លោក កឹម សុខា មានឱកាសប្ដឹងឧទ្ធរណ៍ ក្រោយអយ្យការអនុញ្ញាតឲ្យជួបមេធាវី
លោក កឹម សុខា ប្រធានអតីតគណបក្សសង្រ្គោះជាតិ តាមរយៈមេធាវីតំណាងឲ្យខ្លួនអាចនឹងធ្វើការប្ដឹងទៅសាលាឧទ្ធរណ៍ ជំទាស់ទៅនឹងសាលក្រមរបស់សាលាដំបូងរាជធានីភ្នំពេញ ដែលបានផ្ដន្ទាទោសលោកឲ្យជាប់ពន្ធនាគារ ២៧ឆ្នាំ ក្នុងសំណុំរឿងក្បត់ជាតិ។ ការប្ដឹងទាស់នេះ អាចធ្វើទៅបានក្រោយពីអយ្យការអនុញ្ញាតឲ្យលោកជួបតំណាងមេធាវី ខណៈកន្លងមកសហមេធាវីលោក កឹម សុខា សុំជួបកូនក្ដី តែត្រូវសមត្ថកិច្ចរារាំង ដោយតម្រូវឲ្យសហមេធាវីស្នើសុំទៅអយ្យការជាមុនសិន។
ចុះផ្សាយនៅថ្ងៃ៖
ស្តាប់ - ០២:០៩
ក្រោយពីមានស្នើសុំពីលោក កឹម សុខា អយ្យការអមសាលាដំបូងរាជធានីភ្នំពេញ នៅថ្ងៃទី២២ ខែមីនា បានអនុញ្ញាតឲ្យលោក កឹម សុខា ជួបជាមួយមេធាវីរបស់លោក ដើម្បីពិភាក្សាគ្នាសារជាថ្មីថាគួរប្ដឹងទៅសាលាឧទ្ធរណ៍ ជំទាស់ទៅនឹងសាលក្រមសាលាដំបូងរាជធានីភ្នំពេញឬក៏យ៉ាងណា។ លោក កឹម សុខា សល់ពេលជាងមួយសប្ដាហ៍ប៉ុណ្ណោះ ដែលអាចធ្វើការប្ដឹងទាស់ទៅសាលាឧទ្ធរណ៍បាន បើមិនដូច្នោះទេសាលក្រមផ្ដន្ទាទោសលោកឲ្យជាប់ពន្ធនាគារចំនួន ២៧ឆ្នាំ នឹងចូលជាស្ថាពរ ព្រោះរយះពេល ១ខែនៃការប្ដឹងទាស់ជិតផុតកំណត់ទៅហើយ។
យ៉ាងណាមិញទាក់ទិនទៅនឹងការប្ដឹងទាស់ទៅសាលាឧទ្ធរណ៍នេះ លោកស្រី ម៉េង សុភារី សហមេធាវីការពារក្ដីឲ្យលោក កឹម សុខា បានបញ្ជាក់ប្រាប់វិទ្យុបារាំង RFI នៅថ្ងៃនេះថា ការប្ដឹងទៅសាលាឧទ្ធរណ៍ វាអាស្រ័យលើលោក កឹម សុខាប៉ុណ្ណោះ។ លោកស្រីបន្តថា បើលោក កឹម សុខា សម្រេចប្ដឹងទៅសាលាឧទ្ធរណ៍ នោះមេធាវីនឹងរៀបចំពាក្យបណ្ដឹងនេះជូនគាត់ ប៉ុន្តែសហមេធាវីមិនទាន់បានទៅជួបលោក កឹម សុខា ពិភាក្សាគ្នាទេគិតមកទល់នឹងពេលនេះ បើទោះបីជាតំណាងអយ្យការអនុញ្ញាតឲ្យជួបក៏ដោយ។ នេះបើតាមលោកស្រីមេធាវី ម៉េង សុភារី។
សូមបញ្ជាក់ថា កាលពីថ្ងៃទី០៣ ខែមីនា លោក កឹម សុខា ត្រូវបានចៅក្រមសាលាដំបូងរាជធានីភ្នំពេញសម្រេចចេញសាលក្រមផ្ដន្ទាទោសឲ្យលោកជាប់ពន្ធនាគារចំនួន ២៧ឆ្នាំ ក្នុងសំណុំរឿងក្បត់ជាតិ។ ក្នុងសាលក្រមក៏បានសម្រេចមិនអនុញ្ញាតឲ្យលោក កឹម សុខា ជួបបុគ្គលណាម្នាក់ មិនថាខ្មែរ ឬបរទេសឡើយ លុះត្រាតែមានការអនុញ្ញាតពីអយ្យការ។ បញ្ហានេះហើយ ដែលធ្វើឲ្យសហមេធាវីលោក កឹម សុខា មិនអាចជួបពិភាក្សាជាមួយកូនក្ដី ដោយត្រូវស្នើសុំ និងមានការអនុញ្ញាតពីអយ្យការជាមុនសិន ទើបអាចជួបលោក កឹម សុខាបាន។
ទាក់ទងទៅនឹងការផ្ដន្ទាទោសលោក កឹម សុខានេះដែរ សភាអឺរ៉ុបថ្មីៗនេះ បោះឆ្នោតគាំទ្រសេចក្តីស្នើការដកប្រព័ន្ធអនុគ្រោះពន្ធ និងទណ្ឌកម្មលើមន្ត្រីកម្ពុជា ក្រោយការបោះឆ្នោតថ្នាក់ជាតិ ប្រសិនបើការបោះឆ្នោតនោះមិនស្របតាមគោលការណ៍អន្តរជាតិ។ ប៉ុន្តែទណ្ឌកម្មទាំងនេះ គេកត់សម្គាល់ឃើញថា រដ្ឋាភិបាលលោក ហ៊ុន សែន ហាកមិនខ្វាយខ្វល់ឡើយ ដោយលើកឡើងថា កម្ពុជាមិនមកយកអធិបតេយ្យភាពរបស់ខ្លួន ទៅដោះដូរជំនួយ ឬភាពអនុគ្រោះណាមួយឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ