លោក សម រង្ស៊ី៖ វិបត្តិបំណុលធនាគារនៅកម្ពុជាធ្វើឲ្យពលរដ្ឋខ្លះបានធ្វើអត្តឃាតខ្លួនឯង
លោក សម រង្ស៊ី ប្រធានស្ដីទីអតីតគណបក្សសង្រ្គោះជាតិ បានលើកឡើងថា វិបត្តិបំណុលធ្វើឲ្យប្រជាពលរដ្ឋខ្មែរខ្លះបានធ្វើអត្តឃាតខ្លួនឯង។ បញ្ហានេះលោក សម រង្ស៊ី ក៏បានចោទថា រដ្ឋាភិបាលក៏មានជាប់ពាក់ព័ន្ធផងដែរ។ ប៉ុន្តែអ្នកនាំពាក្យសមាគមមីក្រូហិរញ្ញវត្ថុកម្ពុជាថា វិបត្តិបំណុលធ្វើឲ្យប្រជាពលរដ្ឋខ្មែរខ្លះបានធ្វើអត្តឃាតខ្លួនឯងនេះ មិនជាប់ពាក់ព័ន្ធនឹងសមាជិកខ្លួនដោយផ្ទាល់ឡើយ ករណីនេះអាចជាប់ពាក់ព័ន្ធបំណុលក្រៅប្រព័ន្ធច្រើនជាង។
ចុះផ្សាយនៅថ្ងៃ៖
ស្តាប់ - ០៣:០១
ដោយដកស្រង់ចេញពីសារព័ត៌មានអង់គ្លេសដែលមានឈ្មោះថាThe Guardian លោក សម រង្ស៊ី បាននិយាយថា «មានពលរដ្ឋរាប់មិនអស់ទូទាំងប្រទេសជួបប្រទះវិបត្តិបំណុលយ៉ាងធ្ងន់ធ្ងរ រើខ្លួនមិនរួច អស់សង្ឃឹម រហូតដល់ចង់សម្លាប់ខ្លួន ឬក៏ធ្វើអត្តឃាតរួចទៅហើយ»។ លោក សម រង្ស៊ី បានចោទរដ្ឋាភិបាលដឹកនាំដោយលោក ហ៊ុន សែននិងរដ្ឋាភិបាលថ្មីដឹកនាំដោយលោក ហ៊ុន ម៉ាណែត ជាអ្នកចូលដៃជាមួយធនាគារ និងគ្រឹះស្ថានមីក្រូហិរញ្ញវត្ថុខិលខូច កេងប្រវ័ញ្ចពលរដ្ឋក្រីក្រ ដើម្បីទទួលបានប្រាក់ចំណេញ។
យ៉ាងណាការចោទប្រកាន់របស់លោក សម រង្ស៊ី ខាងលើនេះ នៅមិនទាន់មានប្រតិកម្មពីរដ្ឋាភិបាលឡើយ។ ប៉ុន្តែអ្នកនាំពាក្យសមាគមមីក្រូហិរញ្ញវត្ថុកម្ពុជា លោក កាំង តុងងីវិញ ថាការចុះផ្សាយដោយសារព័ត៌មានអង់គ្លេស The Guardian ដែលដកស្រង់ដោយលោក សម រង្ស៊ីនេះ ខាងសមាគមមីក្រូហិរញ្ញវត្ថុរកមិនទាន់ឃើញថាសមាជិកខ្លួនជាប់ព័ន្ធដោយផ្ទាល់ឡើយ។ ករណីនេះអាចជាប់ពាក់ព័ន្ធដោយប្រយោលប៉ុណ្ណោះ ហើយមួយផ្នែកទៀតអាចជាប់ពាក់ព័ន្ធបំណុលក្រៅប្រព័ន្ធ។
នៅក្នុងអត្ថបទសារព័ត៌មានអង់គ្លេស The Guardian បានសរសេររៀបរាប់អំពីគ្រួសារក្រីក្រមួយនៅខេត្តរតនៈគិរី ដែលស្វាមីបានស្លាប់ដោយសារតែបញ្ហាខ្ចីលុយធនាគារ និងគ្រឹះស្ថានមីក្រូហិរញ្ញវត្ថុនៅកម្ពុជា ពុំមានលទ្ធភាពសងត្រឡប់ទៅវិញ។ សារព័ត៌មាននេះបានស្រង់សម្ដីគ្រួសារជនរងគ្រោះ មុនឈានដល់ការសម្លាប់ខ្លួន គឺបន្ទាប់ពីធនាគារ និងគ្រឹះស្ថានមីក្រូហិរញ្ញវត្ថុ មករំលឹកដល់ផ្ទះដើម្បីដាស់តឿនឲ្យជនរងគ្រោះសងប្រាក់ដែលបានជំពាក់។
ចំពោះអត្ថបទសារព័ត៌មានអង់គ្លេស The Guardian ដែលបានចុះផ្សាយរឿងនេះ លោក កាំង តុងងី បានគូសបញ្ជាក់ថា ខាងសមាគមមីក្រូហិរញ្ញវត្ថុកម្ពុជា និងសមាគមធនាគារ បាននិងកំពុងធ្វើការស្រាវជ្រាវស្វែងរកការពិតចំពោះរឿងនេះហើយ ដើម្បីដាក់ជូនទៅធនាគារជាតិនៃកម្ពុជា។ ដូច្នេះករណីនេះស្ថិតក្នុងការស្រាវជ្រាវនៅឡើយ មិនទាន់ដឹងច្បាស់ថា ពិតជាមានករណីពលរដ្ឋសម្លាប់ខ្លួនដោយសារវិបត្តិបំណុលជំពាក់ធនាគារ និងគ្រឹះស្ថានមីក្រូហិរញ្ញវត្ថុទេ។
ប៉ុន្តែយ៉ាងណាបើតាមសារព័ត៌មានអង់គ្លេស The Guardian ប្រទេសកម្ពុជាតំណាងឲ្យវិស័យមីក្រូហិរញ្ញវត្ថុដ៏ធំបំផុតមួយរបស់ពិភពលោក ដោយកម្ចីសម្រាប់មនុស្សម្នាក់ៗជាមួយនឹងប្រាក់កម្ចីសរុបចំនួន 16ពាន់លានដុល្លារ ប៉ុន្តែក្រុមហ៊ុនមីក្រូប្រាក់កម្ចីដ៏ធំបំផុតមួយចំនួននៅកម្ពុជា កំពុងស្ថិតក្រោមការត្រួតពិនិត្យពីសាជីវកម្មហិរញ្ញវត្ថុអន្តរជាតិ (IFC) របស់ក្រុមធនាគារពិភពលោកសម្រាប់ការខូចខាតដែលត្រូវបានចោទប្រកាន់ថាបណ្តាលមកពីការផ្តល់ប្រាក់កម្ចី រួមមាន "ការបាត់បង់ដីធ្លី ផលប៉ះពាល់លើជីវភាពរស់នៅ ផលប៉ះពាល់លើជនជាតិដើមភាគតិច និងការគំរាមកំហែងជាដើម"៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ