អាជ្ញាធរស្រុកបាធាយថា គ្មានការលក់ដូរសត្វព្រៃក្នុងមូលដ្ឋានខ្លួនឡើយ
រដ្ឋបាលស្រុកបាធាយ ច្រានចោលករណីផ្សព្វផ្សាយព័ត៌មានជុំវិញការជួញដូរ និងលក់សត្វព្រៃនៅតាមដងផ្លូវជាតិលេខ៦អាត្រង់គីឡូម៉ែត្រលេខ៤៩ថា ជារូបភាពចាស់ៗ។ ការចេញមកបដិសេធនាពេលនេះ ធ្វើឡើងបន្ទាប់ពីមានប្រព័ន្ធផ្សព្វផ្សាយ និងប្រជាពលរដ្ឋមួយចំនួន ធ្វើដំណើរត្រង់ទីតាំងខាងលើប្រទះឃើញសកម្មភាពលក់សត្វព្រៃយ៉ាងសកម្ម ដោយគ្មានការអើពើពីអាជ្ញាធរក្នុងមូលដ្ឋាន។
ចុះផ្សាយនៅថ្ងៃ៖
ស្តាប់ - ០៣:១៤
តាមរយៈសេចក្តីប្រកាសព័ត៌មានចុះថ្ងៃទី២៣ ខែ មេសា ឆ្នាំ២០២៣ រដ្ឋបាលស្រុកបាធាយ អះអាងថា គ្មានឡើយករណីជួយដូរ ឬលក់សត្វព្រៃនៅតាមដងផ្លូវជាតិលេខ៦អា ស្ថិតត្រង់គីឡូម៉ែត្រលេខ៤៩ ចំណុចស្ពានត្រស់ ដូចដែលបណ្តាញសង្គម ឬតាមប្រព័ន្ធផ្សព្វផ្សាយនានាបង្ហោះនារយៈពេលប៉ុន្មានថ្ងៃចុងក្រោយនេះទេ។
ត្រង់ចំណុចនេះ អាជ្ញាធរចាត់ទុកថា ជារូបភាពចាស់ដែលផ្សព្វផ្សាយតគ្នា ពីព្រោះកន្លងមក អាជ្ញាធរមានសមត្ថកិច្ចធ្លាប់បានអញ្ចើញពលរដ្ឋដែលលួចបន្លំរក្សាទុក និងលួចលក់សត្វព្រៃ ឱ្យធ្វើកិច្ចសន្យាជាច្រើនលើកច្រើនសាររួចមកហើយ ពិសេសមានទាំងការចាប់ផាកពិន័យអន្តរកាល ហើយថែមទាំងធ្លាប់បញ្ចូនទៅតុលាការម្តងផង។
ទោះបីធ្លាប់មានចំណាត់ការតាមផ្លូវច្បាប់យ៉ាងណា សម្រាប់ករណីលួចលក់ និងជួញដូរសត្វព្រៃនៅតាមដងផ្លូវក្នុងភូមិសាស្ត្រស្រុកបាធាយនៃខេត្តកំពង់ចាមនេះ ត្រូវបានរដ្ឋបាលស្រុកបាធាយសង្កេតឃើញថា ជនល្មើសនៅតែបន្តលួចបន្លំរក្សាទុក ឬបន្លំភ្នែកអាជ្ញាធរក្រោមរូបភាពលក់ត្រីងៀត ត្រីឆ្អើ និងផ្លែឈូកជាដើម។
លោក ហេង គឹមហុង ប្រធានកម្មវិធីស្រាវជ្រាវ និងតស៊ូមតិនៃសមាគមបណ្តាញយុវជនកម្ពុជាយល់ថា នេះជាការគេចវេសមិនទទួលខុសត្រូវរបស់អាជ្ញាធរក្នុងដែនសមត្ថកិច្ចរបស់ខ្លួន ដោយលោកមើលឃើញថា ការលក់ដូរសត្វព្រៃតាមដងផ្លូវក្នុងភូមិសាស្ត្រស្រុកបាធាយ ខេត្តកំពង់ចាម គឺជារឿងពិត ហើយនៅតែបន្តកើតមានយ៉ាងព្រោងព្រាត ដោយគ្មានការអើពើពីអាជ្ញាធរ។
បើតាម លោក គឹម ហុង ក្នុងនាមអាជ្ញាធរមូលដ្ឋាន មិនគួរច្រានចោលនូវអ្វីដែលពលរដ្ឋបានឃើញ ឬឈឺឆ្អាលនោះទេ ផ្ទុយទៅវិញអាជ្ញាធរគួរសប្បាយចិត្តនៅពេលដែលពលរដ្ឋបានចូលរួមផ្សព្វផ្សាយ និងទប់ស្កាត់ការលក់ ឬជួញដូរសត្វព្រៃ។ តែយ៉ាងណា លោកព្រួយបារម្ភថា សកម្មភាពលក់ដូរសត្វព្រៃនៅទីសាធារណ ជាពិសេសក្នុងស្រុកបាធាយនឹងបន្តកើតមាន ប្រសិនបើអាជ្ញាធរគ្មានចំណាត់ការណាឱ្យបានត្រឹមត្រូវ។
យោងតាមរបាយការណ៍ស្រាវជ្រាវរបស់សមាគមបណ្តាញយុវជនកម្ពុជាកាលពីខែមីនា បានរកឃើញថា ខេត្តស្ទឹងត្រែង និងខេត្តក្រចេះដែលជាភូមិសាស្ត្រខេត្តជាប់នឹងតំបន់ការពារធម្មជាតិមានករណីលក់សត្វព្រៃខុសច្បាប់យ៉ាងអណាធិបតេយ្យ។ សត្វព្រៃដែលពលរដ្ឋយកមកលក់ភាគច្រើនជាប្រភេទសត្វជ្រូកព្រៃ ប្រឹស និងឈ្លូសជាដើម។
ករណីលក់ និងជួញដូរសត្វព្រៃនៅតែបន្តដដែល។ តែយ៉ាងណា កាលពីពេលថ្មីៗនេះ ក្រសួងបរិស្ថានសម្រេចកំណត់យកខេត្តចំនួន៥ រួមមាន៖ ខេត្តកំពង់ស្ពឺ ពោធិ៍សាត់ កោះកុង បាត់ដំបង និងបៃលិន ដែលស្ថិតនៅតំបន់ជួរភ្នំក្រវាញ មកអនុវត្តនូវយុទ្ធនាការអន្ទាក់សូន្យក្នុងដំណាក់កាលទី២។ ខណៈកាលពីដំណាក់កាលទី២ ក្រសួងបរិស្ថានបានអនុវត្តទៅលើខេត្តចំនួន៦ មានដូចជា៖ ខេត្តក្រចេះ ស្ទឹងត្រែង រតនគិរី មណ្ឌលគិរី ព្រះវិហារ និងខេត្តកំពង់ធំ ហើយរកឃើញថា ចំនួនអន្ទាក់បានថយចុះនៅសល់ជាង៣ម៉ឺន៥ពាន់(៣៥,១៩៣អន្ទាក់) បើធៀបជាមួយទិន្នន័យមូលដ្ឋានដែលមិនទាន់ធ្វើយុទ្ធនាការមានចំនួនជាង៦ម៉ឺន(៦១,១៦១) អន្ទាក់។
ដោយឡែក កាលពីឆ្នាំ២០២១ អន្ទាក់ចំនួនប្រមាណ៦ម៉ឺន(៦១,៦១១) ត្រូវបានដកចេញពីតំបន់ការពារធម្មជាតិ។ ក៏ប៉ុន្តែចំនួននេះបានកើនឡើងប្រមាណ២០% ពីចំនួនជាង៤ម៉ឺនអន្ទាក់(៤៣,២៧០) ក្នុងឆ្នាំ២០២០។ ហើយ បើតាមការសិក្សាកន្លងមក គឺថា បរិមាណអន្ទាក់ត្រឹមតែ២០%ប៉ុណ្ណោះត្រូវបានដោះចេញពីតំបន់ការពារធម្មជាតិក្នុងមួយឆ្នាំ ខណៈ៨០%ទៀត កំពុងមានវត្តមាននៅក្នុងព្រៃនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ