ព្រះមហាក្សត្រខ្មែរឡាយព្រះហស្តលេខាលើវិសោធនកម្មរដ្ឋធម្មនុញ្ញលើកទី១០
ព្រះមហាក្សត្រខ្មែរនៅថ្ងៃទី៦ ខែសីហា ឆ្នាំ២០២២ បានឡាយព្រះហត្តលេខាប្រកាសឱ្យប្រើវិសោធនកម្មរដ្ឋធម្មនុញ្ញ លើកទី១០ ដែលជានីតិវិធីចុងក្រោយនៃការធ្វើវិសោធនកម្មច្បាប់កំពូលមួយនេះ។ ជាវិសោធនកម្មរដ្ឋធម្មនុញ្ញដែលមានភាពចម្រូងចម្រាស់ ដោយសារតែគណបក្សនយោបាយក្រៅរដ្ឋាភិបាល និងសង្គមស៊ីវិលមួយចំនួន យល់ថា ជាការធ្វើឲ្យអំណាចរដ្ឋសភាចុះខ្សោយ។
ចុះផ្សាយនៅថ្ងៃ៖
ស្តាប់ - ០២:១៧
ផ្ទុយពីអ្វីដែលគណបក្សនយោបាយក្រៅរដ្ឋាភិបាលនិងសង្គមស៊ីវិលមួយចំនួនចង់ឃើញ វិសោធនកម្មរដ្ឋធម្មនុញ្ញលើកទី១០ ត្រូវបានសម្រេចដាក់ឱ្យប្រើប្រាស់ជាផ្លូវការហើយ ដោយការឡាយព្រះហស្តលេខា របស់ព្រះមហាក្សត្រខ្មែរនៅថ្ងៃទី៦ ខែសីហា ឆ្នាំ២០២២។
ការធ្វើវិសោធនកម្មរដ្ឋធម្មនុញ្ញលើកទី១០នេះ បានរងនូវការរិះគន់មិនសំចៃមាត់ពីគណបក្សនយោបាយក្រៅរដ្ឋាភិបាលនិងសង្គមស៊ីវិលថា ជាការធ្វើរដ្ឋប្រហារច្បាប់កំពូលកម្ពុជាជាថ្មី ដើម្បីបំពេញប្រយោជន៍ឱ្យលោកនាយករដ្ឋមន្ត្រី ហ៊ុន សែន។ តែយ៉ាងណាមិញ មុនពេលរដ្ឋសភាអនុម័ត រដ្ឋមន្ត្រីក្រសួងយុត្តិធម៌ លោក កើត រិទ្ធ បានថ្លែងការពារការធ្វើវិសោធនកម្មលើកទី១០នេះថា មិនបានប៉ះពាល់ដល់ប្រព័ន្ធប្រជាធិបតេយ្យសេរីពហុបក្ស របបរាជានិយមអាស្រ័យរដ្ឋធម្មនុញ្ញ និងក៏មិនបានកាត់បន្ថយអំណាចសភាណាមួយ ដូចមតិរិះគន់ទាំងនោះដែរ ប៉ុន្តែដើម្បីបំពេញចន្លោះខ្វះខាតនៃរដ្ឋធម្មនុញ្ញ និងធានាការពារឧត្តមប្រយោជន៍ជាតិ។
កាលពីចុងខែកក្កដាកន្លងទៅ ក្រសួងយុត្តិធម៌បានចេញសេចក្តីប្រកាសអញ្ជើញតំណាងអ្នករិះគន់ទាំងឡាយមកស្តាប់ការពន្យល់បកស្រាយទល់មុខគ្នា នៅចំពោះមុខមហាជន សំដៅជម្រះចោលកង្វល់នានាជុំវិញការធ្វើវិសោធនកម្មច្បាប់នេះ។ បើតាមសេចក្តីប្រកាសព័ត៌មានរបស់ក្រសួងយុត្តិធម៌នៅថ្ងៃទី៥ ខែសីហា ឆ្នាំ២០២២ គឺពុំមានតំណាងអ្នករិះគន់ណាម្នាក់ ដែលមកពីគណបក្សទាំង៤ និងអង្គការសង្គមស៊ីវិលទាំង១០៤ស្ថាប័ននោះ មកចូលរួមតាមការអញ្ជើញនោះទេ។ ទង្វើនេះ ត្រូវបានក្រសួងយុត្តិធម៌ហៅថា គឺជាលេសដែលមិនសមហេតុផល ក្នុងការបង្ហាញសាធារណៈជនអោយបានយល់ច្បាស់ពីគោលបំណងនៃការធ្វើវិសោធនកម្មច្បាប់នេះ។
គួរឲ្យដឹងថា វិសោធនកម្មរដ្ឋធម្មនុញ្ញលើកទី១០នេះ ផ្តោតទៅលើមាត្រា១៩ថ្មី មាត្រា៨៩ មាត្រា៩៨ថ្មី មាត្រា១០២ថ្មី មាត្រា១១៩ថ្មី និងមាត្រា៣ថ្មី មាត្រា៤ថ្មីនៃច្បាប់ធម្មនុញ្ញបន្ថែម។ វិសោធនម្មមាត្រាទាំងនេះ ត្រូវមជ្ឈដ្ឋានខ្លះ យល់ថា ជាការកាត់បន្ថយឥទ្ធិពលរបស់បក្សប្រឆាំង គឺនៅត្រង់ការកែប្រែមាត្រា៩៨ថ្មី ដែលពីមុនចែងថា រដ្ឋសភាអាចទម្លាក់សមាជិកកគណៈរដ្ឋមន្ត្រីឬរដ្ឋាភិបាល តាមរយៈញត្តិបន្ទោសដែលលើកឡើងដោយតំណាងរាស្រ្តចំនួនសាមសិបរូប។ ប៉ុន្តែពេលនេះត្រូវបានដំឡើងរហូតដល់ជាង ៤០រូប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ