ពលរដ្ឋកម្ពុជាអាចទូទាត់ប្រាក់ឆ្លងដែនរវាងKHRQ និង Alipay បានជាង៨៣លានកន្លែងជុំវិញពិភពលោក
អាជីវករក្នុងស្រុកដែលកំពុងប្រើប្រាស់ប្រព័ន្ធទូទាត់ប្រាក់«បាគង»របស់ធនាគារជាតិនៃកម្ពុជា នឹងអាចទូទាត់ប្រាក់ជាមួយអ្នកប្រើប្រាស់ ឬអាជីវករដែលប្រើប្រាស់ប្រព័ន្ធAlipay ជាង៨៣លានអាជីវករនៅទូទាំងពិភពលោក។ នេះបើតាមធនាគារជាតិនៃកម្ពុជា។ កិច្ចសហប្រតិបត្តិការទូទាត់ប្រាក់ឆ្លងដែនរវាងKHQRរបស់បាគង និងAlipayនេះ គឺដើម្បីធ្វើឱ្យមានងាយស្រួលរាល់ការទូទាត់ប្រាក់ឆ្លងដែន ពិសេសដើម្បីជំរុញកំណើនសេដ្ឋកិច្ចជាតិផង។
ចុះផ្សាយនៅថ្ងៃ៖
ស្តាប់ - ០២:០៥
លោកស្រី ជា សេរី ទេសាភិបាលធនាគារជាតិនៃកម្ពុជាបានលើកឡើងថា ក្រៅតែពីការលើកកម្ពស់ការទូទាត់ប្រាក់ឆ្លងដែនរវាងKHQR និងAlipay កិច្ចសហប្រតិបត្តិការថ្មីនេះ ក៏នឹងចូលរួមចំណែកដល់ការទាក់ទាញភ្ញៀវទេសចរបរទេសឱ្យចូលមកទស្សនាប្រទេសកម្ពុជា និងមានភាពងាយស្រួលរាល់ការទូទាត់ប្រាក់ជាដើម។
ម្យ៉ាងវិញទៀត លោកស្រីបញ្ជាក់ថា ការភ្ជាប់ប្រព័ន្ធទូទាត់ប្រាក់ឆ្លងដែនជាមួយAlipay បានបង្កភាពងាយស្រួលដល់ពលរដ្ឋខ្មែរដែលធ្វើដំណើរទៅក្រៅប្រទេសអាចធ្វើការទូទាត់ប្រាក់រៀលខ្មែរទៅកាន់ធនាគារផ្សេងដែលមានប្រព័ន្ធAlipayដោយមានភាពងាយស្រួល និងសុវត្ថិភាព។ ក្នុងនោះ លោកស្រី ជា សេរីបញ្ជាក់ថា ទាំងអាជីវករ ឬពាណិជ្ជករក្នុងស្រុក តម្រូវឱ្យមានគណនីជាប្រាក់រៀល និងទទួលយកការទូទាត់ជាប្រាក់រៀល។
ក្រៅពីកិច្ចសហប្រតិបត្តិជាមួយAlipay ធនាគារជាតិនៃកម្ពុជាកាលពីអំឡុងខែកក្តដា ឆ្នាំ២០២៣ ក៏បានចុះអនុស្សារណៈជាមួយប្រព័ន្ធទូទាត់ប្រាក់អន្តរជាតិUnion Pay របស់ចិន។ លើសពីនេះ ប្រព័ន្ធទូទាត់KHQRរបស់បាគងក៏កំពុងប្រើប្រាស់យ៉ាងទូលំទូលាយនៅក្នុងប្រទេសម៉ាឡេស៊ី ថៃ និងវៀតណាម ខណៈប្រព័ន្ធទូទាត់ប្រាក់របស់បាគងនេះទៀតសោធត្រៀមនឹងដំណើរការនៅក្នុងប្រទេសឥណ្ឌា រួមនឹងប្រទេសជប៉ុនផង។
ចំណែកប្រព័ន្ធទូទាត់ប្រាក់Alipayវិញ កំពុងដំណើរការនៅលើទីផ្សារជាង៥៧ ក្នុងនោះក៏មានក្នុងបណ្តាប្រទេសធំៗមួយចំនួនដូចជា៖ ចិន សិង្ហបុរី ម៉ាឡេស៊ី ថៃ ម៉ាឡេស៊ី ជប៉ុន និងកូរ៉េខាងត្បូង។
បើតាមយោងតាមរបាយការណ៍ចេញផ្សាយពីធនាគារជាតិ គិតត្រឹមឆមាសទី១ឆ្នាំ២០២៣ ការទូទាត់ប្រាក់តាមប្រព័ន្ធបាគងគឺមានចំនួន៣៥.៤លានប្រតិបត្តិការទូទាត់ និងគិតជាទឹកប្រាក់ប្រមាណ១២ពាន់លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ