លោក ហ៊ុន សែន ថាលោកមិនលើកលែងទោសឲ្យ[កឹម សុខា] ដោយសារមិនទុកចិត្តបរទេស

 ប្រមុខរដ្ឋាភិបាលកម្ពុជា បានអះអាងជាថ្មីទៀតថា មូលហេតុដែលលោកមិនលើកលែងទោសដែលសំដៅទៅលោក កឹម សុខា និងកញ្ញា សេង ធាវី មេធាវីសញ្ជាតិអាមេរិកាំងនោះ ដោយសារតែលោកមិនទុកចិត្តបរទេស ដែលលោកហៅថាពួកគេចូលចិត្តចាប់ដៃតែជាន់ជើង។ លោក ហ៊ុន សែន ថ្លែងថាគ្មាននណាហ៊ានធ្វើអ្វីលោកបានឡើយ ហើយថានេះជាមេរៀនសម្រាប់បរទេសដែលតែងតែលើកឡើងពីករណីលោក កឹម សុខា និងករណី កញ្ញា សេង ធារី។ 

ប្រធានគណបក្សសង្រ្គោះជាតិ លោក កឹម សុខា © Internet

នៅក្នុងពិធីជួបជុំកម្មករនៅថ្ងៃទី២៨មិថុនា នៅជាយក្រុងភ្នំពេញ ប្រមុខរដ្ឋាភិបាលកម្ពុជា បានផ្តល់សារទៅបរទេសថា ចាប់ម៉ោងនេះទៅអ្នកណាក៏ដោយឲ្យតែមានអន្តរាគមន៍ពីបរទេសគឺត្រូវជាប់ពន្ធនាគារឲ្យគ្រប់ចំនួនដែលបានកាត់ទោស។ នេះគឺជាអ្វីដែលលោក ហ៊ុន សែន ហៅថាជាការទប់ស្កាត់ការជ្រៀតជ្រែកកិច្ចការផ្ទៃក្នុងពីសំណាក់បរទេស។

បើតាមលោកនាយករដ្ឋមន្ត្រី ហ៊ុន សែន នេះជាមេរៀនដែលបរទេសត្រូវដកពិសោធន៍បានហើយចំពោះការអន្តរាគមន៍កន្លងមកលើករណីអ្នកនយោបាយដែលជាប់ពន្ធនាគារនៅកម្ពុជា។

លោក ហ៊ុន សែន បានបន្តអះអាងជាថ្មីទៀតថា មូលហេតុដែលោកមិនលើកលែងទោសដែលសំដៅទៅលោក កឹម សុខា និងកញ្ញា សេង ធាវី មេធាវីសញ្ជាតិអាមេរិកាំងនោះ ដោយសារតែលោកមិនទុកចិត្តបរទេស ដែលលោកហៅថាពួកគេចូលចិត្តចាប់ដៃតែជាន់ជើង។

បើតាមលោក ហ៊ុន សែន គ្មាននណាហ៊ានធ្វើអ្វីលោកឡើយ បើទោះជាលោកមិនលើកលែងទោសឲ្យអ្នកទាំងនេះទៅតាមការចង់បានរបស់បរទេស។

សាលាដំបូងរាជធានីភ្នំពេញ កាលពីថ្ងៃទី៣មីនា បានសម្រេចផ្តន្ទាទោសលោក កឹម សុខា ឲ្យជាប់ពន្ធនាគាររយៈពេល ២៧ ឆ្នាំ ពីបទ ឃុតឃិតជាមួយបរទេសផ្តួលរំលំរដ្ឋាភិបាលរបស់លោក ហ៊ុន សែន។ ការផ្តន្ទាទោសនោះ ត្រូវបានសហរដ្ឋអាមេរិកប្រតិកម្មថាជាចេតនាបិទសិទ្ធិធ្វើនយោបាយរបស់លោក កឹម សុខា ខណៈប្រទេសសេរីផ្សេងទៀតទទួចឲ្យទម្លាក់ចោលការចោទប្រកាន់ ដោយថា ការកាត់ទោសនេះគ្មានភស្តុតាងគ្រប់គ្រាន់ឡើយ។

ចំណែក  កញ្ញា សេង ធារី មេធាវីខ្មែរសញ្ជាតិអាមេរិក ត្រូវបានផ្តន្ទាទោសដាក់ពន្ធធនាគារ៦ឆ្នាំ ពាក់ព័ន្ធសំណុំរឿងវិលចូលស្រុករបស់លោក សម រង្ស៊ី។ ករណីសេង ធារី ត្រូវបានលោក ចូ បៃដិន ប្រធានាធិបតីអាមេរិកលើកឡើងក្នុងជំនួបជាមួយលោក ហ៊ុន សែន នៅក្រៅកិច្ចប្រជុំកំពូលអាស៊ាននៅភ្នំពេញ។ នេះបើតាមក្រសួងការបរទេសអាមេរិក តែត្រូវបានលោក ហ៊ុន សែន អះអាងថាមិនការលើកឡើងបែបនោះឡើយ៕