ករណីរត់ពន្ធស្វាក្តាម៖ ក្រសួងកសិកម្មសម្តែងការហួសចិត្ត និងបន្តស្វែងរកយុត្តិធម៌ដល់មន្ត្រី
ក្រសួងកសិកម្ម រុក្ខាប្រម៉ាញ់ និងនេសាទ សម្តែងការមិនពេញចិត្តបន្ទាប់ពីសហរដ្ឋអាមេរិកឃាត់ខ្លួនប្រធាននាយកដ្ឋានសត្វព្រៃ និងជីវចម្រុះនៃរដ្ឋបាលព្រៃឈើ លោក គ្រី ម៉ះផល ដោយចោទថាលោក សមគំនិតក្នុងការរត់ពន្ធសត្វស្វាក្តាមទៅសហរដ្ឋអាមេរិក។ តាមរយៈសេចក្តីប្រកាសព័ត៌មានរបស់ខ្លួនក្រសួងកសិកម្មអះអាងថានឹង ប្រឹងប្រែងគ្រប់លទ្ធភាពដើម្បីរកយុត្តិធម៌ដល់មន្ត្រីរបស់ខ្លួន។
ចុះផ្សាយនៅថ្ងៃ៖
ស្តាប់ - ០៣:១២
បន្ទាប់ពីសហរដ្ឋអាមេរិកបានឃាត់ខ្លួនប្រធាននាយកដ្ឋានសត្វព្រៃ និងជីវចម្រុះនៃរដ្ឋបាលព្រៃឈើ លោក គ្រី ម៉ះផល ក្រសួងកសិកម្ម បានបង្ហាញការភ្ញាក់ផ្អើល និងក្តីទោមនស្សយ៉ាងខ្លាំង ជុំវិញការឃាត់ខ្លួននេះ។ បើតាមក្រសួងកសិកម្ម ការឃាត់ខ្លួននេះ គឺរឿងគួរឲ្យហួសចិត្តជាទីបំផុត ខណៈលោក គ្រី ម៉ះផល កំពុងធ្វើដំណើរទៅចូលរួមកិច្ចប្រជុំផ្លូវការ ដើម្បីការពារសត្វ និងរុក្ខាជាតិជិតផុតពូជនៅឯវេទិកាអង្គការសហប្រជាជាតិ និងខណៈពេលដែលកម្ពុជានិងអាមេរិកកំពុងមានទំនាក់ទំនងសហប្រតិបត្តិការយ៉ាងជិតស្និទ្ធ។
ពាក់ព័ន្ធករណីនេះលោកបណ្ឌិត សេង សារី អ្នកវិភាគបញ្ហាសង្គម និងនយោបាយ បានបញ្ជាក់ថា បញ្ហាខាងលើនេះ សហរដ្ឋអាមេរិកបានខិតខំប្រឹងប្រែងតាមចាប់ខ្លួនអ្នកដែលជាប់ព័ន្ធ ដោយសារករណីនេះ វាបានកើតឡើងចាប់តាំងពីឆ្នាំ២០១៧មកម្លេះ។ បើតាមលោកបណ្ឌិត សេង សារី លោកមិនបានសិក្សាច្បាស់លាស់ចំពោះច្បាប់របស់អាមេរិកទាក់ទងនឹងករណីនេះឡើយ ហើយការចោទប្រកាន់នេះ មិនដឹងថាគាត់ប្រព្រឹត្តដូចការចោទមែនឬក៏អត់?
យ៉ាងណាក៏ដោយចំពោះករណីនេះ ក្រសួងកសិកម្ម បានអះអាងថា រដ្ឋាភិបាលកម្ពុជានឹងខិតខំឲ្យអស់ពីលទ្ធភាពដើម្បីស្វែងរកយុត្តិធម៌ជូនមន្រ្តីរបស់ខ្លួន។ ក្រសួងកសិកម្មបានបញ្ជាក់ថា សត្វស្វាក្តាម ត្រូវបានចិញ្ចឹមនៅកម្ពុជាតាំងពីឆ្នាំ២០០៥ ហើយត្រូវបាននាំចេញសម្រាប់គោលដៅវេជ្ជសាស្រ្ត ជាពិសេសសម្រាប់ដំណាក់ការធ្វើពិសោធន៍ ដើម្បីផលិតឱសថ វ៉ាក់សាំង ឬគ្រឿងសំអាង។ សត្វស្វាក្តាមដែលត្រូវបាននាំចេញទាំងនេះ មិនមែនត្រូវបានចាប់ពីព្រៃហើយបញ្ជូនចេញទៅក្រៅប្រទេសនោះទេ។
ក្រសួងកសិកម្មបន្តថា កសិដ្ឋានដែលចិញ្ចឹមសត្វស្វាក្តាម ទម្រាំទទួលបានការទទួលស្គាល់ផ្លូវច្បាប់ គឺសុទ្ធតែតម្រូវឲ្យគោរពតាមបទដ្ឋានអនាម័យ និងវិធីសាស្រ្តចិញ្ចឹមត្រឹមត្រូវ ដើម្បីរក្សាឲ្យបាននូវហ្សេនេទិករបស់វាមិនឲ្យផុតពូជនោះឡើយ។ ក្រសួងកសិកម្មបញ្ជាក់បន្ថែមថា ការនាំចេញសត្វស្វាក្តាម ត្រូវអនុញ្ញាតឲ្យនាំចេញ ដោយផ្អែកលើច្បាប់ និងបទបញ្ញត្តិជាតិ និងអន្តរជាតិ។ ចំពោះការនាំចូលទៅសហរដ្ឋអាមេរិក គឺត្រូវបានអនុវត្តទៅតាមនីតិវិធីរបស់សហរដ្ឋអាមេរិកផងដែរ។
សូមបញ្ជាក់ថា មន្ត្រីកម្ពុជាដែលជាអនុប្រធាននាយកដ្ឋានសត្វព្រៃនិងជីវចម្រុះ ត្រូវបានចាប់ខ្លួននៅក្នុងព្រលានយន្តហោះ ក្នុងក្រុងញូយ៉ក សហរដ្ឋអាមេរិក កាលពីថ្ងៃទី១៦ខែវិច្ឆិកា។ បើតាមក្រសួងយុត្តិធម៌អាមេរិក មានភស្តុតាងដាក់បន្ទុកចំនួន៣១ ដូចយ៉ាងប្រតិបត្តិការហិរញ្ញវត្ថុ និងការដឹកជញ្ជូនសត្វស្វារាប់រយក្បាលក្រោមឯកសារក្លែងបន្លំ ទៅកាន់រដ្ឋផ្លរីដា និងរដ្ឋតិចសាស់ ប្រទេសអាមេរិក និងទៅកាន់ក្រុមហ៊ុនឯកជនស្រាវជ្រាវផ្នែកជីវសាស្ត្រឈ្មោះ «Vanny Bio Research» របស់ជនជាតិហុងកុង ក្នុងខេត្តពោធិ៍សាត់ ប្រទេសកម្ពុជា។
ក្រសួងយុត្តិធម៌អាមេរិកបញ្ជាក់ថា តុលាការកំពុងដំណើរការក្តីរត់ពន្ធសត្វស្វាក្តាមខុសច្បាប់ជាចង្កោមនេះ លើជនជាប់ចោទសរុបចំនួន ៨នាក់ ដែលក្នុងនោះមាន២នាក់ជាមន្ត្រីរដ្ឋកម្ពុជា និង៦នាក់ទៀតជាម្ចាស់និងបុគ្គលិកជាន់ខ្ពស់របស់ «Vanny Bio Research» ដែលជាស្ថាប័ននាំចេញឬផ្គត់ផ្គង់ថនិកសត្វផ្តាច់មុខសម្រាប់ការស្រាវជ្រាវផ្នែកជីវសាស្ត្រ។ ពួកគេអាចត្រូវប្រឈមនឹងការកាត់ទោសរហូតដល់៥ឆ្នាំ លើបទសមគំនិត និងអាចរហូតដល់២០ឆ្នាំ លើបទចោទប្រកាន់រត់ពន្ធចំនួន៧ករណី និងត្រូវរងការផាកពិន័យជាទឹកប្រាក់ប្រមាណ ១៥ម៉ឺនដុល្លារ ឬ ២ដងនៃប្រាក់ចំណេញពីបទល្មើសរត់ពន្ធសត្វនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ