មេធាវីលោក កឹម សុខា៖ ការពន្យាពេលហួសពេលសមរម្យប៉ះពាល់ដល់សិទ្ធិទទួលបានការជម្រះក្តីឆាប់រហ័សរបស់ជនជាប់ចោទ
សំណុំរឿងសន្ទិដ្ឋិភាព ឬក្បត់ជាតិទាក់ទងនឹងលោក កឹម សុខា ប្រធានអតីតគណបក្សសង្គ្រោះជាតិ នៅមិនទាន់ត្រូវបានសាលាឧទ្ធរណ៍កំណត់ពេលវេលាជំនុំជម្រះឡើងវិញនៅឡើយទេ បន្ទាប់ពីលោក កឹម សុខា បានប្តឹងឧទ្ធរណ៍កាលពីចុងខែមីនាកន្លងទៅ។ លោក អាង ឧត្តម មេធាវី១រូប ក្នុងចំណោមមេធាវីទាំង៤រូបការពារសិទ្ធិឲ្យលោក កឹម សុខា បានប្រាប់វិទ្យុបារាំង RFI នៅថ្ងៃនេះថា លោកមិនទាន់ទទួលបានដំណឹងអ្វីទាំងអស់ពីសាលាឧទ្ធរណ៍ជុំវិញការជម្រះក្តីឡើងវិញលើលោក កឹម សុខា។ លោកមេធាវី អាង ឧត្តម បញ្ជាក់ថាការសម្រេចបើកសវនាការនៅសាលាឧទ្ធរណ៍ គឺមិនមាននីតិវិធីណាមួយកំណត់ឡើយ យោងតាមបទពិសោធន៍សំណុំរឿងខ្លះអាចត្រូវការពេលរាប់ខែ។ ទោះយ៉ាងណាលោកមេធាវីកត់សម្គាល់ថា អាចប៉ះពាល់ដល់សិទ្ធិទទួលបានការជម្រះក្តីដោយឆាប់រហ័សប្រសិនជាមានការពន្យាពេលមិនសមរម្យណាមួយ។
ចុះផ្សាយនៅថ្ងៃ៖
សូមស្តាប់លោកមេធាវី អាង ឧត្តម៖
សូមរំលឹកថាលោក កឹម សុខា ប្រធានអតីតគណបក្សសង្គ្រោះជាតិ កាលពីថ្ងៃទី០៣ ខែមីនាកន្លងទៅ ត្រូវបានសាលាដំបូងរាជធានីភ្នំពេញផ្តន្ទាទោសចំនួន២៧ឆ្នាំ ដោយឃុំខ្លួននៅក្នុងផ្ទះ ក្រោមបទចោទក្បត់ជាតិ ព្រមទាំងដកហូតសិទ្ធិពលរដ្ឋ និងសិទ្ធិនយោបាយទាំងអស់។ កាលពីចុងខែមីនាដែរ លោក កឹម សុខា បានដាក់ពាក្យប្តឹងឧទ្ធរណ៍ជំទាស់ទៅនឹងការសម្រេចទាំងអស់របស់សាលាដំបូងរាជធានីភ្នំពេញ។ ក៏ប៉ុន្តែមកទល់ពេលនេះ នៅមិនទាន់មានតម្រុយណាមួយពីសាលាឧទ្ធរណ៍កំណត់ពេលវេលាជំនុំជម្រះឡើងវិញនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ