ធនាគារពិភពលោកផ្តល់ឥណទានជាង២៧០លានដុល្លារ ជួយជំរុញកំណើននិងពង្រឹងភាពធន់កម្ពុជា
ធនាគារពិភពលោក(World Bank) កាលពីថ្ងៃអង្គារម្សិលមិញបានសម្រេចផ្តល់ឥណទានចំនួន ២៧៤លានដុល្លារបន្ថែមទៀតដល់ប្រទេសកម្ពុជា ដើម្បីជួយស្តារសេដ្ឋកិច្ចប្រទេសនេះឲ្យងើបឡើងវិញ ក្រោយរងការប៉ះទង្គិចដោយវិបត្តិនាពេលថ្មីៗនេះ។ ការផ្តល់ហិរញ្ញប្បទានដល់កម្ពុជាពេលនេះ ត្រូវធនាគារពិភពលោកយល់ឃើញថា វានឹងជួយដល់កំណែទម្រង់សម្រាប់ជំរុញកំណើន និងពង្រឹងភាពធន់របស់កម្ពុជា។ នេះបើតាមការប្រកាសព័ត៌មានរបស់ធនាគារពិភពលោក។
ចុះផ្សាយនៅថ្ងៃ៖
ស្តាប់ - ០៣:០០
ហេតុផលដែលក្រុមប្រឹក្សានាយកប្រតិបត្តិធនាគារពិភពលោក(World Bank) អនុម័តផ្តល់ហិរញ្ញប្បទានដល់កម្ពុជាពេលនេះ គឺដោយសារតែសេដ្ឋកិច្ចកម្ពុជាបានរងនូវការខូចខាតធ្ងន់ធ្ងរពីសំណាក់ជំងឺរាតត្បាតកូវីដ-១៩ ដែលធ្វើឲ្យផលិតផលក្នុងស្រុកសរុបបានធ្លាក់ចុះ ៣,១% ក្នុងឆ្នាំ២០២០ ជាការធ្លាក់ចុះដ៏ខ្លាំងលើកដំបូងក្នុងរយៈពេល៣០ឆ្នាំចុងក្រោយ។ នេះបើតាមការប្រកាសព័ត៌មានរបស់ធនាគារពិភពលោក។
ក៏ប៉ុន្តែរដ្ឋាភិបាលកម្ពុជាបានឆ្លើយតបយ៉ាងរហ័ស និងប្រកបដោយប្រសិទ្ធភាពតាមរយៈអន្តរាគមន៍ជួយដល់អាជីវកម្ម និងគ្រួសារងាយរងគ្រោះជាដើម។ ធនាគារពិភពលោក កត់សម្គាល់ថាទោះជាសេដ្ឋកិច្ចកម្ពុជាងើបឡើងវិញនៅឆ្នាំ២០២១ និងឆ្នាំ២០២២ក៏ដោយ ក៏លទ្ធភាពទទួលបានអត្រាកំណើនដ៏រឹងមាំ ដែលកម្ពុជាធ្លាប់មានកាលពីមុនវិបត្តិកូវីដ-១៩ ក្នុងរង្វង់៧% ពិតជានឹងមិនងាយរកបានទេ។
មិនងាយរកបានដោយហេតុថា សង្គ្រាមអ៊ុយក្រែននៅតែបន្ត ការធ្លាក់ចុះនៃសេដ្ឋកិច្ចនៅអាមេរិកដែលជាទីផ្សារធំរបស់កម្ពុជា និងកំណើនយឺតនៅក្នុងប្រទេសចិន ដែលកត្តាទាំងអស់នេះសុទ្ធសឹងតែជះឥទ្ធិពលមិនល្អមកលើវិស័យពាណិជ្ជកម្មរបស់កម្ពុជា ខណៈកម្ពុជាក៏រងគ្រោះខ្លាំងដោយការប្រែប្រួលអាកាសធាតុ។កាលពីពេលថ្មីៗនេះ ធនាគារពិភពលោកបានព្យាករណ៍ថាសេដ្ឋកិច្ចកម្ពុជាមានកំណើន ៤,៨% នៅឆ្នាំ២០២២ ហើយកើនដល់ ៥,២%នៅឆ្នាំ២០២៣ខាងមុខ។
លោកស្រី ម៉ារៀម សាលីម ប្រធានគ្រប់គ្រងធនាគារពិភពលោកប្រចាំនៅកម្ពុជាថ្លែងបញ្ជាក់ថា ខណៈដែលយុទ្ធសាស្ត្ររស់ជាមួយកូវីដ-១៩ បានជួយស្តារសេដ្ឋកិច្ចឲ្យរើបឡើងវិញក៏ពិតមែន ក៏ប៉ុន្តែកម្ពុជានៅតែងាយរងគ្រោះដោយសារចរន្តធ្លាក់ចុះនូវតម្រូវការក្រៅប្រទេស និងការរអាក់រអួលនានានៅក្នុងខ្សែចង្វាក់ផ្គត់ផ្គង់សកលនៅឡើយ។
ទោះយ៉ាងណាហិរញ្ញប្បទានរបស់ World Bank នេះ នឹងជួយទ្រទ្រង់ដល់កំណែទម្រង់ ដែលនឹងសម្រួលដំណើរការចុះបញ្ជីអាជីវកម្ម លើកកម្ពស់ការប្រកួតប្រជែង និងពង្រីកលទ្ធភាពទទួលបានហិរញ្ញវត្ថុសម្រាប់សហគ្រាសធុនតូច និងមធ្យម រួមនឹងអត្ថប្រយោជន៍ផ្សេងៗទៀតរបស់រដ្ឋាភិបាលកម្ពុជា។
សូមរំលឹកថាកាលពីខែមករា ដើមឆ្នាំ២០២២ ធនាគារពិភពលោកបានផ្តល់ជំនួយហិរញ្ញប្បទានចំនួនជាង ៦៩លានដុល្លារ ដើម្បីជួយកម្ពុជាក្នុងការធ្វើឲ្យកាន់តែប្រសើរនូវលទ្ធភាពប្រកបដោយសមធម៌ក្នុងការទទួលបានការអប់រំជាមូលដ្ឋាន និងការឆ្លើយតបឲ្យបានរហ័សទៅនឹងវិបត្តិនានាដែលប៉ះពាល់ដល់ប្រព័ន្ធអប់រំក្នុងប្រទេស។ បន្ថែមពីនេះ ធនាពិភពលោកក៏បានផ្តល់ហិរញ្ញប្បទានចំនួន ១១៣លានដុល្លារ កាលពីខែមីនា ឆ្នាំ២០២២កន្លងទៅ សម្រាប់ជួយលើកកម្ពស់លទ្ធភាពទទួលបានសេវាថែទាំសុខភាពមានគុណភាពនៅកម្ពុជាពីរដំណាក់កាលផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ