មេធាវីការពារក្តីលោក កឹម សុខា បារម្ភហួសពេលប្តឹងឧទ្ធរណ៍ ខណៈមានការរារាំងមិនឲ្យជួបកូនក្តី
មេធាវីការពារក្តីឲ្យ លោក កឹម សុខា កាលពីម្សិលមិញ បានចេញសេចក្តីថ្លែងការណ៍មួយដោយបញ្ជាក់ថា កងកម្លាំងស្លៀកពាក់ស៊ីវិលដែលយាមផ្ទះអតីតមេដឹកនាំបក្សប្រឆាំងរូបនេះ បានរារាំងមិនឲ្យក្រុមមេធាវីចូលជួបកូនក្តីឡើយ។ ការរារាំងនេះគឺកងកម្លាំងត្រូវឲ្យក្រុមមេធាវីទៅសុំអនុញ្ញាតពីព្រះអាជ្ញាជាមុនសិន។ ប៉ុន្តែសម្រាប់មេធាវីការពារក្តីគូសបញ្ជាក់ថា គ្មានច្បាប់ណាតម្រូវបែបនេះទេ ហើយថាមេធាវីមិនអាចធ្វើតាមការណែនាំដែលផ្ទុយនឹងច្បាប់បែបនេះឡើយ។
ចុះផ្សាយនៅថ្ងៃ៖
ស្តាប់ - ០១:៤៧
លោក អាង ឧត្តម សហមេធាវីការពារក្តីលោក កឹម សុខា ប្រាប់វិទ្យុបារាំងអន្តរជាតិRFI នៅថ្ងៃទី១៥មីនាថា លោកមានការបារម្ភពីការផុតកំណត់ប្តឹងឧទ្ធរណ៍ប្រឆាំងសាលក្រមតុលាការក្រុងភ្នំពេញ។ តុលាការជាន់ទាបនេះបានកាត់ទោសអតីតមេដឹកនាំបក្សប្រឆាំងដាក់ឃុំក្នុងផ្ទះ២៧ឆ្នាំក្រោមបទចោទ«សន្និដ្ឋិភាព»ជាមួយបរទេសផ្តួលរំលំរដ្ឋាភិបាលកម្ពុជា។
នៅក្នុងសេចក្តីថ្លែងការណ៍ថ្ងៃទី១៤មីនា សហមេធាវីការពារក្តីលោក កឹម សុខា អះអាងថាចាប់ពីពេលនេះទៅ សហមេធាវីមិនអាចអនុវត្តសិទ្ធ បំពេញកាតព្វកិច្ច និងទទួលខុសត្រូវចំពោះលោក កឹម សុខា និងរឿងក្តីបច្ចុប្បន្នបានទៀតឡើយ។
បើតាមក្រុមមេធាវីដដែល សិទ្ធិរបស់លោក កឹម សុខា ដែលត្រូវទទួលបានមេធាវីការពារក្តី និងបានធានាដោយច្បាប់ ត្រូវបានរំលោភយ៉ាងធ្ងន់ធ្ងរ វៀរលែងតែមានការប្រែជាវិជ្ជមាន និងទាន់ពេល។ ការណ៍នេះ បានញាំងឲ្យមេធាវីការពារក្តីលោក កឹម សុខា បារម្ភហួសពេលប្តឹងឧទ្ធរណ៍ ខណៈថេរវេលាត្រឹម១ខែគិតចាប់ពីថ្ងៃប្រកាសសាលក្រមកាលពីថ្ងៃទី៣មីនា។
យោងតាមសេចក្តីថ្លែងការណ៍របស់តំណាងអយ្យការតុលាការក្រុងភ្នំពេញ ចេញក្រោយពេលប្រកាសសាលក្រមបានគូសបញ្ជាក់ថា «មិនត្រូវឲ្យ[លោក កឹម សុខា]ជួបបុគ្គលណាម្នាក់ ទាំងសញ្ជាតិខ្មែរ និងបរទេស ដោយផ្ទាល់ ឬប្រយោលតាមប្រព័ន្ធបច្ចេកវិទ្យា ក្រៅពីសមាជិកគ្រួសារ លើកលែងតែមានការអនុញ្ញាតដោយព្រះរាជអាជ្ញាសាលាដំបូង ដោយតម្រូវការចាំបាច់ប៉ុណ្ណោះ។
ជុំវិញការកាត់ទោសលោក កឹម សុខា សហភាពអឺរ៉ុប នឹងកោះប្រជុំសមាជិករបស់ខ្លួននៅថ្ងៃទី១៥ និង១៦មីនានេះ ហើយក៏មានរបៀបវារៈមួយដែរ និយាយពីករណីប្រទេសកម្ពុជា។ បើតាមសហភាពអឺរ៉ុប គេនឹងមានការបោះឆ្នោតដើម្បីរកដំណោះស្រាយជាបន្ទាន់មួយសម្រាប់លោក កឹម សុខា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ