លោក ឌិត ទីណា៖ ៣ឆ្នាំចុងក្រោយកម្ពុជានាំចេញស្វាជិត ៧ម៉ឺនក្បាល ដោយអនុលោមតាមអនុសញ្ញាCITES
ក្នុងរយៈពេល៣ឆ្នាំចុងក្រោយ កម្ពុជាបាននាំចេញស្វាចំនួនជិត ៧ម៉ឺនក្បាល ដែលអនុលោមតាមអនុសញ្ញា CITES។ នេះបើតាមគណនីយបណ្តាញសង្គមទ្វីតធ័ររបស់លោក ឌិត ទីណា រដ្ឋមន្ត្រី កសិកម្ម នៅថ្ងៃទី២១ ខែវិច្ឆិកានេះ បន្ទាប់ពីសហរដ្ឋអាមេរិកបានឃាត់ខ្លួនប្រធាននាយកដ្ឋានសត្វព្រៃ និងជីវចម្រុះនៃរដ្ឋបាលព្រៃឈើក្រសួងកសិកម្ម កាលពីសប្តាហ៍មុន។
ចុះផ្សាយនៅថ្ងៃ៖
ស្តាប់ - ០៣:០៩
លោក ឌិត ទីណាសរសេរថា សរុបរយៈពេល៣ឆ្នាំចុងក្រោយ កម្ពុជាបាននាំចេញស្វាចំនួន ៦៨,០៧៦ក្បាល ស្របតាមអនុសញ្ញាស្តីពីការហាមប្រាមការធ្វើពាណិជ្ជកម្មអន្តរជាតិលើប្រភេទសត្វ និងរុក្ខជាតិព្រៃដែលប្រឈមនឹងការជិតផុតពូជ ហៅកាត់ថា សាយតេស (CITES)។ លោកបន្តថា ស្វាដែលអាមេរិកយល់ថាជាសត្វកម្រនោះ គឺគេស្គាល់យ៉ាងទូលំទូលាយសម្រាប់ប្រជាជនកម្ពុជាថាជាស្វាវត្តភ្នំ។
សំណេរនៅលើបណ្តាញសង្គម Twitter របស់លោក ឌិត ទីណា បន្តថា ដោយគោរពតាមអនុញ្ញា CITES សូម្បីតែស្វាវត្តភ្នំក៏មិនត្រូវបាននាំចេញដែរ។ គេអាចបង្កើតកូនរបស់វានៅកសិដ្ឋាន ហើយមានតែកូនស្វាជំនាន់ក្រោយប៉ុណ្ណោះ ដែលត្រូវបាននាំចេញ និងនាំចេញសម្រាប់គោលដៅស្រាវជ្រាវផ្នែកវេជ្ជសាស្រ្ត។ តាមរយៈសំណេរដដែលលោកបានដាក់ជាសំនួរថា តើមានស្វាប៉ុន្មានក្បាល ក្នុងចំណោមស្វា ៦៨,០៧៦ក្បាល ដែលរួមចំណែកដល់ការបង្កើតវ៉ាក់សាំងកូវីដ១៩?
លោកសរសេរថា ស្វាក្តាម ឬដែលគេស្គាល់ថាស្វាវត្តភ្នំ គឺជាប្រភេទ "ជិតផុតពូជ" នៅក្នុងឧបសម្ព័ន្ធទី២នៃអនុសញ្ញាCITES ហើយយើងគោរពតាមអនុសញ្ញានេះ។ តើកម្ពុជាធ្វើដូចម្តេចទើបអាចនាំចេញបានដល់ ១ម៉ឺន៧ពាន់/ឆ្នាំ? គឺយើងចិញ្ចឹមពួកវា!
យោងតាមរបាយការណ៍ក្រសួងកសិកម្ម គិតត្រឹមខែតុលា ឆ្នាំ២០២២នេះ កម្ពុជាមានក្រុមហ៊ុនចំនួន៥ ដែលមានកសិដ្ឋានស្រាវជ្រាវ ចិញ្ចឹម និងបង្កាត់ពូជសត្វស្វាក្តាមយកកូននាំចេញចំនួន៦ទីតាំង ដែលស្ថិតនៅរាជធានីភ្នំពេញ ខេត្តកំពង់ធំ សៀមរាប កំពង់ចាម កំពង់ស្ពឺ ពោធិ៍សាត់ និងខេត្តកំពង់ឆ្នាំ។ ទីតាំងទាំងនោះ មានស្វាក្តាមចំនួន ១៣៩ ៦០៥ក្បាល។
កាលពីថ្ងៃទី១៧ ខែវិច្ឆិកាកន្លងទៅ ក្រសួងកសិកម្ម រុក្ខាប្រម៉ាញ់ និងនេសាទ បានចេញសេចក្តីថ្លែងការណ៍មួយ សម្តែងការមិនពេញចិត្តបន្ទាប់ពីសហរដ្ឋអាមេរិកឃាត់ខ្លួនប្រធាននាយកដ្ឋានសត្វព្រៃ និងជីវចម្រុះនៃរដ្ឋបាលព្រៃឈើ ដោយចោទថាលោក សមគំនិតក្នុងការរត់ពន្ធសត្វស្វាក្តាមទៅសហរដ្ឋអាមេរិក។ ក្រសួងកសិកម្មអះអាងថានឹង ប្រឹងប្រែងគ្រប់លទ្ធភាពដើម្បីរកយុត្តិធម៌ដល់មន្ត្រីរបស់ខ្លួន។
សូមបញ្ជាក់ថា មន្ត្រីកម្ពុជាដែលជាអនុប្រធាននាយកដ្ឋានសត្វព្រៃនិងជីវចម្រុះ ត្រូវបានចាប់ខ្លួននៅក្នុងព្រលានយន្តហោះ ក្នុងក្រុងញូយ៉ក សហរដ្ឋអាមេរិក កាលពីថ្ងៃទី១៦ខែវិច្ឆិកា។ បើតាមក្រសួងយុត្តិធម៌អាមេរិក មានភស្តុតាងដាក់បន្ទុកចំនួន៣១ ដូចយ៉ាងប្រតិបត្តិការហិរញ្ញវត្ថុ និងការដឹកជញ្ជូនសត្វស្វារាប់រយក្បាលក្រោមឯកសារក្លែងបន្លំ ទៅកាន់រដ្ឋផ្លរីដា និងរដ្ឋតិចសាស់ ប្រទេសអាមេរិក និងទៅកាន់ក្រុមហ៊ុនឯកជនស្រាវជ្រាវផ្នែកជីវសាស្ត្រឈ្មោះ «Vanny Bio Research» របស់ជនជាតិហុងកុង ក្នុងខេត្តពោធិ៍សាត់ ប្រទេសកម្ពុជា។
ក្រសួងយុត្តិធម៌អាមេរិកបញ្ជាក់ថា តុលាការកំពុងដំណើរការក្តីរត់ពន្ធសត្វស្វាក្តាមខុសច្បាប់ជាចង្កោមនេះ លើជនជាប់ចោទសរុបចំនួន ៨នាក់ ដែលក្នុងនោះមាន២នាក់ជាមន្ត្រីរដ្ឋកម្ពុជា និង៦នាក់ទៀតជាម្ចាស់និងបុគ្គលិកជាន់ខ្ពស់របស់ «Vanny Bio Research» ដែលជាស្ថាប័ននាំចេញឬផ្គត់ផ្គង់ថនិកសត្វផ្តាច់មុខសម្រាប់ការស្រាវជ្រាវផ្នែកជីវសាស្ត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ