លោក កឹម សុខា សម្រេចឲ្យមេធាវីដាក់ពាក្យបណ្ដឹងឧទ្ធរណ៍ក្នុងសប្ដាហ៍នេះ
លោក កឹម សុខា ប្រធានអតីតគណបក្សសង្រ្គោះជាតិ បានសម្រេចឲ្យមេធាវីរបស់លោករៀបចំដាក់ពាក្យបណ្ដឹងទៅសាលាឧទ្ធរណ៍ក្នុងសប្ដាហ៍នេះ ជំទាស់ទៅនឹងសាលាក្រមសាលាដំបូងរាជធានីភ្នំពេញ ដែលបានផ្ដន្ទាទោសឲ្យលោកជាប់ពន្ធនាគារចំនួន ២៧ឆ្នាំ ក្នុងសំណុំរឿងក្បត់ជាតិ។ ការសម្រេចប្ដឹងទាស់ទៅសាលាឧទ្ធរណ៍នេះ ធ្វើឡើងក្រោយពីលោក កឹម សុខា បានជួបពិភាក្សាជាមួយមេធាវីរបស់លោកនៅអង្គារ៍ទី២៨ ខែមីនានេះ។ នេះបើតាមការបញ្ជាក់ពីលោកស្រីមេធាវី ម៉េង សុភារី ប្រាប់ដល់វិទ្យុបារាំង RFI។
ចុះផ្សាយនៅថ្ងៃ៖
សូមស្ដាប់លោកស្រីមេធាវី ម៉េង សុភារី៖
សូមបញ្ជាក់ថា កាលពីថ្ងៃទី០៣ ខែមីនា លោក កឹម សុខា ត្រូវបានចៅក្រមសាលាដំបូងរាជធានីភ្នំពេញចេញសាលក្រមផ្ដន្ទាទោសឲ្យជាប់ពន្ធនាគារចំនួន ២៧ឆ្នាំ ក្នុងសំណុំរឿងក្បត់ជាតិ។ ប៉ុន្មានថ្ងៃក្រោយពីការផ្ដន្ទាទោស សហមេធាវីរបស់លោក កឹម សុខា បានទៅជួបលោក កឹម សុខា តែត្រូវសមត្ថកិច្ចរារាំង ដោយតម្រូវឲ្យក្រុមមេធាវីស្នើសុំទៅអយ្យការជាមុនសិន ទើបអនុញ្ញាតឲ្យជួបកូនក្ដី។ ករណីនេះធ្វើឲ្យមេធាវីលោក កឹម សុខា មិនព្រមធ្វើតាមឡើយ ជាហេតុនាំឲ្យមានការខ្វែងគ្នាជាមួយនឹងអយ្យការ។ ក្រោយពីមេធាវី និងអយ្យការមានការខ្វែងគ្នា លោក កឹម សុខាខ្លួនឯងផ្ទាល់បានសរសេរលិខិតស្នើទៅអយ្យការដើម្បីសុំជួបជាមួយមេធាវី ទើបខាងអយ្យការអនុញ្ញាតឲ្យជួប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ