ធនាគារពិភពលោក៖ កូវីដ-១៩ រុញភាពក្រីក្រកម្ពុជាឲ្យងើបឡើងវិញបន្ទាប់ពីធ្លាក់ចុះអស់១ទស្សវត្សរ៍
អស់រយៈពេល១០ឆ្នាំ ពោលគឺចាប់តាំងពីឆ្នាំ ២០០៩ ដល់ឆ្នាំ ២០១៩ ភាពក្រីក្រនៅក្នុងប្រទេសកម្ពុជាបានធ្លាក់ចុះសឹងតែពាក់កណ្តាលពីកម្រិតជាង៣៣% មកត្រឹមជាង១៧%។ ក៏ប៉ុន្តែការរាតត្បាតនៃជំងឺកូវីដ-១៩ ចាប់ពីឆ្នាំ២០២០មក បានធ្វើឲ្យអត្រានៃភាពក្រីក្របានកើនឡើងវិញជិត៣%។ នេះបើតាមការវាយតម្លៃភាពក្រីក្រក្រោមចំណងជើងថា«ស្តារសេដ្ឋកិច្ចកម្ពុជាឲ្យកាន់តែមានបរិយាបន្ន និងភាពធន់ជាងមុនរបស់ធនាគារពិភពលោក ដែលបានចេញផ្សាយនៅថ្ងៃចន្ទ ទី២៨ ខែវិច្ឆិកានេះ។
ចុះផ្សាយនៅថ្ងៃ៖
ស្តាប់ - ០៣:១០
យោងតាមរបាយការណ៍វាយតម្លៃភាពក្រីក្រក្រោមចំណងជើង “ស្តារសេដ្ឋកិច្ចកម្ពុជាឱ្យកាន់តែមានភាពបរិយាបន្ននិងភាពធន់ជាងមុន” របស់ធនាគារពិភពលោក នៅក្នុងរយៈពេល១០ឆ្នាំ គិតមកដល់ឆ្នាំ២០១៩-២០២០ អត្រាភាពក្រីក្ររបស់កម្ពុជាបានធ្លាក់ចុះពីកម្រិត ៣៣,៨% មកនៅត្រឹម ១៧,៨% ដោយជួយឲ្យប្រជាជនកម្ពុជាជិត ២លាននាក់ បានរួចផុតពីភាពក្រីក្រ។ ប៉ុន្តែចាប់តាំងពីឆ្នាំ២០២០មក អត្រានេះបានកើនឡើង ២,៨% ស្មើនឹងប្រជាជន ៤៦០ ០០០នាក់ បានធ្លាក់ទៅស្ថិតនៅក្រោមកម្រិតប្រាក់ចំណូលនៃភាពក្រីក្រវិញ។
នៅចន្លោះឆ្នាំ២០០៩ ដល់ឆ្នាំ២០១៩ របាយការណ៍បានរកឃើញថា ការកើនឡើងប្រាក់ចំណូលមិនមែនកសិកម្ម ជាឧទាហរណ៍នៅក្នុងវិស័យទេសចរណ៍ កាត់ដេរ និងសំណង់ មានចំណែកធំក្នុងការកាត់បន្ថយភាពក្រីក្រ។ កំណើនដែលនាំមុខដោយពាណិជ្ជកម្ម និងការវិនិយោគ បានជួយទ្រទ្រង់ដល់ការផ្លាស់ប្តូរជារចនាសម្ព័ន្ធឆ្ពោះទៅរកវិស័យមានផលិតភាពកាន់តែខ្ពស់ ជួយបង្កើតបានការងារដែលមានប្រាក់ខែកាន់តែប្រសើរនៅក្នុងផ្នែកផលិតកម្មនិងផ្នែកសេវាកម្ម។
ទន្ទឹមគ្នានេះដែរ លក្ខខណ្ឌជីវភាព និងលទ្ធភាពទទួលបានសេវាមូលដ្ឋានមានដូចជា អគ្គិសនី ការផ្គត់ផ្គង់ទឹកស្អាត អនាម័យ សុខភាព និងការអប់រំជាដើម មានភាពប្រសើរឡើងសម្រាប់មួយភាគធំនៅក្នុងចំណោមប្រជាជនទូទៅ។ ការកែលម្អនៃស្ថានភាពនេះបានធ្វើឱ្យគម្លាតរវាងស្តង់ដាជីវភាពរបស់គ្រួសារនៅទីជនបទ និងនៅទីប្រជុំជនរួមតូចជាងមុន។
ប្រធានគ្រប់គ្រងការិយាល័យធនាគារពិភពលោកប្រចាំកម្ពុជា លោកស្រី ម៉ារីយ៉ាម សាលីម ថ្លែងថា កិច្ចខិតខំជំរុញឲ្យមានការផ្លាស់ប្តូជារចនាសម្ព័ន្ធបានជួយកាត់បន្ថយភាពក្រីក្រក្នុងរយៈពេលកន្លងមក។ ប៉ុន្តែ ទន្ទឹមនឹងជោគជ័យគួរឲ្យកត់សម្គាល់នេះ គ្រួសារជាច្រើនស្ថិតនៅក្នុងស្ថានភាពងាយរងគ្រោះនៅឡើយ ដោយសារពួកគេមិនសូវមានប្រាក់សន្សំ ឬគ្មានសំណាញ់ការពារផ្នែកសង្គម។ ត្រង់នេះចំណុចនេះ លោកស្រីចង់មានន័យថា ជំងឺកូវីដ-១៩ បានរុញថយក្រោយវិញនូវវឌ្ឍនភាពរបស់កម្ពុជាក្នុងការប្រយុទ្ធនឹងភាពក្រីក្រ ដោយធ្វើឲ្យប្រជាជនជាច្រើនបាត់បង់ការងារនិងប្រាក់កម្រៃ។
ជាមួយគ្នានេះធនាគារពិភពលោកក៏បានលើកអនុសាសន៍ដែរថា កម្ពុជាគួរពិចារណាលើអន្តរាគមន៍ផ្នែកគោលនយោបាយមួយចំនួន ដើម្បីគាំទ្រដល់ការស្តារសេដ្ឋកិច្ចឡើងវិញប្រកបដោយបរិយាបន្ន និងធន់ជាងមុន ពីការប៉ះទង្គិចរបស់ជំងឺរាតត្បាត និងវិបត្តិសេដ្ឋកិច្ចដែលមានមកជាមួយវា។ អន្តរាគមន៍ទាំងនោះអាចរួមមាន ការផ្ទេរសាច់ប្រាក់តាមគោលដៅកំណត់ វិធានការពង្រឹងកិច្ចគាំពារសង្គម និងការវិនិយោគលើវិស័យសុខាភិបាល និងការអប់រំ ជាដើម។
សូមរំលឹកដែរថា រដ្ឋាភិបាលកម្ពុជាកាលពីពេលថ្មីៗនេះ បានប្រកាសឧបត្ថម្ភដល់គ្រួសារក្រីក្រ ដែលរងផលប៉ះពាល់ដោយអតិផរណាពីសង្គ្រាមរុស្ស៊ី-អ៊ុយក្រែន ចំនួន៦០ម៉ឺនគ្រួសារ រួមនឹងការបន្តឧបត្ថម្ភសាច់ប្រាក់បន្តដល់គ្រួសារដែលរងគ្រោះដោយវិបត្តិកូវីដ-១៩ ជាសរុបជួយឧបត្ថម្ភទៅដល់មនុស្សជិត ៥លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ