ADB និង WB ផ្តល់កម្ចីជាង២០០លានដុល្លារ ដល់កម្ពុជាសម្រាប់កំណែទម្រង់មួយចំនួន
ធនាគារអភិវឌ្ឍន៍អាស៊ី (ADB) នៅថ្ងៃសុក្រនេះ បានអនុម័តប្រាក់កម្ចីចំនួន ៥០លានដុល្លារ សម្រាប់ពង្រឹងកំណែទម្រង់គម្រោងអភិវឌ្ឍន៍មួយចំនួននៅកម្ពុជា។ ការអនុម័តកម្ចីរបស់ ADB ដល់កម្ពុជាពេលនេះ ធ្វើឡើងតែប៉ុន្មានថ្ងៃប៉ុណ្ណោះ ក្រោយធនាគារពិភពលោក(World Bank) បានផ្តល់ការយល់ព្រមលើគម្រោងមួយដែរ ដែលមានតម្លៃ ១៦៣លានដុល្លារ កាលពីដើមសប្តាហ៍នេះ សម្រាប់ការផ្គត់ផ្គង់ទឹកស្អាត និងអនាម័យនៅកម្ពុជា។
ចុះផ្សាយនៅថ្ងៃ៖
ស្តាប់ - ០២:០០
ធនាគារអភិវឌ្ឍន៍អាស៊ី(ADB) បានឲ្យដឹងថាការអនុម័តកម្ចី ៥០លានដុល្លារដល់កម្ពុជាពេលនេះ គឺដើម្បីពង្រឹងគោលនយោបាយ និងក្របខ័ណ្ឌបទប្បញ្ញត្តិសម្រាប់ការគ្រប់គ្រងចំណាយ និងចំណូល ព្រមទាំងសមត្ថភាពស្រូបយកនៃក្រសួង ដែលបានជ្រើសរើសដើម្បីអនុវត្តកំណែទម្រង់ការគ្រប់គ្រងហិរញ្ញវត្ថុសាធារណៈ និងពង្រឹងទំនួលខុសត្រូវការងារត្រួតពិនិត្យរបស់អាជ្ញាធរសវនកម្មជាតិ។
នាយិកាធនាគារ ADB ប្រចាំកម្ពុជា លោកស្រី Jyotsana Varma បានលើកឡើងថា កំណែទម្រង់ក្រោមហិរញ្ញប្បទានរបស់ ADB នេះ ឆ្លើយតបទៅនឹងបញ្ហាប្រឈមនៃការអភិវឌ្ឍន៍ ដែលកំណត់ដោយរាជរដ្ឋាភិបាលក្នុងដំណើរការគ្រប់គ្រងការចំណាយ និងចំណូលរបស់កម្ពុជា។ លោកស្រីថា វានឹងបង្កើនសមត្ថភាពអនុវត្តការងាររបស់ក្រសួង និងពង្រឹងមុខងារសវនកម្មខាងក្រៅ។ អន្តរាគមន៍នានាក្រោមកម្មវិធីនេះ នឹងផ្តល់នូវលំហសារពើពន្ធបន្ថែម ដែលអនុញ្ញាតឲ្យរដ្ឋាភិបាលកម្ពុជាអាចធ្វើឲ្យប្រសើរឡើងនូវលទ្ធភាពទទួលបាន និងគុណភាពនៃសេវាសាធារណៈ ព្រមទាំងគាំទ្រកំណើនប្រកបដោយបរិយាបន្ន។ នេះបើតាមលោកស្រី Vamar។
សូមរំលឹកថា កាលពីថ្ងៃទី២១ ខែវិច្ឆិកានេះដែរ ធនាគារពិភពលោក បានផ្តល់ការយល់ព្រមលើគម្រោងមួយដែលមានតម្លៃ ១៦៣លានដុល្លារ សម្រាប់ជួយដល់ប្រទេសកម្ពុជានៅក្នុងកិច្ចប្រឹងប្រែងពង្រឹងសេវាផ្គត់ផ្គង់ទឹកស្អាត និងអនាម័យ ដែលគម្រោងនេះជាប្រយោជន៍ដល់ប្រជាជនជាង ១៧៥ ០០០នាក់ ក្នុងខេត្តចំនួន ៤។
ធនាគារពិភពលោក បញ្ជាក់ថាគម្រោងជំរុញការផ្គត់ផ្គង់ទឹកស្អាត និងអនាម័យ ដែលមានរយៈពេល៦ឆ្នាំនេះ នឹងជួយដល់សកម្មភាពនានារបស់រដ្ឋាភិបាល នៅក្នុងការបង្កើនលទ្ធភាពទទួលបានការផ្គត់ផ្គង់ទឹកស្អាត និងអនាម័យ ការកែលម្អប្រតិបត្តិការ និងការថែទាំប្រព័ន្ធទឹកស្អាត និងអនាម័យដែលមាននាពេលបច្ចុប្បន្ននេះ និងក្នុងការធានាដល់ចីរភាពរបស់សេវាទាំងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ