រដ្ឋសភាគ្រោងប្រជុំអនុម័តសេចក្តីព្រាងច្បាប់វិសោធនកម្មរដ្ឋធម្មនុញ្ញនៅសប្តាហ៍នេះ
បន្ទាប់ពីបានទៅដល់ដៃរដ្ឋសភាកាលពីសប្តាហ៍មុន នៅថ្ងៃចន្ទនេះ គណៈកម្មាធិការអចិន្ត្រៃយ៍នៃរដ្ឋសភាបានសម្រេចកំណត់ថ្ងៃប្រជុំពេញអង្គ ដើម្បីអនុម័តលើសេចក្តីព្រាងច្បាប់ធម្មនុញ្ញ និងសេចក្តីព្រាងច្បាប់មួយចំនួនទៀតនៅក្នុងសប្តាហ៍នេះ។ ការកំណត់ថ្ងៃប្រជុំពេញអង្គរដ្ឋសភាដើម្បីអនុម័តលើការធ្វើវិសោធនកម្មច្បាប់កំពូលនេះ គឺស្របពេលដែលគណបក្សនយោបាយមួយចំនួននៅក្រៅរដ្ឋាភិបាលបានសំដែងការមិនគាំទ្រ។
ចុះផ្សាយនៅថ្ងៃ៖
ស្តាប់ - ០១:៤៩
នៅថ្ងៃព្រហស្បតិ៍សប្តាហ៍នេះ សភាពេញអង្គនឹងបើកកិច្ចប្រជុំលើកទី៧ នីតិកាលទី៦ ដើម្បីពិភាក្សា និងអនុម័តលើសេចក្តីច្បាប់ធម្មនុញ្ញ ស្តីពីវិសោធនកម្មមាត្រា១៩ថ្មី (មួយ) មាត្រា៨៩ មាត្រា៩៨ថ្មី មាត្រា១០២ថ្មី មាត្រា១១៩ថ្មី(មួយ) និងមាត្រា១២៥ថ្មីនៃរដ្ឋធម្មនុញ្ញកម្ពុជា ព្រមទាំងបង្កើតបន្ថែមពីរមាត្រាទៀត គឺមាត្រា៣ថ្មី និងមាត្រា៤ថ្មី។
បើតាមអ្នកឃ្លាំមើល ការប្រជុំអនុម័តលើវិសោធនកម្មរដ្ឋធម្មនុញ្ញជាលើកទី១០នេះ គឺទំនងជាមិនមានអ្វីជាឧបសគ្គនោះឡើយ ខណៈដែលរដ្ឋសភាបច្ចុប្បន្នគឺមានតែមួយគណបក្ស។
ការធ្វើវិសោធនកម្មទ្រង់ទ្រាយធំលើច្បាប់កំពូលនៅពេលនេះ ត្រូវបានរដ្ឋាភិបាលកម្ពុជា អះអាងថាសំដៅធានាដំណើរការជាប្រក្រតីនៃស្ថាប័នជាតិ ខណៈដែលគណបក្សនយោបាយមួយចំនួននៅក្រៅរដ្ឋាភិបាល និងអង្គការសង្គមស៊ីវិលខ្លះ សំដែងការមិនគាំទ្រឡើយ។
ភាពចម្រូងចម្រាស់នេះគឺដោយសារមានការចោទប្រកាន់ពីសំណាក់សង្គមស៊ីវិល និងគណបក្សនយោបាយថាធ្វើឡើងដើម្បីបំរើប្រយោជន៍បក្សពួកខ្លួន មានគោលដៅកាត់បន្ថយអំណាចសភា និងឥទ្ធិពលបក្សប្រឆាំងនៅក្នុងសភាជាដើម។ កាត់បន្ថយឥទ្ធិពលរបស់បក្សប្រឆាំង គឺនៅត្រង់ការកែប្រែមាត្រាមាត្រា៩៨ថ្មី ដែលពីមុនចែងថា រដ្ឋសភាអាចទម្លាក់សមាជិកកគណៈរដ្ឋមន្ត្រី ឬរដ្ឋាភិបាល តាមរយៈញត្តិបន្ទោស ដែលលើកឡើងដោយតំណាងរាស្រ្តចំនួនសាមសិបរូប។ ប៉ុន្តែពេលនេះត្រូវបានដំឡើងរហូតដល់ជាង៤០រូប។
ក៏ប៉ុន្តែរដ្ឋមន្ត្រីក្រសួងយុត្តិធម៌ ក៏ដូចជាគណបក្សកាន់អំណាចបានអះអាងថាការធ្វើវិសោធនកម្មមាត្រាច្បាប់រដ្ឋធម្មនុញ្ញនេះ គឺជាការបំពេញចន្លោះប្រហោងនៃរដ្ឋធម្មនុញ្ញ និងដើម្បីបំរើឧត្តមប្រយោជន៍ជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ