សមាគមមីក្រូហិរញ្ញវត្ថុ៖ អត្ថបទThe Guardian មិនបង្ហាញពីស្ថានភាពពិតនៃវិបត្តិបំណុល
សមាគមមីក្រូហិរញ្ញវត្ថុកម្ពុជាបានបកស្រាយថា អត្ថបទរបស់កាសែតអង់គ្លេស The Guardian មិនបង្ហាញពីអង្គហេតុពិតនិងការស៊ើបអង្កេតជាក់ស្តែងដែលខ្លួនបានផ្តល់ឱ្យ។ ការចេញមុខបកស្រាយរបស់សមាគមមីក្រូហិរញ្ញវត្ថុនេះធ្វើឡើង បន្ទាប់ពីកាសែតអង់គ្លេស The Guardian កាលពីថ្ងៃទី២៣តុលាកន្លងទៅបានចុះផ្សាយអត្ថបទមួយដោយរៀបរាប់ថា វិបត្តិបំណុលធនាគារកំពុងរុញឱ្យស្ត្រីជនជាតិដើមភាគតិចនៅខេត្តរតនៈគីរី ធ្វើអត្តឃាតដូចស្វាមីដែរ។
ចុះផ្សាយនៅថ្ងៃ៖
ស្តាប់ - ០២:១៤
សមាគមមីក្រូហិរញ្ញវត្ថុកម្ពុជាបានបកស្រាយថា អត្ថបទរបស់កាសែតអង់គ្លេស The Guardian ដែលរៀបរាប់ថា វិបត្តិបំណុលធនាគារកំពុងរុញឱ្យស្ត្រីជនជាតិដើមភាគតិចម្នាក់នៅខេត្តរតនៈគីរី ធ្វើអត្តឃាតដូចស្វាមី, គឺជាការផ្សាយដែលមានខ្លឹមសារមិនបង្ហាញពីការពន្យល់និងការផ្តល់ព័ត៌មានរបស់សមាគមមីក្រូហិរញ្ញវត្ថុកម្ពុជា។
នៅក្នុងសេចក្តីថ្លែងការណ៍នៅថ្ងៃទី០១វិច្ឆិកា សមាគមមីក្រូហិរញ្ញវត្ថុកម្ពុជាបានបញ្ជាក់ថាខ្លួនបានផ្តល់អង្គហេតុ និងព័ត៌មានពាក់ព័ន្ធ ផ្អែកតាមការស៊ើបអង្កេតការផ្ទៃក្នុងរបស់គ្រឹះស្ថានជាប់ពាក់ព័ន្ធ។ ដោយលទ្ធផលបានបង្ហាញថា មិនរកឃើញភស្តុតាងណាមួយបញ្ជាក់ថាមានការគៀបសង្កត់ ឬ មានអំពើអសីលធម៌ពីសំណាក់គ្រឹះស្ថាន ឬ បុគ្គលរបស់ខ្លួនឡើយ។ លើលពីនោះ សមាគមក៏មិនបានរកឃើញដែរថា មានការជាប់ពាក់ព័ន្ធគ្នារវាងការធ្វើអត្តឃាត និងកម្ចីរបស់គ្រឹះស្ថាន។
គួរជម្រាបជូនថា កាសែតអង់គ្លេស The Guardian កាលពីថ្ងៃទី២៣តុលាកន្លងទៅបានចុះផ្សាយអត្ថបទមួយដោយរៀបរាប់ថា វិបត្តិបំណុលធនាគារកំពុងរុញឱ្យស្ត្រីជនជាតិដើមភាគតិចនៅខេត្តរតនៈគីរីធ្វើអត្តឃាតដូចស្វាមីខ្លួន។ ក្នុងអត្ថបទព័ត៌មានមានរំលេចទៀតថា ស្វាមីរបស់ស្ត្រីរូបនោះបានសម្លាប់ខ្លួន ព្រោះតែបំណុលវ័ណ្ឌកនៅគ្រឹះស្ថានមីក្រូហិរញ្ញវត្ថុ អិលអូអិលស៊ី កាលពីឆ្នាំ២០២២ នៅក្រោយមួយខែ ដែលបំណុលកើនគុណនឹង៣ និងបើតាមប្រភពជាស្ត្រីជនជាតិដើមភាគតិចនោះ នាងនិងស្វាមីត្រូវបានអិលអូអិលស៊ី លើកទឹកចិត្តឱ្យទៅខ្ចីបុលពីភាគីផ្សេងដើម្បីដោះបំណុលនោះ។
គួរជម្រាបថា របាយការណ៍អង្គការលីកាដូរកឃើញថា ប្រជាជនកម្ពុជា ៣៦% មិនអាចរកប្រាក់បង់សងត្រឡប់ទៅគ្រឹះស្ថានមីក្រូហិរញ្ញវត្ថុវិញបាន ដែលផ្ទុយពីតួលេខរបស់ធនាគារជាតិកម្ពុជា ដែលមានត្រឹមតែ៣.៣% ប៉ុណ្ណោះ។ របាយការណ៍នោះបញ្ជាក់ថា ពលរដ្ឋខ្មែរប្រមាណ១៦ម៉ឺន៧ពាន់នាក់បានលក់ដីធ្លី ដើម្បីយកលុយទៅសងបំណុលមីក្រូហិរញ្ញវត្ថុ ខណៈពលរដ្ឋខ្លះត្រូវបង្ខំចិត្តខ្ចីបំណុលពីគ្រឹះស្ថានថ្មីដើម្បីយកទៅសងគ្រឹះស្ថានមីក្រូហិរញ្ញវត្ថុចាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ