុងនោះ ធនាគារពិភពលោកក៏បានព្យាករទៀតថា សម្ពាធអតិផរណាក្នុងប្រទេសកម្ពុជា នឹងបន្តកើនឡើង ហើយការកាត់បន្ថយអត្រានៃភាពក្រីក្រនឹងកាន់តែយឺតយ៉ាវ។
ចុះផ្សាយនៅថ្ងៃ៖
ស្តាប់ - ០២:២៥
ក្នុងរបាយការណ៍សង្ខេប ស្តីពីចក្ខុវិស័យភាពក្រីក្រកម្រិតម៉ាក្រូសម្រាប់តំបន់អាស៊ីបូព៌ានិងប៉ាស៊ីហ្វិក ធនាគារពិភពលោកបានឱ្យដឹងថា ការនាំចេញផលិតផលកម្មន្តសាលរបស់កម្ពុជានឹងជួបការលំបាក។ ជួបការលំបាកដោយសារតែការធ្លាក់ចុះនៃតម្រូវការពីសហរដ្ឋអាមេរិក។ ដោយឡែក ការកើនឡើងនៃតម្លៃថាមពល និងស្បៀងអាហារដែលបង្កឡើងដោយបញ្ហាសង្គ្រាមនៅអ៊ុយក្រែនវិញ ក៏នឹងរាំងស្ទះ និងយឺតយ៉ាវដល់យន្តការកាត់បន្ថយភាពក្រីក្ររបស់កម្ពុជាផងដែរ។ ជាពិសេសវាបានដាក់បន្ទុកបន្ថែមមកលើការចំណាយរបស់ពលរដ្ឋទាំងមូល។
ធនាគារពិភពលោកក៏បានបញ្ជាក់ទៀតថា ការកើនឡើងនៃតម្លៃស្បៀង និងថាមពល ក៏បណ្តាលឱ្យសម្ពាធអតិផរណាក្នុងប្រទេសកម្ពុជាកើនឡើងខ្ពស់ផងដែរ។ ខណៈអតិផរណានៅកម្ពុជាកាលពីខែមករាកន្លងមក បានបន្តកើនឡើងដល់រង្វង់៤.១%។ តែយ៉ាងណា ដោយមានការគាំទ្រពីសំណាកធនាគារជាតិកម្ពុជាលើប្រតិបត្តិការទីផ្សារបើកចំហ អត្រាប្តូរប្រាក់បន្តមានស្ថិរភាពត្រឹម៤១០០រៀលក្នុងមួយដុល្លារ។
ទោះបីយ៉ាងណា បើតាមរបាយការណ៍ខាងលើ កម្ពុជាក្នុងឆ្នាំ២០២២ នៅតែស្ថិតក្នុងចំណោមប្រទេសដែលអាចចាប់យកឱកាសល្អ ហើយកំណើនសេដ្ឋកិច្ចនឹងត្រូវបានព្យាករណ៍ថាកើនដល់ ៤.៥%។ កំណើនជាផលវិជ្ជមាននេះ គឺផ្អែកថា កម្ពុជាបានបើកដំណើរការ និងស្តារសេដ្ឋកិច្ចសង្គមឡើងវិញ យន្តការចាក់វ៉ាក់សាំងក្នុងប្រទេសកម្ពុជាសម្រេចបាន៨៣% ជាពិសេសការដកចេញនូវការហាមឃាត់លក្ខខណ្ឌធ្វើដំណើរទាំងក្នុងស្រុក និងក្រៅស្រុក។
ក៏ប៉ុន្តែ ធនាគារពិភពលោកនៅតែព្រួយបារម្ភអំពីភាពមិនច្បាស់លាស់នៃស្ថានភាពមេរោគកូវីដ១៩ និងបញ្ហាបម្រែបម្រួលសេដ្ឋកិច្ចពិភពលោកដូចជា ការធ្លាក់ចុះនៃតម្រូវការជាសកល និងតម្លៃទំនិញ ប្រេងមានការកើនឡើងខ្ពស់ ដែលអាចជះឥទ្ធិពលមិនល្អមកលើសេដ្ឋកិច្ចកម្ពុជា។ ហើយបើផ្អែកតាមសេណារីយ៉ូទាបរបស់ធនាគារពិភពលោកវិញ កំណើនសេដ្ឋកិច្ចកម្ពុជាក្នុងឆ្នាំនេះអាចសម្រេចបានត្រឹម៣ ៨%ប៉ុណ្ណោះ។
បើតាមរបាយការណ៍របស់ធនាគារពិភពលោកដដែល សកម្មភាពសេដ្ឋកិច្ចក្នុងស្រុកមានដំណើរការល្អ ជាពិសេសការនាំចេញផលិតផលកសិកម្ម។ ក៏ប៉ុន្តែការស្តារសេដ្ឋកិច្ចឡើងវិញរបស់កម្ពុជា ហាក់នៅមិនទាន់មានភាពស្នើគ្នានៅឡើយ។ មិនស្នើគ្នាត្រង់ថា វិស័យកាត់ដេរ ទំនិញធ្វើដំណើរ ស្បែកជើង និងកង់ ក៏ដូចជាវិស័យកសិកម្មត្រូវបានស្តារឡើងវិញទាំងស្រុង។ តែសម្រាប់ វិស័យធ្វើដំណើរ និងទេសចរណ៍ ដែលរួមចំណែកសំខាន់ក្នុងដំណើរការសេដ្ឋកិច្ចកម្ពុជាវិញ នៅមិនទាន់មានសកម្មភាពនៅឡើយ។
សម្រាប់ធនាគារពិភពលោក ប្រសិនបើការកើនឡើងនៃមេរោគកូវីដ១៩វិញ នោះដំណើរការស្តារសេដ្ឋកិច្ចរបស់កម្ពុជានឹងត្រូវបង្អាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ