IFC បើកការស៊ើបអង្កេតគ្រឹះស្ថានមីក្រូហិរញ្ញវត្ថុចំនួន៦នៅកម្ពុជា ដែលចោទថាបង្កមហន្តរាយដល់អ្នកខ្ចី
សាជីវកម្មហិរញ្ញវត្ថុអន្តរជាតិ (International Finance Corporation ឬ IFC) នៅថ្ងៃទី១ខែសីហាម្សិលមិញនេះ បានប្រកាសបើកការស៊ើបអង្កេតជាផ្លូវការលើគ្រឹះស្ថានមីក្រូហិរញ្ញវត្ថុចំនួន៦នៅកម្ពុជា បន្ទាប់ពីមានពាក្យបណ្តឹងថាគ្រឹះស្ថានទាំងនោះបាន ធ្វើឲ្យអន្តរាយដល់ពលរដ្ឋកម្ពុជាជាអ្នកខ្ចីប្រាក់។ នៅក្នុងសេចក្តីថ្លែងការណ៍ IFC បានបញ្ជាក់ថាស៊ើបអង្កេតឱ្យម៉ត់ចត់ ដើម្បីធានាថា ការវិនិយោគរបស់សាជីវកម្មហិរញ្ញវត្ថុអន្តរជាតិ ជាមួយគ្រឹះស្ថានមីក្រូហិរញ្ញវត្ថុទាំងនោះមិនពាក់ព័ន្ធនឹងពលកម្មកុមារ និងការរំលោភសិទ្ធិដីធ្លីរបស់ជនជាតិដើមភាគតិចដោយគ្មានការយល់ព្រម។ អោ ស្រីពេជ្រ រាយការណ៍
ចុះផ្សាយនៅថ្ងៃ៖
រយៈពេលជាងមួយឆ្នាំមកហើយដែលដំណើរការត្រួតពិនិត្យជាច្រើនលើកច្រើនសាររបស់ទីប្រឹក្សាដោះស្រាយវិវាទនៃសាជីវកម្មហិរញ្ញវត្ថុអន្តរជាតិ ត្រូវបានធ្វើឡើង ទៅតាមបណ្តឹងរបស់អង្គការក្រៅរដ្ឋាភិបាលដែលមានដូចជាអង្គការលីកាដូ និងអង្គការសមធម៌កម្ពុជា។ ពាក្យបណ្តឹងនោះចោទថា គ្រឹះស្ថានមីក្រូហិរញ្ញវត្ថុចំនួន៦ បានបង្កមហន្តរាយដល់អ្នកខ្ចី។
នៅថ្ងៃទី១ ខែសីហា ឆ្នាំ២០២៣ សាជីវកម្មហិរញ្ញវត្ថុអន្តរជាតិ (International Finance Corporation ឬ IFC)ដែលផ្តល់មូលនិធិដល់ស្ថាប័នមីក្រូហិរញ្ញវត្ថុនៅកម្ពុជា បានប្រកាសបើកការស៊ើបអង្កេតជាផ្លូវការ លើគ្រឹះស្ថានមីក្រូហិរញ្ញវត្ថុចំនួន៦នោះរួមមាន ធនាគារអេស៊ីលីដា គ្រឹះស្ថានមីក្រូហិរញ្ញវត្ថុអម្រឹត គ្រឹះស្ថានមីក្រូហិរញ្ញវត្ថុប្រាសាក់ ធនាគារហត្ថា ធនាគារអិលអូអិលស៊ី និងធនាគារស្ថាបនាជាដើម។
យោងតាមសាជីវកម្មហិរញ្ញវត្ថុអន្តរជាតិ មីក្រូហិរញ្ញវត្ថុនៅកម្ពុជាខាងលើនេះ ត្រូវបានចោទប្រកាន់ថា បានបំពានបទដ្ឋានស្តង់ដាអនុវត្តន៍របស់សាជីវកម្មហិរញ្ញវត្ថុអន្តរជាតិ ដែលហាមឃាត់ការវិនិយោគទាំងឡាយណាដែលពាក់ព័ន្ធការបាត់បង់ដីធ្លី និងជីវភាពរស់នៅរបស់អ្នកខ្ចីមីក្រូហិរញ្ញវត្ថុ ពលកម្មកុមារ ការធ្វើចំណាកស្រុកដែលជំរុញដោយតម្រូវការសេដ្ឋកិច្ច ផលប៉ះពាល់អវិជ្ជមានលើសហគមន៍ជនជាតិដើមភាគតិច និងការភ័យខ្លាចនៃការសងសឹកឧស្សាហកម្មប្រឆាំងនឹងអ្នករិះគន់។
គួរជម្រាបថា មីក្រូហិរញ្ញវត្ថុទាំង៦នោះ តំណាងឱ្យភាគហ៊ុនជាង៧០% នៃទីផ្សារមីក្រូហិរញ្ញវត្ថុរបស់ប្រទេសកម្ពុជាជាសរុប។
យោងតាមអង្គការការពារសិទ្ធិមនុស្សលីកាដូ ស្ថាប័នហិរញ្ញវត្ថុទាំង៦ខាងលើ ធ្លាប់ទទួលបានការអនុម័តទឹកប្រាក់ច្រើនជាង៤០០លានដុល្លារពីមូលនិធិសាជីវកម្មហិរញ្ញវត្ថុអន្តរជាតិ នៅរយៈពេល៥ឆ្នាំចុងក្រោយនេះ រួមមានកម្ចីឥណទានដោយផ្ទាល់ កម្ចីបញ្ចូលគ្នា កម្ចីឥណទាន និងការវិនិយោគផ្អែកលើសមភាពពីមូលនិធិដែលគាំទ្រដោយសាជីវកម្មហិរញ្ញវត្ថុអន្តរជាតិ។
ចំណែក វិនិយោគិន ឬមូលនិធិ ចំនួន ៤ទៀតដូចជា ឥណទានពង្រឹងមីក្រូហិរញ្ញវត្ថុ មូលនិធិគំនិតផ្តួចផ្តើមមីក្រូហិរញ្ញវត្ថុដើម្បីបំណុលអាស៊ី ក្រុមហ៊ុន Advans S.A និង ក្រុមហ៊ុន North Haven Thai Private Equity Fund L.Pក៏ស្ថិតក្នុងការស៊ើបអង្កេតនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ